NCP Politics: अजित पवारांचे फोटो बॅनर्सवरून गायब! बॅनर वॉरमुळे राष्ट्रवादीत नव्या वादाची ठिणगी
Ajit Pawar Photo Missing from party banner: दिवंगत उपमुख्यमंत्री अजित पवार यांच्या निधनानंतर त्यांच्याच पक्षातील काही नेत्यांवर पक्ष हायजॅक करण्याचे सातत्याने आरोप होत आहेत. या आरोपांमुळे राष्ट्रवादी काँग्रेसच्या दोन्ही गटांमध्ये संघर्ष सुरू आहे. अशातच रायगडमधील एका कार्यक्रमातील बॅनर चर्चेत आले आहे. रायगडमध्ये राष्ट्रवादी काँग्रेसच्या जिल्हा परिषद आणि पंचायत समितीच्या निवडणुकीतील विजयी उमेदवारांचा सत्कार सोहळ्याचा कार्यक्रम पार पडला. पण या कार्यक्रमातील बॅनर्सवर उपमुख्यमंत्री आणि पक्षाच्या राष्ट्रीय अध्यक्षा सुनेत्रा पवार आणि ज्येष्ठ नेते अजित पवार यांचे फोटोच लावण्यात आले नाहीत. या मुद्द्यावर पक्षाचे नेते अमोल मिटकरी आणि शरद पवार यांच्या राष्ट्रवादीचे आमदार रोहित पवार यांनी भाष्य केलं आहे.
मिळालेल्या माहितीनुसार, या सत्कार सोहळ्याला अजित पवार यांच्या राष्ट्रवादीचे प्रदेशाध्यक्ष सुनील तटकरे, त्यांच्या कन्या आणि मंत्री आदिती तटकरे, पुत्र अनिकेत तटकरे हेदेखील उपस्थित होते. पण या कार्यक्रमातील बॅनर्सवर अजित पवार आणि सुनेत्रा पवार यांचे मात्र फोटो गायब असल्याचे दिसून आले. यावरून राजकीय वर्तुळात नव्या वादाची ठिणगी पडली आहे.
राज्यातील शाळांसाठी ‘या’ तारखेपासून उन्हाळ्याची सुट्टी जाहीर; 15 जूनला पुन्हा शाळा सुरू होणार
यामुद्द्यावरून आमदार रोहित पवार यांनी या कार्यक्रमाचा फोटो ट्विटर एक्सवर पोस्ट करत तटकरेंवर थेट हल्लाबोल केला आहे. ” मालकाला अलगद बाजूला सारून जेव्हा बटाईदारच जमिनीचा ७/१२ स्वत:च्या नावे करतो, याचं हे जिवंत उदाहरण… जे आम्ही वारंवार बोलत आहोत.”
दुसरीकडे आमदार अमोल मिटकरी यांनी देखील ट्विटर एक्सवर पोस्ट करत तटकरेंवर अप्रत्यक्ष टिका केली आहे. “ज्यांच्या नेतृत्वावर कार्यकर्त्यांचा विश्वास आहे, त्यांचाच फोटो हटवला जातोय, हे राष्ट्रवादीचा सर्वसामान्य कार्यकर्ता कधीही सहन करणार नाही.राष्ट्रवादीच्या दैवतांना डावलून स्वत:देव बनण्याचा कुणी प्रयत्न करू नये. महाराष्ट्र हे सहन करणार नाही.”
दरम्यान, अजित पवार यांच्या निधनानंतर राष्ट्रवादी काँग्रेस पक्षावर ताबा मिळवण्यासाठी सुनील तटकरे प्रयत्न करत असल्याचा आरोप रोहित पवारांकडून सातत्याने केला जात आहे. याशिवाय दोन्ही राष्ट्रवादी काँग्रेसच्या विलीनीकरणाच्या आणि राष्ट्रीय अध्यक्षपदाच्या निवडीच्या मुद्द्यावरून सुनील तटकरे हे राष्ट्रवाीच्या कार्यकर्ते आणि पदाधिकाऱ्यांच्या निशाण्यावर आले होते. त्यातच राष्ट्रवादीच्या बॅनरवरून अजित पवारांचा फोटो गायब झाल्याने तटकर पुन्हा एकदा निशाण्यावर आले आहे.
“राष्ट्रवादीच्या दैवताना डावलून स्वतःच देव बनण्याचा…”, नाव न घेता अमोल मिटकरींचा कोणाला इशारा?
अदिती तटकरे यांची प्रतिक्रिया
दरम्यान या संपूर्ण प्रकरणावर अदिती तटकरे यांनी दिलगीरी व्यक्त केली आहे. मंत्री अदिती तटकरे यांनी फेसबुवर पोस्ट शेअर करतृ आपली भूमिका मांडली आहे.”स्थानिक पातळीवर पक्षाच्या कार्यकर्त्यांकडून कार्यक्रम घेतले जातात, असे अनेक कार्यक्रम दिवसभरात होत असतात. अशाच एका ग्रामपंचायत पातळीवरील कार्यक्रमात राष्ट्रवादी काँग्रेस पक्षाचे दिवंगत नेते अजितदादा पवार आणि राष्ट्रीय अध्यक्षा तथा राज्याच्या उपमुख्यमंत्री सुनेत्राकाकी यांचा फोटो नव्हता, याबद्दल मी दिलगिरी व्यक्त करते.
अजितदादा असतील, सुनेत्राकाकी असतील यांचं आमच्या मनातील स्थान अढळ आहे. बॅनरवरील फोटोतून आम्हा सगळ्याच कार्यकर्त्यांची निष्ठा ठरवू नये.
तरी, यानिमित्ताने एक बरे झाले- स्थानिक कार्यक्रमातील स्थानिक पातळीवर घडलेल्या एका चुकीचा मुद्दा बनवणारी यंत्रणा कशी काम करते हे आमच्या लक्षात आले. हा मुद्दा चवीने चघळणाऱ्यांना दादा हयात असताना त्यांच्यावर केलेल्या टीकेबद्दल मनातून किती पश्चाताप व्यक्त करावा लागत असेल देव जाणे..! बाकी काकींना पक्षाच्या कुटुंबप्रमुख म्हणून आमच्या चुकीबद्दल आमचे कान पकडण्याचा अधिकार आहेच.
धन्यवाद!”
