खासदार नवनीत राणा यांच्या विरोधात अजामीनपात्र वॉरंट जारी

मुंबई : अमरावतीच्या खासदार नवनीत राणा (MP Navneet Rana) यांच्या अडचणीत आता वाढल्या आहेत. दुसऱ्यांदा नवीनीत राणा यांच्याविरोधात अजामीनपात्र वॉरंट (non-bailable warrant) जारी करण्यात आले असून आता नवनीत राणा यांना अटक होणार का? या कडे सर्वांचे लक्ष लागले आहे. जात प्रमाणपत्र प्रकरणी ( caste certificate case) राणा यांच्या विरोधात हे वॉरंट जारी करण्यात आल आहे.

खासदार नवनीत राणा (MP Navneet Rana) आणि वडील हरभजन सिंह यांच्या विरोधात दोन महिन्यात दोनवेळा अजामीनपात्र वॉरंट जारी करण्यात आले आहे. जात प्रमाणपत्र प्रकरणात खासदार नवनीत राणा आणि वडील हरभजन सिंह यांच्या विरोधात मुंबईतील मुलुंड पोलीस ठाण्यात गुन्हा दाखल करण्यात आला होता.

या प्रकरणी राणांविरोधात फसवणुकीचा गुन्हा दाखल करण्यात आला होता. तसेच राणांचे वडील देखील या प्रकरणात आरोपी आहेत. नवनीत राणा यांच्यावर अनुसूचित जातीचे प्रमाणपत्र मिळविण्यासाठी शाळा सोडल्याचा दाखला खोटा केल्याचा आरोप आहे. अमरावती मतदार संघ अनुसूचित जाती उमेदवारांसाठी राखीव आहे. तेथून निवडणूक लढवण्यासाठी राणा यांनी खोटा दाखल तयार केल्याचा आरोप या प्रकरणात केला असून या संदर्भात मुलुंड पोलीस ठाण्यात राणा यांच्याविरुद्ध आरोपपत्र दाखल करण्यात आले आहे.