भारताच्या सांस्कृतिक विविधतेला साजेसं संगीत सादर करत कोक स्टुडिओ भारतच्या तिसऱ्या सिझनमध्ये आता चौथं गाणं ‘इश्क बावला’ सादर करण्यात आलं आहे. याआधी ‘होली आयी रे’, ‘होलो लोलो’ आणि ‘पंजाब वेख के’ यांसारख्या गाण्यांनी रसिकांची मनं जिंकली. ‘इश्क बावला’ हे गाणं हरियाणवी रॅपर धांडा न्योलीवाला यांनी लिहिलं, संगीतबद्ध केलं आणि गायलं असून, त्यांच्यासोबत क्षवीर ग्रेवाल यांचा मधुर आवाज आहे.
हे गाणं केवळ प्रेमभंगावर आधारित नाही, तर प्रेम, आत्मनिरीक्षण आणि स्व-ओळख यांचा समृद्ध भावनिक प्रवास मांडतं. हरियाणातील जुन्या लोककथांपासून प्रेरणा घेत, हे गाणं प्रेमाच्या गुंतागुंतीच्या वाटा आणि पुनरुज्जीवनाच्या क्षमतेचा विचार मांडतं. पारंपरिक वाद्यं डेरू, बुगचू आणि घडा यांचा समावेश करून त्याला आधुनिक रॅप बीट्ससोबत एकत्रित केलं गेलं आहे, ज्यामुळे गाणं परंपरा आणि आधुनिकतेचं अनोखं मिश्रण होतं.
धांडा न्योलीवाला हे केवळ रॅपर नाही, तर हरियाणवी संस्कृतीचा आधुनिक चेहरा आहेत. त्यांच्या ओळींतून प्रांजळ भावना आणि स्थानिक ओळख झळकते. त्यांच्याबरोबर क्षवीर ग्रेवाल यांनी गाण्यात भावनिक खोली निर्माण केली असून, दोघांमध्ये उत्कृष्ट सर्जनशील समन्वय दिसतो. कोका-कोला इंडियाचे आयएमएक्स लीड शंतनू गांगणे यांनी सांगितलं की, “कोक स्टुडिओ भारत हे भारताच्या सांस्कृतिक वैभवाला जागतिक स्तरावर पोहचवण्याचं महत्त्वाचं माध्यम आहे. धांडा न्योलीवाला व क्षवीर ग्रेवालसारख्या कलाकारांनी आपली प्रांतीय ओळख सांभाळत ती नव्या पिढीसमोर वेगळ्या शैलीत मांडली आहे.”
धांडा न्योलीवाला यांनी आपली प्रतिक्रिया देताना सांगितलं की, “हे केवळ एक गाणं नाही, तर माझ्या माणसांचं आणि संस्कृतीचं प्रतिनिधित्व आहे.” तर क्षवीर म्हणाले, “या गाण्याच्या प्रवासात मी एक अंतर्मुखता अनुभवली आहे, जी आजच्या तरुणांना स्वतःला समजून घेण्यासाठी प्रेरित करते.” ‘इश्क बावला’ हे गाणं आधुनिक आणि पारंपरिक संगीताची सुंदर सांगड घालणाऱ्या कोक स्टुडिओ भारतच्या प्रवासात एक महत्त्वपूर्ण पाऊल आहे. हे गाणं केवळ ऐकण्यास सुंदर नसून, अनुभवण्यासही सखोल आहे.
.png "Videos"){kind=small}
