पुणे : शहरातील विविध न्यायालयात आरोपींना बनावट कागदपत्रांद्वारे (Forged Documents) जामीन मिळवून देणाऱ्या टोळीचा गु्न्हे शाखेने पर्दाफाश केला आहे. या टोळीला शिवाजीनगर तसेच खडकी न्यायालयाच्या आवारात कारवाई करून पकडले आहे. त्यांच्याकडून बनावट, आधारकार्ड, सातबारा उतारे, रबरी शिक्के असा ऐवज जप्त केला आहे.
गोपाळ कुंडलिक कांगणे (वय ३३, रा. पिंपरी), रवी राजू वाघमारे (वय २९), हसन हाजी शेख (वय २५), सागर अनंत काटे (वय २५, सोनू हरि शिंदे (वय २०), सलीम सायधन शेख (वय २७, चौघे रा. राजीव गांधीनगर, पिंपळे गुरव), इनकर सुंदर कांबळे (वय ३८, रा. आनंदनगर, चिंचवड), रोहित विद्यासागर पुटगे (वय २४, रा. वैदू वस्ती, पिंपळे गुरव), किरण दादाभाऊ सूर्यवंशी (वय २७, रा. आदर्शनगर, पिंपळे गुरव), मंगेश महादेव लोंढे (वय ३१, रा. पिंपळे सौदागर) अशी अटक केलेल्यांची नावे आहेत. याप्रकरणी दोन स्वंतत्र गुन्हे दाखल करण्यात आले आहेत.
पोलीस आयुक्त अमिताभ गुप्ता यांना शहरातील शिवाजीनगर व खडकी न्यायालयाच्या आवारात बनावट कागदपत्रांद्वारे गंभीर गुन्ह्यातील आरोपींना जामीन मिळवून देणारी टोळी सक्रीय असल्याचे समजले होते. त्यांनी ही माहिती गुन्हे शाखेच्या अधिकाऱ्यांना दिली. तसेच त्यांना कारवाई करण्याच्या सूचना केल्या होत्या. त्यानुसार, अप्पर पोलीस आयुक्त रामनाथ पोकळे यांच्या मार्गदर्शनाखाली सहाय्यक आयुक्त लक्ष्मण बोराटे व विनायक गायकवाड यांच्याकडून याची माहिती काढली जात होती.
दरम्यान, दोन्ही न्यायालयात वेगवेगळ्या पथकांमार्फत पाळत ठेवण्यात आली. त्यानुसार, उपनिरीक्षक संजय गायकवाड, खडके व त्यांच्या पथकाने शिवाजीनगर न्यायालयाच्या आवारातून ७ जणांना व खडकी न्यायालायाच्या आवारातून ३ जणांना ताब्यात घेतले. त्यांच्याकडून जामीन मिळवून देण्यासाठी लागणारी बनावट कागदपत्रे जप्त केली आहेत. त्यांच्याकडे चौकशी सुरू करण्यात आली असून, त्यांनी अनेकांना जामिन मिळवून दिला असल्याचे समोर आले आहे. त्यांच्याकडे अधिक चौकशी सुरू असल्याचे सांगण्यात आले.
.png "Videos"){kind=small}
