सोमवार, 19 ऑक्टोबर 2026
तुकाराम मुंढेंच्या कारवाईवर शरद पवारांची प्रतिक्रिया
Sharad Pawar on Tukaram Mundhe : राज्यातील अन्न आणि औषध प्रशासन अर्थात FDAच्या कारवायांमुळे गेल्या काही दिवसांपासून तुकाराम मुंढे चर्चेत आहेत. FDAची सूत्रे हाती घेतल्यानंतर मुंढे यांनी अन्नपदार्थांमधील भेसळ आणि नियमांचे उल्लंघन करणाऱ्यांविरोधात कारवाईचा धडाका सुरू केला आहे. त्यांच्या या भूमिकेचे विविध स्तरांतून कौतुक होत असताना आता ज्येष्ठ नेते शरद पवार यांनीही यावर भाष्य केले आहे.
दूधातील भेसळीविरोधात सुरू असलेल्या कारवाईचा परिणाम दूधाच्या दरावर झाल्याचा मुद्दा शरद पवार यांच्यासमोर पत्रकार परिषदेत उपस्थित करण्यात आला. पूर्वी सुमारे ६० रुपयांना मिळणाऱ्या दूधाचा दर आता ८० रुपयांपर्यंत पोहोचल्याचे सांगण्यात आले. त्यावर पवार यांनी भेसळ रोखण्याच्या कारवाईकडे सकारात्मक दृष्टिकोनातून पाहिले.
“दूधातली भेसळ थांबली आहे. त्यामुळे उत्पादकता वाढली आहे. चांगलं दूध मिळत असल्याने ग्राहकही दोन पैसे देत आहेत. हे चांगलं आहे,” अशी प्रतिक्रिया शरद पवार यांनी दिली.
दरम्यान, मुंबईतही FDAकडून अन्न सुरक्षा आणि स्वच्छतेच्या नियमांचे उल्लंघन करणाऱ्या खाद्य आस्थापनांविरोधात कारवाई करण्यात आली आहे. गोरेगाव येथील ईटक्लब ब्रँड्स प्रायव्हेट लिमिटेड आणि कुर्ला येथील राणी क्रिएटर्स कन्सल्टंट अँड सर्व्हिस प्रोव्हायडर्स यांच्या अन्न परवान्यांवर तातडीने निलंबनाची कारवाई करण्यात आल्याची माहिती समोर आली आहे.
पत्रकार परिषदेत शरद पवार यांना मनोज जरांगे पाटील यांच्या मराठा आरक्षणाच्या मुद्द्यावर सुरू असलेल्या आंदोलनाबाबतही प्रश्न विचारण्यात आला. त्यावर त्यांनी “बघुया आता काय होतय, सकाळी काही मंत्री तिथे जाणार आहेत,” असे सांगितले.
एकीकडे मराठा आरक्षणाचा मुद्दा पुन्हा चर्चेत आला असताना दुसरीकडे FDAच्या कारवायांमुळे अन्नपदार्थांच्या गुणवत्तेचा विषय ऐरणीवर आला आहे. तुकाराम मुंढे यांच्या नेतृत्वाखाली सुरू असलेल्या कारवायांमुळे भेसळखोर आणि नियमांचे उल्लंघन करणाऱ्या व्यावसायिकांमध्ये धाक निर्माण झाल्याचे चित्र आहे. मात्र, या कारवाईसोबतच सामान्य ग्राहकांवर वाढणाऱ्या किंमतींचा परिणाम किती होतो, याकडेही लक्ष लागले आहे.
