सोलापूरच्या राजकारणात भाजपचा जीव राम सातपुतेंमध्ये का अडकलाय?
Solapur Politics: सोलापूर जिल्ह्यात भाजपच्या राजकारणात राम सातपुते हे एक असे नाव ठरले आहे, जे जिल्ह्याबाहेरून आले असूनही स्थानिक कार्यकर्त्यांवर वरचढ ठरत आहेत. बीड जिल्ह्यातून “आयात” झालेले सातपुते हे सोलापूरच्या सामाजिक-राजकीय पातळीवर कोणताही खोल संबंध नसतानाही भाजपच्या नेतृत्वात महत्त्वाची भूमिका बजावत आहेत. त्यामुळे अनेक निष्ठावंत कार्यकर्ते आणि स्थानिक मतदार अस्वस्थ झाले आहेत.पक्षाच्या परंपरेत मोठा वाटा उचलणाऱ्या कार्यकर्त्यांना सातपुते यांचा झपाट्याने वाढलेला प्रभाव खटकतो आहे. स्थानिक पातळीवर कोणतीही मजबूत पकड नसताना सातपुते यांना पक्षाने दिलेले महत्त्व सामान्य कार्यकर्त्यांच्या पचनी पडत नाही. त्यांच्या मागे ना जनाधार, ना सोलापूरच्या राजकारणाची जाण—मगही भाजप त्यांच्या पुढे हतबल का आहे, असा प्रश्न विचारला जात आहे.
अलीकडील लोकसभा आणि विधानसभा निवडणुकांमध्ये सोलापूर जिल्ह्यात भाजपचा निकाल निराशाजनक ठरला. या पराभवाला राम सातपुते आणि त्यांच्यासारख्या जिल्ह्याबाहेरील नेतृत्वाची चूक कारणीभूत असल्याचा आरोप कार्यकर्त्यांकडून केला जात आहे. रणजीत निंबाळकर यांचा किमान माढा मतदारसंघाशी संबंध आहे, पण सातपुते यांचा सोलापूरशी काहीही संबंध नाही.
मोहिते-पाटील कुटुंबाच्या पाठिंब्यामुळे आमदारकी मिळवलेले राम सातपुते आता पक्षातील मूळ कार्यकर्त्यांनाच डावलत असल्याचा आरोप आहे. त्यामुळे भाजपमध्ये अंतर्गत नाराजी वाढत असून, स्थानिक पातळीवर नेतृत्वाच्या पुनर्विचाराची गरज अधिक तीव्रतेने जाणवू लागली आहे.भाजपने सोलापूर जिल्ह्यातील सहा आमदार, दोन खासदार आणि मोहिते-पाटील कुटुंबासारख्या दिग्गजांचा वापर राम सातपुतेसारख्या “आयात” नेत्यासाठी का करावा, हा प्रश्न आज कार्यकर्त्यांच्या मनात उभा आहे. जिल्ह्याबाहेरचा असलेला सातपुते, सोलापूर भाजपमध्ये इतका प्रभावी कसा ठरतोय? त्याच्या एका शब्दावर जिल्हाध्यक्ष, तालुकाध्यक्ष यांची निवड होत असेल, तर हे पक्षासाठी लज्जास्पद मानावे लागेल.
आ. रणजीतसिंह मोहिते-पाटील यांनी सोलापूर जिल्ह्यात भाजपला ग्रामीण भागात उभारी दिली. त्यांच्या नेतृत्वात पक्षाची पाळेमुळे खोलवर रुजली. त्यांनी एकही वेळा पक्षविरोधी विधान न करता संयमी भूमिका घेतली, तरीही त्यांना दुर्लक्षित केले गेले. याचा फटका भाजपला दोन खासदार व सहा विधानसभा मतदारसंघ गमावून भरावा लागला.
राम सातपुते यांना कोणत्या गुणवत्तेच्या आधारावर एवढे महत्त्व दिले जात आहे? त्यांच्या निर्णयांमुळे पक्षात एकोपा हरवत चालला आहे, कार्यकर्ते नाराज आहेत आणि मतदार दुरावत आहेत. सातपुते यांच्या हट्टापायी स्थानिक नेतृत्व डावलले गेले आणि याचे गंभीर परिणाम निवडणुकीत दिसून आले.
सोलापूरच्या जनतेला मोहिते-पाटील कुटुंबाविषयी आत्मीयता आहे. हे कुटुंब नेहमीच जनतेच्या हितासाठी काम करत आले आहे. उत्तमराव जानकर यांच्यासारख्या विरोधकालाही आमदारकी मिळवून देणाऱ्या मोहिते-पाटलांचे नेतृत्व व्यापक आणि समावेशक आहे. अशा नेतृत्वाला मागे टाकून उपऱ्या सातपुतेसारख्या नेत्याला पुढे आणणे म्हणजे पक्षाची नीती व धोरणेच धूसर होत असल्याचा आरोप कार्यकर्त्यांकडून होतो आहे.
राम सातपुतेसारख्या “उपऱ्या” नेत्याच्या आगमनानंतर सोलापूर भाजपमध्ये केवळ अस्थिरता निर्माण झाली आहे. ना त्याच्या मागे जनाधार आहे, ना स्थानिक कार्यकर्त्यांशी नाळ. तरीही, भाजपने सातपुते यांच्यासाठी सोलापूरच्या राजकारणातली मोक्याची जागा राखून ठेवली आहे. याचा थेट परिणाम म्हणजे पक्षाची अधोगती आणि गळती. पक्षाने आता तरी संमोहनातून बाहेर येत वास्तव समजून घेतले पाहिजे.
सोलापूर भाजपमध्ये मोहिते-पाटील, दोन्ही देशमुख, कल्याण शेट्टी, अवताडे आणि परीचारक यांच्यात कोणताही मतभेद नाही. ही एक सशक्त आणि स्थिर टीम असताना, एकच अडथळा सतत आडवा येतो—राम सातपुते. त्यांच्या हट्टामुळेजिल्ह्याच्या भाजपचे संपूर्ण गणित बिघडले आहे. भाजपने आता सातपुते यांच्यात “जीव अडकवणं” थांबवून पक्ष संघटन व स्थानिक नेतृत्व मजबूत करण्यावर भर द्यावा.सोलापूर भाजपला पुन्हा उभारी द्यायची असेल, तर राम सातपुते यांना त्यांच्या मूळ जिल्ह्यात—बीडमध्येच राजकारणात स्थान द्यावे. तेथे त्यांचा लौकिक आणि जागा दोन्ही आहे. पण सोलापूरसारख्या राजकीयदृष्ट्या जडेल जिल्ह्यात, त्यांना पाठबळ देणे म्हणजे पक्षाची मुळेच उपटण्यासारखे ठरेल.
कमळ पुन्हा फुलवायचे असेल, तर आ. रणजीतसिंह मोहिते-पाटील यांच्यासारख्या स्थानिक, लोकप्रिय व विश्वासू नेत्याच्या खांद्यावर जबाबदारी द्यायला हवी. माळशिरसचा पन्नास वर्षांचा इतिहास याचे साक्षीदार आहे की, जनतेने मोहिते-पाटलांवर विश्वास दाखवला आहे. त्यांनी केवळ आपल्या समर्थकांनाच नव्हे तर विरोधकांनाही संधी दिली आहे—याचे उदाहरण म्हणजे उत्तमराव जानकर यांना आमदारकी मिळवून देणे.
स्थानिक स्वराज्य संस्थांच्या निवडणुका जवळ आल्या असताना, पक्षाला अजूनही वेळ आहे. सातपुते यांच्यासारख्या आयात नेतृत्वाला थांबवून स्थानिक नेतृत्वाला संधी दिल्यास, कार्यकर्त्यांचा आत्मविश्वास वाढेल आणि मतदारांचा पुन्हा भाजपकडे ओढा निर्माण होईल.
राम सातपुते यांच्या हट्टापायी पक्षाची एकजूट तुटली, कार्यकर्ते दुरावले आणि मतदारांचा विश्वास उडाला. सोलापूर भाजपचा “जीव” सातपुते यांच्यात अडकवू नये, हे वेळेवर समजून घेणे गरजेचे आहे. एक मतदार आणि सोलापूर जिल्ह्याचा नागरीक म्हणून विनंती आहे—पक्षाने आता तरी डोळे उघडावेत आणि उपऱ्या नेतृत्वाला बाजूला सारून स्थानिक नेतृत्वाच्या बळावर पुढील वाटचाल करावी!
