Dhananjay Munde Resignation : कुठल्याही परिवारासाठी ही दु:खद घटनाच…; धनंजय मुंडेंच्या राजीनाम्यावर पंकजा मुंडेंची प्रतिक्रया

संतोष देशमुख हत्या प्रकरणामुळे धनंजय मुंडे यांच्या राजीनाम्याची मागणी केली जात होती. अखेर धनंजय मुंडेंनी राजीनामा दिल्यानंतर यावर मंत्री पंकजा मुंडे यांनी प्रतिक्रिया दिली आहे.

बीड : अजित पवार गटाचे नेते धनंजय मुंडे यांनी राजीनामा दिला आहे. बीडमध्ये झालेल्या मस्साजोग गावाचे सरपंच संतोष देशमुख यांची हत्या करण्यात आली. या प्रकरणातील आरोपी वाल्मिक कराड यांच्यासोबत संबंध असल्यामुळे मुंडेंच्या अडचणींमध्ये वाढ झाली होती. पालकमंत्रिपद नाकारल्यानंतर त्यांच्या मंत्रिपदाच्या राजीनाम्याची देखील जोरदार मागणी करण्यात येत होती. राज्याचे अर्थसंकल्प सुरु असताना धनंजय मुंडे यांनी राजीनामा दिला आहे. मुख्यमंत्री देवेंद्र फडणवीस यांनी तो राजीनामा स्वीकारला आहे. याबाबत आता भाजप नेत्या व मंत्री पंकजा मुंडे यांनी प्रतिक्रिया दिली आहे.

काय म्हणाल्या पंकजा मुंडे?

संतोष देशमुख यांच्यासोबत झालेल्या अत्याचाराचे फोटो समोर आले आहेत. हे पाहून मंत्री पंकजा मुंडे यांच्या डोळ्यामध्ये पाणी आले आहे. प्रतिक्रिया देताना मंत्री पंकजा मुंडे म्हणाल्या की, संतोष देशमुख यांच्यावर हत्येची चित्रफित पाहू शकत नाही. हा अमानुष खून आहे. आरोपींना जात नसते. ते कुठल्याही जातीचे असले तरी त्यांना शिक्षा व्हायलाच हवी. मी संतोष देशमुख यांच्या आईची माफी मागते, अशा शब्दांत पंकजा मुंडे यांनी आपल्या भावना व्यक्त केल्या आहेत.

राजकीय बातम्या वाचण्यासाठी क्लिक करा

धनंजय मुंडे यांनी त्यांचा राजीनामा मुख्यमंत्री देवेंद्र फडणवीस यांच्याकडे सुपूर्द केला आहे. याबाबत प्रतिक्रिया देताना पंकजा मुंडे म्हणाल्या की, धनंजय मुंडे यांच्या राजीनाम्यासंदर्भात मला कल्पना नव्हती. आज सकाळी नागपूरला आल्यावर समाज माध्यमांवरून ही माहिती मिळाली. या संपूर्ण घटनेचा तपास सुरू असल्यापासून माझी भूमिका मी स्पष्ट केली आहे. मी सर्वात आधी मुख्यमंत्र्यांना पत्र लिहून या प्रकरणाचा तपास करण्याची विनंती केली होती. धनंजय मुंडेंनी आधीच राजीनामा दिला असता तर पदाची प्रतिष्ठा राहिली असती. मी त्याची लहान बहीण असून कुठल्याही परिवारासाठी ही दु:खद घटनाच आहे, असे मत पंकजा मुंडे यांनी व्यक्त केले आहे.

त्याचबरोबर संतोष देशमुख यांच्या अत्याचाराचे फोटो व्हायरल झाल्यानंतर देखील पंकजा मुंडे यांनी प्रतिक्रिया दिली आहे. त्या म्हणाल्या की, संतोष देशमुख हत्या प्रकरणाच्या चौकशी समितीने दोषारोप पत्र सादर केल्यानंतर समोर आलेले व्हीडीओ पाहण्याची माझ्यात हिंमत नाही. हा अमानवी प्रकार आहे. या संपूर्ण प्रकारावर मी संतोष देशमुखच्या आईची माफी मागते. मी सुद्धा एक आई आहे. त्यामुळे अशा अमानवी घटनांमुळे त्यांच्यावर काय परिणाम झाले असतील हे मी समजू शकते, असेही म्हणत पंकजा मुंडे यांना अश्रू अनावर झाले आहेत.

महाराष्ट्रसंबंधित बातम्या वाचण्यासाठी क्लिक करा

पुढे पंकजा मुंडे यांनी संतोष देशमुख हत्या प्रकरणातील आरोपींना कडक शिक्षा देण्याचे देखील सांगितले आहे. त्या म्हणाल्या की, संतोष देशमुख हत्या प्रकरणानंतर याला जातीय रंग देण्यात आला. परंतु, ज्या आरोपींचे फोटो समोर आलेत ते कुठल्या जाती धर्माचे आहेत हा विषय आता उरला नाही. आरोपींना कुठलीही जात नसते. आम्ही जेव्हा मंत्रीपद किंवा आमदारकीची शपथ घेतो तेव्हा जात धर्म हा विषय आमच्यासाठी संपला असतो. कुणाविषयीही ममत्व भाव आम्हाला ठेवता येत नाही. त्यामुळे आरोपी कुठल्याही जातीचा असतो. त्याला कठोर शासन व्हायला हवे हीच आमची मागणी आहे, असे स्पष्ट मत भाजप नेत्या व मंत्री पंकजा मुंडे यांनी व्यक्त केले आहे.