अजित पवारांच्या राष्ट्रवादी काँग्रेसमध्ये वर्चस्वाची लढाई; निम्मे आमदार सुनेत्रा पवारांच्या बाजूने

प्रफुल्ल पटेल, सुनील तटकरे आणि धनंजय मुंडे यांची नावे न घेता रोहित यांनी हे सर्व नेते सुनेत्रांच्या पक्षावर ताबा मिळवू पाहत असल्याचा आरोप केला. यापैकी एका नेत्याला केंद्रात मंत्री, तर दुसऱ्याला महायुती सरकारमध्ये अर्थमंत्री होण्याची इच्छा आहे, असे ते म्हणाले.

• राष्ट्रवादी काँग्रेसमध्ये अंतर्गत मतभेदांची चर्चा
• सुनेत्रा पवार यांच्या नेतृत्वावरून पक्षात खलबत
• जवळपास निम्म्या आमदारांचा सुनेत्रा पवारांना पाठिंबा असल्याची चर्चा
• ज्येष्ठ नेत्यांची नाराजी दूर करण्याचे आव्हान

मुंबई : गेल्या काही दिवसांपासून राज्यातील राजकारणात विविध घडामोडी घडत आहेत. राष्ट्रवादी काँग्रेसच्या सुनेत्रा पवार गटात नेतृत्वावरून आणि पक्षाच्या भवितव्यावरून अंतर्गत संघर्ष तीव्र झाला आहे. माजी उपमुख्यमंत्री अजित पवार यांच्या निधनानंतर पक्षाची धुरा सांभाळणाऱ्या उपमुख्यमंत्री सुनेत्रा पवार यांच्यासमोर ज्येष्ठ नेत्यांची नाराजी दूर करण्यासोबतच संघटनेवरील नियंत्रण कायम ठेवण्याचे आव्हान उभे राहिले आहे. पक्षातील अंतर्गत मतभेदांदरम्यान जवळपास निम्म्या आमदारांचा पाठिंबा सुनेत्रा पवार यांना असल्याची चर्चा आहे. त्यामुळे नेतृत्वबदल पक्षातील आणि वर्चस्वाच्या लढाईबाबतच्या चर्चाना नवे वळण मिळाले आहे.

राष्ट्रवादीचे ज्येष्ठ नेते प्रफुल्ल पटेल, प्रदेशाध्यक्ष सुनील तटकरे, छगन भुजबळ, धनंजय मुंडे, हसन मुश्रीफ आणि दिलीप वळसे-पाटील यांनी दिल्लीत केंद्रीय गृहमंत्री अमित शाह यांची भेट घेतली. या भेटीवेळी सुनेत्रा पवार आणि त्यांचे पुत्र पार्थ पवार अनुपस्थित असल्याने राजकीय चर्चांना उधाण आले. सूत्रांच्या माहितीनुसार, ज्येष्ठ नेत्यांनी पक्षाचे सध्याचे कामकाज, नेतृत्वशैली आणि संघटनात्मक व्यवस्थेबाबत नाराजी व्यक्त केली.

राष्ट्रवादीवर ताबा मिळवण्याचा पटेल, मुंडे, तटकरेंचा प्रयत्न

प्रफुल्ल पटेल, सुनील तटकरे आणि धनंजय मुंडे यांची नावे न घेता रोहित यांनी हे सर्व नेते सुनेत्रांच्या पक्षावर ताबा मिळवू पाहत असल्याचा आरोप केला. यापैकी एका नेत्याला केंद्रात मंत्री, तर दुसऱ्याला महायुती सरकारमध्ये अर्थमंत्री होण्याची इच्छा आहे, असे ते म्हणाले. सुनेत्रा यांना सामाजिक क्षेत्राचा अनुभव असला, तरी राजकारणातील मर्यादित अनुभवाचा फायदा पक्षातील अन्य नेते घेत आहेत. त्यामुळे त्यांना बाजूला करण्याचे प्रयत्न सुरू असल्याचा दावाही रोहित यांनी केला.

अजितदादांप्रमाणे सुनेत्राताईंचीही कोंडी करण्याचा प्रयत्न

उपमुख्यमंत्री सुनेत्रा पवार यांच्या पक्षातील नेत्यांमधील अंतर्गत मतभेदांवरून राष्ट्रवादी काँग्रेसच्या शरद पवार गटाचे आमदार रोहित पवार यांनी गंभीर आरोप केले आहेत. आधी ज्या नेत्यांनी अजित पवार यांना त्रास दिला, तेच नेते आता सुनेत्रा आणि पार्थ यांच्याविरोधात कट रचत असल्याचा दावा त्यांनी केला. या नेत्यांनी पुन्हा एकदा आपला रंग दाखवत पक्षात सुनेत्रा आणि पार्थ यांना बाजूला करण्याचे प्रयत्न सुरू केल्याचे रोहित पवार म्हणाले.

शरद पवारांनी संधी दिली अन् मोठं केलं

दिल्लीत केंद्रीय गृहमंत्री अमित शाह यांची भेट घेतलेल्या सर्व नेत्यांना शरद पवार यांनी संधी दिली आणि मोठे केले. मात्र, नंतर याच नेत्यांनी पवारांचा विश्वासघात केला. त्यानंतर अजित यांनी या नेत्यांसोबत मिळून नवा पक्ष स्थापन केला. मात्र, छगन भुजबळ आणि हसन मुश्रीफ यांच्याव्यतिरिक्त अन्य नेत्यांनी अजित पवार यांना त्रास दिला, असा दावा रोहित पवार यांनी केला. ही बाब स्वतः अजित पवार यांनी आपल्याला सांगितल्याचेही त्यांनी स्पष्ट केले.

FAQ

1. राष्ट्रवादी काँग्रेसमधील सध्याचा वाद कशावरून आहे?
पक्षाच्या नेतृत्वावर, संघटनात्मक नियंत्रणावर आणि पक्षाच्या भवितव्यावरून अंतर्गत मतभेद वाढल्याची चर्चा आहे.

2. सुनेत्रा पवार यांना किती आमदारांचा पाठिंबा असल्याची चर्चा आहे?
पक्षातील जवळपास निम्म्या आमदारांचा पाठिंबा सुनेत्रा पवार यांना असल्याची चर्चा आहे.

3. सुनेत्रा पवार यांच्यासमोर कोणते आव्हान आहे?
ज्येष्ठ नेत्यांची नाराजी दूर करण्यासोबतच पक्षाच्या संघटनेवरील नियंत्रण कायम ठेवण्याचे आव्हान त्यांच्यासमोर असल्याचे सांगितले जात आहे.