झावळ्यांच्या रविवारनिमित्त इम्मानुएल चर्चकडून प्रभात फेरी; ख्रिस्ती बांधवांचा उत्स्फूर्त प्रतिसाद

'होसान्ना, होसान्ना प्रभूच्या नावाने येणारा राजा धन्यवादित असो...! अशी घोषवाक्य गुरुवार पेठ आणि परिसरात ऐकायला मिळाली. इम्मानुएल चर्चकडून रविवारी (दि.29) सकाळी झावळ्यांचा रविवारनिमित्त प्रभात फेरी काढण्यात आली.

पुणे : ‘होसान्ना, होसान्ना प्रभूच्या नावाने येणारा राजा धन्यवादित असो…! अशी घोषवाक्य गुरुवार पेठ आणि परिसरात ऐकायला मिळाली. गुरुवार पेठेतील इम्मानुएल चर्चकडून रविवारी (दि.29) सकाळी झावळ्यांचा रविवारनिमित्त प्रभात फेरी काढण्यात आली. त्यानंतर चर्चमध्ये उपासना केली गेली. यावेळी चर्चचे प्रेसबिटर इन्चार्ज रेव्ह. विजय म्हंकाळे यांच्यासह अनेक ख्रिस्ती बांधव उपस्थित होते.

सध्या ख्रिस्ती बांधवांचा पवित्र सप्ताह सुरु आहे. शहरातील अनेक चर्चकडून झावळ्यांचा रविवारनिमित्त प्रभात फेरी काढण्यात आली. ख्रिस्ती धर्मात झावळ्यांचा रविवार या दिवसाला विशेष असे महत्त्व आहे. या दिवसाचे स्मरण ठेऊन ख्रिस्ती बांधव आजही हा दिवस पाळत आहेत. गाढवाच्या शिंगरावर बसून यरूशलेमेत प्रभू येशू ख्रिस्तांनी जयोत्सावाने केलेला प्रवेश म्हणून या दिवसाची आठवण केली जाते. येरूशलेममध्ये इसवी सन चौथ्या शतकाच्या पूर्वीपासून झावळ्यांचा रविवार, मौंदी गुरूवार, उत्तम शुक्रवार व पुनरूत्थान दिन हे दिवस अत्यंत भक्तीभावाने साजरे करण्यात येत असत.

हेदेखील वाचा : Sanjay Raut On Ashok Kharat : “अशोक खरातांच्या पाठीशी सरकार…”, संजय राऊतांच्या आरोपांनंतर राजकारणात खळबळ

चर्चकडून काढण्यात आलेल्या या प्रभातफेरीत रेव्ह. म्हंकाळे, चर्च सचिवा किशोरी पाटोळे, खजिनदार प्रविण गायकवाड यांच्यासह अनेक चर्च सभासद उपस्थित होते. या प्रभातफेरीनंतर चर्चमध्ये उपासना घेण्यात आली. यावेळी चर्चमध्ये तरुण संघाने गाणे सादर केले.

ख्रिस्ती समाजबांधवांचा 40 दिवसांचा पवित्र समय

सध्या ख्रिस्ती समाजबांधवांचा 40 दिवसांचा पवित्र समय सुरु आहे. प्रभू येशू ख्रिस्तांच्या स्मरणार्थ हे दिवस पाळण्यात येतात. या 40 दिवसांच्या उपास समयात पुष्कळ ख्रिस्तीबांधव पापांबद्दल झालेले दुःख व्यक्त करण्यासाठी उपास करतात. दरवर्षी राखेचा बुधवार अर्थात ‘अॅश वेनस्डे’ या दिवसापासून उपासाला सुरुवात होत असते. त्यानंतर पुनरुत्थान दिन अर्थात ‘ईस्टर संडे’ या दिवशी या उपास समयाची सांगता केली जाते.