(फोटो सौजन्य- इन्स्टाग्राम)
”बाई अडलीये… म्हणूनच ती नडलीये” अशा प्रभावी टॅगलाईनसह मराठी अभिनेत्री रिंकू राजगुरूचा नवा चित्रपट ‘आशा’ प्रेक्षकांच्या भेटीस येणार आहे. चित्रपटाचा टीझर नुकताच प्रदर्शित झाला होता, ज्याला चाहत्यांचा चांगला प्रतिसाद मिळाला आहे. प्रदर्शनाआधीच या चित्रपटाने आपली ताकद सिद्ध करून दाखवली आहे. आणि ६१ व्या महाराष्ट्र राज्य मराठी चित्रपट पुरस्कार सोहळ्यात तब्बल चार पुरस्कार मिळवत ‘आशा’ने समीक्षकांची दाद मिळवली आहे. त्यामुळे या चित्रपटाबद्दलची उत्सुकता आणखीनच वाढली आहे.
महाराष्ट्राचे हास्यसम्राट काळाच्या पडद्याआड! ‘मिर्झा एक्सप्रेस’ फेम मिर्झा रफी अहमद बेग यांचे निधन
‘चालत रहा पुढं… चालत रहा पुढं… ‘ अशी अस्मितेने भरलेली हाक देत ‘आशा’ चित्रपटाचे प्रेरणादायी गाणं देखील नुकतेच प्रदर्शित झाले आहे. प्रेक्षकांच्या मनाला भिडताना दिसत आहे. गीतकार वलय मुळगुंद यांनी लिहिलेल्या शब्दांना संगीतकार आशिष झा यांनी प्रभावी संगीत दिले असून गायिका प्राची केळकर यांच्या दमदार आवाजाने हे गाणे अधिकच सशक्त झाले आहे. या गाण्यात संघर्षाची ठिणगी, आशेची ज्योत आणि प्रत्येक पावलागणिक उलगडणाऱ्या प्रकाशाची नवी चाहूल जाणवते. मनाला उभारी देणारे हे ॲंथम साँग केवळ ‘आशा’ सेविकेचे नसून त्या प्रत्येक स्त्रीचे आहे, जिचा अंतरंगात दडलेल्या उजेडावर विश्वास आहे.
या गाण्याबद्दल दिग्दर्शक दिपक पाटील म्हणतात, ” ‘आशा’मधील हे गाणं म्हणजे प्रत्येक स्त्रीची कहाणी आहे. ही केवळ आशा सेविकांची गोष्ट नाही, तर कुटुंबासाठी झगडणाऱ्या, स्वप्नांसाठी लढणाऱ्या आणि कोणत्याही संकटात न डगमगणाऱ्या प्रत्येक बाईची प्रेरक धडाडी आहे. या गाण्यातून आम्ही तिच्या ताकदीला आणि तिच्या अविरत प्रवासाला सलाम केला आहे.”
डबल मर्डर आणि संशयाच्या भोवऱ्यात अडकलेली गृहिणी, OTT वर गाजणार राधिका आपटेची ‘साली मोहब्बत’
‘आशा’मध्ये महिलांची झगडणारी दुनिया आणि समाजाप्रती असलेली त्यांची अमर्याद जबाबदारी अत्यंत प्रभावीपणे मांडली आहे. या चित्रपटात प्रमुख भूमिकेत रिंकू राजगुरू, सायंकित कामत, उषा नाईक, शुभांगी भुजबळ, सुहास शिरसाट, दिशा दानडे, दिलीप घारे आणि हर्षा गुप्ते यांच्या प्रमुख भूमिका प्रेक्षकांना पाहायला मिळणार आहे.
दिपक पाटील दिग्दर्शित ‘आशा’चे कुमार मंगत पाठक, अभिषेक पाठक, निलेश कुवर, दैवता पाटील आणि दिपक पाटील निर्माते आहेत. तर मुरलीधर छतवानी आणि रवींद्र औटी सहनिर्माते आहेत. पॅनोरमा स्टुडिओजच्या माध्यमातून सर्वत्र प्रदर्शित होणारा हा चित्रपट येत्या १९ डिसेंबर रोजी प्रेक्षकांच्या भेटीला येणार आहे.
