बुधवार, 21 ऑक्टोबर 2026
गणेशोत्सवासाठी पुणे मेट्रो सज्ज (फोटो-सोशल मिडिया)
गणेशोत्सवात दर पाच मिनिटांनी मेट्रो
गर्दीच्या वेळेत फेऱ्या वाढवल्या जाणार
गर्दी नसलेल्या वेळेत दर दहा मिनिटांनी मेट्रो धावणार
Pune Metro: मेट्रोला मिळणारा वाढता प्रतिसाद आणि प्रवाशांची वाढती गर्दी लक्षात घेऊन महामेट्रोने गणेशोत्सवापासून गर्दीच्या वेळेत मेट्रोची वारंवारता वाढविण्याचे नियोजन केले आहे. त्यानुसार गर्दीच्या वेळेत दर पाच मिनिटांनी मेट्रो धावणार आहे. या नियोजनाची गेल्या तीन दिवसांपासून चाचणी सुरू असून, चाचण्या यशस्वी होत असल्याचे महामेट्राकडून सांगण्यात आले.
सध्या गर्दीच्या वेळेत दर सहा मिनिटांनी मेट्रो सेवा उपलब्ध आहे. गणेशोत्सवापासून ही वारंवारता पाच मिनिटांवर आणण्यात येणार आहे. तर, गर्दी नसलेल्या वेळेत दर दहा मिनिटांनी मेट्रो धावणार आहे. त्यामुळे गणेशोत्सवाच्या काळात मेट्रोने प्रवास करणाऱ्या नागरिकांना मोठा दिलासा मिळण्याची शक्यता आहे.
महामेट्रोकडे तीन डब्यांचे एकूण ३३ रेक असून, त्यापैकी सध्या ३० रेक नियमित सेवेत आहेत. पाच मिनिटांच्या अंतराने मेट्रो चालविण्यासाठी सर्व ३३ रेक सेवेत आणण्यात येणार आहेत. वनाझ-रामवाडी मार्गावर १७, तर पिंपरी-चिंचवड-स्वारगेट मार्गावर १६ रेक धावतील.
दोन्ही मार्गिकांवर सध्या दररोज सुमारे २.४० ते अडीच लाख प्रवासी मेट्रोचा वापर करीत आहेत. सध्या दररोज ५५४ फेऱ्यांद्वारे प्रवाशांना सेवा दिली जाते. वारंवारता पाच मिनिटांवर आणल्यानंतर फेऱ्यांची संख्या वाढणार असून, त्याचा थेट फायदा प्रवाशांना होणार आहे.
मेट्रोला प्रवाशांचा चांगला प्रतिसाद मिळत आहे. वाढती गर्दी लक्षात घेऊन गर्दीच्या वेळेत दर पाच मिनिटांनी सेवा देण्याचे नियोजन केले आहे. त्यासाठी चाचण्या सुरू आहेत.
— श्रावण हर्डीकर, व्यवस्थापकीय संचालक, महामेट्रो
मेट्रो सेवेतील बदल :
बाब. माहिती
महामेट्रोकडे एकूण रेक. ३३
सध्या नियमित सेवेत. ३०
वनाझ-रामवाडी मार्गावरील रेक. १७
पिंपरी-चिंचवड-स्वारगेट मार्गावरील रेक. १६
दैनंदिन सरासरी प्रवासीसंख्या. सुमारे २.४० लाख
सध्याची गर्दीच्या वेळेतील वारंवारता. ६ मिनिटे
गणेशोत्सवापासून प्रस्तावित वारंवारता. ५ मिनिटे
विना गर्दीच्या वेळेतील वारंवारता. १० मिनिटे
पुणे शहरातील वाहतूक कोंडी सोडवण्यासाठी आणि दळणवळण अधिक गतिमान करण्यासाठी महत्त्वाकांक्षी ठरणाऱ्या हिंजवडी ते शिवाजीनगर मेट्रो लाईन ३ चे काम वेगाने सुरु आहे. या कामाची पाहणी शिवाजीनगर विधानसभा मतदारसंघाचे आमदार सिद्धार्थ शिरोळे यांनी केली.
