शुक्रवार, 23 ऑक्टोबर 2026
मराठा आरक्षणासाठी सातारा बंदची हाक
सातारा : मराठा आरक्षणाच्या मागणीसाठी सुरू असलेल्या आंदोलनाला पाठिंबा देण्यासाठी साताऱ्यातही आंदोलनाची दिशा ठरवण्यात आली आहे. राजधानी मराठा क्रांती मोर्चाने सोमवारी, ७ सप्टेंबर रोजी सातारा शहर बंद ठेवण्याचे आवाहन केले आहे. शहरातील व्यापारी, दुकानदार, व्यावसायिक, सामाजिक संघटना आणि मराठा समाजबांधवांनी या बंदमध्ये सहभागी व्हावे, असे मोर्चाच्या पदाधिकाऱ्यांनी सांगितले.
बंदच्या पार्श्वभूमीवर राजधानी मराठा क्रांती मोर्चाचे पदाधिकारी आणि कार्यकर्ते शुक्रवारी पोवईनाका येथील शिवतीर्थावर जमले. यावेळी छत्रपती शिवाजी महाराजांच्या पुतळ्यास पुष्पहार अर्पण करून मराठा आरक्षणाच्या मागणीला पाठिंबा व्यक्त करण्यात आला.
कार्यकर्त्यांनी यावेळी घोषणाबाजी करत आरक्षणाच्या मागणीसाठी सरकारचे लक्ष वेधण्याचा प्रयत्न केला. मोठ्या संख्येने कार्यकर्ते उपस्थित राहिल्याने काही काळ परिसरात आंदोलनाचे वातावरण निर्माण झाले होते.
Satara News : गणेशोत्सव शांततेत साजरा करा; DJ-डॉल्बीला पोलिसांचा नकार
मराठा आरक्षणाचा प्रश्न मार्गी लावण्यासाठी शासनाचे लक्ष वेधणे हा सातारा बंद मागचा प्रमुख उद्देश असल्याचे मोर्चाच्या वतीने सांगण्यात आले. मनोज जरांगे यांच्या आंदोलनाला साताऱ्यातून पाठिंबा देण्यासाठी विविध घटकांनी बंदमध्ये सहभागी व्हावे, असे आवाहन करण्यात आले आहे.
दरम्यान, सातारा शहरातील व्यापारी आणि व्यावसायिक या आवाहनाला कितपत प्रतिसाद देतात, याकडे आता लक्ष लागले आहे. बंदच्या पार्श्वभूमीवर शहरातील जनजीवनावर त्याचा काय परिणाम होतो, हेही सोमवारी स्पष्ट होणार आहे.
मराठा आरक्षणाचा मुद्दा पुन्हा एकदा राज्याच्या राजकीय आणि सामाजिक चर्चेच्या केंद्रस्थानी आला असताना साताऱ्यातील या बंदच्या माध्यमातून सरकारचे लक्ष वेधण्याचा प्रयत्न केला जात आहे.
