बाळशास्त्री जांभेकर पत्रकार भवन इमारतीवर उभारले सोलर पॅनल, वीज बिलापासून मुक्ती

पत्रकार भवन इमारतीवर सोलर पॅनल बसवण्यात आले आहे. त्यासाठी ४७ लाखांचा निधी उपलब्ध करून देण्यात आला. यासंदर्भात जिल्हा पत्रकार संघाचे जिल्हाध्यक्ष उमेश तोरस्कर यांनी माहिती दिली आहे.

सिंधुदुर्ग : सिंधुदुर्ग जिल्हा मराठी पत्रकार संघाच्या बाळशास्त्री जांभेकर स्मारक इमारतीच्या छतावर पर्यावरण पूरक सोलर पॅनल बसविण्यात आले आहे. त्यासाठी जिल्हा नियोजन समितीमधून २० लाख २८ हजार ६१५ रुपये सोलर पॅनल बसविण्यासाठी निधी उपलब्ध करुन देण्यात आला. सोलर पॅनल, टॉवर एसी आणि कॅन्टींगसाठी सातत्याने जिल्हा पत्रकार संघाने पाठपुरावा केल्याने एकूण ४७ लाखांचा निधी उपलब्ध झाला आहे. आता पत्रकारांनी पर्यावरणाचा संदेश देत सोलर पॅनल बसवत एक समाजासमोर आदर्श निर्माण केला आहे. त्यामुळे पत्रकार भवनातील या सोलर पॅनलमुळे वीज बिल मुक्ती मिळून व्यवस्थापन खर्च कमी होईल, अशी माहिती जिल्हा पत्रकार संघाचे जिल्हाध्यक्ष उमेश तोरस्कर यांनी दिली.

[read_also content=”विनोद तावडेंची भाजपमध्ये ‘पॉवर’ वाढणार; चंद्रकांत पाटील यांचे महत्त्वपूर्ण विधान https://www.navarashtra.com/maharashtra/will-bjp-maharashtra-leader-vinod-tawde-be-next-national-president-of-bjp-chandrakant-patil-important-statement-nrpm-546045.html”]

पत्रकार दिनाच्या कार्यक्रमात पालकमंत्री रवींद्र चव्हाण यांनी बाळशास्त्री जांभेकर पत्रकार भावनामध्ये होणारा खर्च कमी करण्यासाठी सरकारच्या माध्यमातून प्रयत्न केला जाईल, त्याचबरोबर उर्वरित कामाला प्राधान्याने निधी उपलब्ध करु, असे आश्वासन दिले होते. त्यानुसार तातडीने जिल्हा नियोजनाच्या माध्यमातून बाळशास्त्री जांभेकर भवनांच्या इमारतीवर सोलर पॅनल यंत्रणा उभारण्यात आली आहे. त्यासाठी जिल्हा नियोजनमधून या इमारतीमध्ये कॅन्टीन उभारण्यासाठी १८ लाखाचा निधी देखील समितीमधून देण्यात आला असून लवकरच कार्यारंभ आदेश मिळणार आहे. या सभागृहांमध्ये पत्रकार सभासदांच्या सूचना आल्यानंतर तातडीने टॉवर एसी मागणी जिल्हा पत्रकार संघाने जिल्हाधिकाऱ्यांकडे केली होती. त्याची दखल घेऊन तातडीने ६ टॉवर एसी मंजूर करण्यात आले असून त्यासाठी ९ लाख ४० हजार ९१८ रुपये निधी जिल्हा नियोजनामधून देण्यात आला आहे.

सिंधुदुर्ग जिल्हा पत्रकार संघाने सोलर पॅनल, टॉवर एसी आणि कॅन्टींगसाठी सातत्याने पाठपुरावा पालकमंत्री रविंद्र चव्हाण, खासदार नारायण राणे, आमदार वैभव नाईक ,आमदार नितेश राणे आणि जिल्हाधिकारी किशोर तावडे यांच्याकडे केला होता. त्यामुळे तब्बल ४७ लाखांचा निधी मंजूर झाला असून कामे पूर्णत्वास जात आहेत. जिल्हा नियोजन अधिकारी श्री. बुधावळे, श्री. पवार आणि बांधकाम कार्यकारी अभियंता सर्वगोड यांचेही चांगले सहकार्य मिळाले. जिल्हा नियोजनामधून एवढ्या मोठ्या प्रमाणात निधी उपलब्ध करून दिल्याबद्दल पालकमंत्री रविंद्र चव्हाण, खासदार नारायण राणे, शिक्षण मंत्री दीपक केसरकर, माजी खासदार विनायक राऊत, आमदार वैभव नाईक, आमदार नितेश राणे, जिल्हाधिकारी किशोर तावडे यांचे जिल्हा पत्रकार संघाच्या वतीने जिल्हाध्यक्ष उमेश तोरस्कर यांनी आभार मानले.