Pune: दहीहंडीच्या मंचावर अश्लील हावभाव; पोलिसांचा दणका! ८ डान्सर्ससह पुण्यातील आयोजकांवरही कारवाई

दहीहंडीच्या जल्लोषात काही मंचांवर मर्यादा ओलांडल्याचा आरोप झाला आणि त्यावरून मोठा वाद पेटला. आता याच प्रकरणात पोलिसांनी घेतलेल्या कठोर भूमिकेमुळे नृत्यांगनांसह पुण्यातील आयोजकांच्याही अडचणी वाढल्या आहेत.

• निशा मुंबईकर आणि शुभांगी थोरात यांच्यासह आठ नृत्यांगनांवर कारवाई
• अश्लील कार्यक्रमांना परवानगी दिल्याच्या आरोपावरून मंडळांच्या पदाधिकाऱ्यांवरही गुन्हा
• दहीहंडी उत्सवादरम्यान आक्षेपार्ह नृत्य आणि नियमभंग केल्याच्या आरोपांची पोलिसांकडून चौकशी

पुणे: दहीहंडी उत्सवादरम्यान अश्लील गाण्यांवर नृत्य आणि अश्लील हावभाव केल्याच्या आरोपावरून पुणे पोलिसांनी कारवाईचा बडगा उगारला आहे. प्रसिद्ध नृत्यांगना निशा मुंबईकर आणि शुभांगी थोरात यांच्यासह आठ नृत्यांगनां विरुद्ध सहकारनगर पोलीस ठाण्यात गुन्हा दाखल करण्यात आला आहे. या प्रकरणात संबंधित दहीहंडी मंडळांचे अध्यक्ष आणि पदाधिकाऱ्यांनाही सहआरोपी करण्यात आले आहे. दहीहंडी उत्सवादरम्यान पुण्यासह मुंबई आणि नवी मुंबईतील काही ठिकाणी सांस्कृतिक कार्यक्रमांच्या नावाखाली नृत्याचे कार्यक्रम आयोजित करण्यात आले होते. या कार्यक्रमांमध्ये अश्लील गाणी, घृणास्पत हावभाव आणि आक्षेपार्ह नृत्यप्रकार सादर केल्याचे आरोप झाल्यानंतर त्यावरून मोठा वाद निर्माण झाला होता.

राधा पाटीलनंतर इतर डान्सर्सवरही कारवाई

पुण्यातील दहीहंडी कार्यक्रमातील नृत्यप्रकारावरून यापूर्वी प्रसिद्ध नृत्यांगना राधा पाटील हिच्यावरही पोलिसांनी कारवाई केली होती. त्यानंतर आता सहकारनगर पोलिसांनी इतर नृत्यांगनां विरुद्धही गुन्हा दाखल केला आहे. निशा मुंबईकर आणि शुभांगी थोरात यांच्यासह आठ नृत्यांगनांचा या कारवाईत समावेश आहे.

हेही वाचा: पुणे: बटन दाबताच नंबर प्लेट गायब; चालकावर आरटीओची कारवाई, ५१ ओव्हरस्पीडिंगच्या चलनांचा धक्कादायक खुलासा

मंडळांचे अध्यक्ष, पदाधिकारीही सहआरोपी

पोलिसांनी केवळ नृत्यांगनांवर कारवाई न करता संबंधित कार्यक्रमांचे आयोजक आणि मंडळांच्या पदाधिकाऱ्यांवरही कारवाई केली आहे. कार्यक्रमासाठी परवानगी घेण्यात आली होती का, परवानगीतील अटींचे पालन झाले का, तसेच अश्लील गाणी आणि आक्षेपार्ह नृत्यप्रकारांना आयोजकांची संमती होती का, याचा तपास पोलिसांकडून करण्यात येत आहे.

नियमभंगाचीही चौकशी

अश्लील गाणी वाजवणे, कार्यक्रमाच्या ठिकाणी सुरक्षा नियमांचे उल्लंघन करणे तसेच विनापरवाना किंवा परवानगीतील अटींचा भंग करून कार्यक्रम आयोजित करणे, या विविध बाबींच्या अनुषंगाने पोलिसांकडून तपास सुरू आहे. दहीहंडी आणि गणेशोत्सवासारख्या सार्वजनिक उत्सवांमध्ये सांस्कृतिक कार्यक्रमांच्या नावाखाली आक्षेपार्ह प्रकार होऊ नयेत, यासाठी पोलिसांनी कठोर भूमिका घेतल्याचे या कारवाईतून दिसून येत आहे. या प्रकरणातील पुढील तपासाकडे आता लक्ष लागले आहे.