सध्या सतीश राजवाडे हे स्टार प्रवाहचे प्रोग्रामिंग हेड आहेत. मात्र मालिकांच्या जबाबदारीतून काहीसा वेळ काढत सतीश राजवाडे ‘पुढच्या शुक्रवारी सात वाजता’ या नाटकातून पुन्हा एकदा रंगभूमीवर कमबॅक करताना दिसत आहेत. या नाटकाचं लेखन सुदीप मोडक तर दिग्दर्शन नीरज शिरवईकर यांचं आहे. या नाटकाची निर्मिती अजित भुरे यांनी केली आहे. नाटकात सतीश राजवाडे, चैत्राली गुप्ते, सुदीप मोडक यांच्या प्रमुख भूमिका आहेत. त्यामुळे तरुणांचा लाडका दिग्दर्शक आता सध्या नाटक करतोय असं म्हटलं तर ते वावगं ठरणार नाही.
नाटकातील व्यक्तिरेखेबाबात माध्यमांशी बोलताना राजवाडे म्हणाले की, परफेक्ट मर्डर मधल्या त्यांनी साकारलेल्या इन्स्पेक्टर घारगे या भूमिकेच प्रेक्षकांची भरभरुन कौतुक केलं. त्यानंतर आता पुन्हा एकदा नवं नाटकं नवी भुमिका साकारणार आहे. परफेक्ट मर्डरमधल्या भूमिकेपेक्षा ही भूमिका अत्यंत वेगळी आहे आणि प्रेक्षकांना ती नक्कीच आवडेल अशी आशा आहे. राजवाडे पुढे असं देखील म्हणाले की, नाटक करायचं होतंच पण पाहिजे तशा भुमिका चालून येत नव्हत्या.
ज्याही नाटकाच्या ऑफर आल्या त्याच्या संहिता फारशा पटल्या नाहीत. खूप दिवसांनी पुन्हा एकदा नीरज शिरवईकर यांनी नाटकाची संहिता पाठवली आणि ती आवडली देखील. तेव्हा ठरवलं की, पुन्हा रंगभूमी या नाटकातून गाजवायची. एप्रिलच्या येत्या शेवटच्या आठवड्यात ‘पुढच्या शुक्रवारी सात वाजता’ हे नाटक रंगभूमीवर येत असल्याचं कळतंय. त्यामुळे आता हा मराठी सिनेमा बॉक्सऑफिसवर गाजवाणारा दिग्दर्शक कोणत्या नव्या भूमिकेत दिसणार आहे, याबाबत प्रेक्षकांमध्ये कमालीची उत्सुकता पाहायला मिळत आहे.
.png "Videos"){kind=small}
