गेल्यावर्षीच्या तुलनेत पुण्यात यंदा रस्त्यांवर खड्डे कमी; महापौर मंजुषा नागपुरे यांचा दावा

पुण्यातील रस्त्यांवरील खड्डयांसंदर्भात महापौर नागपुरे यांनी गेल्यावर्षीच्या तुलनेत कमी खड्डे असल्याचा दावा केला आहे. तसेच पाऊस पडला की खड्डे पडतात असेही त्यांनी नमूद केले.

पुणे : शहरात गेल्यावर्षीच्या तुलनेत यंदा रस्त्यांवर खड्डे कमी असल्याचा दावा महापौर मंजुषा नागपुरे यांनी केला आहे. त्याचवेळी स्थायी समितीने खड्डयांसदर्भात प्रशासनाला अहवाल सादर करण्यास सांगितले आहे. दरवर्षीप्रमाणे यंदाही पावसाळ्यात रस्त्यांवर खड्डे पडल्याचे दिसत आहे. शहरातील रस्त्यांवरील खड्ड्यांचा प्रश्न दिवसेंदिवस गंभीर होत असताना महापालिकेत मात्र बैठका, पाहण्या आणि सूचना यांचेच सत्र सुरू असल्याचे चित्र आहे.

वाहनचालकांना जीव धोक्यात घालून खड्ड्यांतून मार्ग काढावा लागत असताना प्रत्यक्ष दुरुस्तीची गती अत्यंत मंद असल्याने महापालिका प्रशासनाच्या कार्यक्षमतेवर प्रश्नचिन्ह उपस्थित होऊ लागले आहे. राजकीय पदाधिकारी आणि प्रशासनाकडून सातत्याने आढावा बैठका घेतल्या जात असल्या, तरी रस्त्यांवरील परिस्थितीत अपेक्षित सुधारणा दिसून येत नसल्याने नागरिकांमध्ये तीव्र नाराजी व्यक्त केली जात आहे. पावसाळ्याच्या सुरुवातीपासूनच शहरातील प्रमुख आणि अंतर्गत रस्त्यांवर मोठ्या प्रमाणावर खड्डे पडले आहेत.

अनेक ठिकाणी डांबरी थर उखडल्याने वाहतुकीवर परिणाम होत असून, दुचाकीस्वारांच्या अपघातांचे प्रमाण वाढले आहे. मात्र, खड्डे बुजविण्याची मोहीम अपेक्षित वेगाने राबविण्यात प्रशासन अपयशी ठरत असल्याची टीका होत आहे.

दरम्यान, प्रत्यक्षात खड्ड्यांच्या समस्येवर केवळ चर्चा आणि निर्देश या पलीकडे ठोस कृती दिसत नसल्याने प्रशासनाच्या भूमिकेवर प्रश्न उपस्थित होत आहेत. अनेक रस्त्यांवर तात्पुरत्या स्वरूपात खडी किंवा कोल्डमिक्स टाकून खड्डे बुजवण्याचा प्रयत्न केला जात असला, तरी पुढील पावसात ते पुन्हा उखडत असल्याचे चित्र आहे.

दरम्यान, पुण्यातील रस्त्यांवरील खड्डयांसंदर्भात महापौर नागपुरे यांनी गेल्यावर्षीच्या तुलनेत कमी खड्डे असल्याचा दावा केला आहे. तसेच पाऊस पडला की खड्डे पडतात असेही त्यांनी नमूद केले. त्याचवेळी स्थायी समितीच्या बैठकीत खड्डयांवर चर्चा झाली. या चर्चेची माहिती समितीचे अध्यक्ष श्रीनाथ भिमाले यांनी दिली.

‘संबंधित अधिकाऱ्यांना रस्त्यांची प्रत्यक्ष पाहणी करून खड्ड्यांची स्थिती तपासण्याच्या सूचना दिल्या आहेत. पाच ते सहा झोनमधील अधिकारी अतिरिक्त आयुक्त ओमप्रकाश दिवटे यांच्याकडे अहवाल सादर करणार असून, ज्या ठिकाणी खड्डे आढळतील ते तातडीने बुजवण्याचे निर्देश देण्यात आले आहेत. रस्त्यांवरील खड्ड्यांची प्रत्यक्ष पाहणी करून त्यांच्या दुरुस्तीच्या कामाचा दर्जा तपासला जाईल. नागरिकांना त्रास होऊ नये, शहर सुस्थितीत दिसले पाहिजे आणि प्रशासनाने जबाबदारीने काम केले पाहिजे’, असे भिमाले म्हणाले.

निवासी डॉक्टरांच्या संपाचा ससूनच्या नियमित सेवांवर परिणाम; मोठ्या-लहान शस्त्रक्रिया घटल्या