धनंजय मुंडेंना ब्लॅकमेल करणाऱ्या रेणू शर्माला अटक, धमकी देत ५ कोटींच्या खंडणीची मागणी

मुंबई गुन्हे शाखेने (Mumbai Crime Branch) इंदौर पोलिसांसह संयुक्त कारवाई करत धनंजय मुंडेंना धमकावणाऱ्या रेणू शर्माला (Renu Sharma Arrest) अटक केली आहे.

मुंबई: सामाजिक न्यायमंत्री धनंजय मुंडे (Dhananjay Munde) यांनी महिलेविरुद्ध पोलिसांत खंडणीची तक्रार दाखल केली आहे. याप्रकरणी मुंबई गुन्हे शाखेने (Mumbai Crime Branch) इंदोर पोलिसांसह संयुक्त कारवाई करत तिला अटक केली आहे. (Blackmailing Case) तसेच, ही महिला परिचयाचीच असून महिलेनं ५ कोटी रुपयांची खंडणी मागितल्याचं धनंजय मुंडे यांनी तक्रारीत म्हटलं आहे. दरम्यान, मुंबईच्या मलबार हिल पोलीस ठाण्यात महिलेविरुद्ध गुन्हा दाखल करण्यात आला होता.

[read_also content=”मनी लाँड्रिंग प्रकरणी नवाब मलिकांच्या दोन्ही मुलांना समन्स, ईडी करणार चार्जशीट दाखल https://www.navarashtra.com/maharashtra/ed-summons-to-nawab-maliks-sons-for-inquiry-nrsr-271566.html”]

‘मागील वर्षी सहजच एक कागद पोलिसांत दिला तर तुमचं मंत्री पद धोक्यात आलं होतं, आता पुन्हा तिच माझ्यावर बलात्कार झाला असल्याची तक्रार करून सोशल मीडियावरून बदनामी करून तुमचं मंत्रीपद घालवीन, असं होऊ द्यायचं नसेल तर मला ५ कोटी रक्कम आणि ५ कोटींचे दुकान घेऊन द्या’, असं ब्लॅकमेल करत अशा प्रकारची खंडणी सामाजिक न्याय मंत्री धनंजय मुंडे यांच्याकडे कथित रेणू शर्मा नामक महिलेनं केली आहे. याप्रकरणी धनंजय मुंडे यांनी मुंबई क्राईम ब्रँचमध्ये धाव घेत सदर महिलेविरुद्ध खंडणी मागितल्याची तसेच ब्लॅकमेल करत असल्याची पुराव्यांसह तक्रार दिली आहे.

रेणू शर्मा या महिलेनं मागील वर्षी जानेवारी महिन्यात धनंजय मुंडे यांच्या विरोधात बलात्कार केल्याचा आरोप करत खळबळ माजवली होती. त्यानंतर काही दिवसांतच तिनं ही तक्रार मागे घेतली होती. तेव्हापासून रेणू शर्मा ही परदेशातील नंबर वापरून मेसेज तसेच फोन करून पैशांची मागणी करत होती. यासंदर्भातील सर्व पुरावे धनंजय मुंडे यांनी पोलिसांत दिले असल्याचंही त्यांनी आपल्या तक्रारीत म्हटलं आहे.

रेणू शर्मा ही महिला मूळ इंदोर मध्य प्रदेशातील असून ती करुणा शर्माची बहीण आहे. धनंजय मुंडे यांच्या तक्रारीनंतर मुंबई क्राईम ब्रांच आणि इंदोर पोलिसांनी संयुक्त कारवाई करत तिला अटक करून आधी इंदोर कोर्टात हजर केलं, इंदोर कोर्टानं तिचा ताबा दिला आणि त्यानंतर आज सदर महिलेला पुढील चौकशीसाठी मुंबई पोलिसांच्या ताब्यात देण्यात आलं आहे. दरम्यान,  रेणू शर्मावर इतर अनेक व्यक्तींनीही ब्लॅकमेलिंग संदर्भातील तक्रारी यापूर्वी विविध पोलीस ठाण्यात दाखल केल्या आहेत.