पाकिस्तानविरूद्ध केली अशी रणनीती, सौरभ नेत्रावलकरने केला खुलासा

सोशल मीडियावर सौरभवर कौतुकाचा वर्षाव होत आहे. आपल्या संघासाठी 'सुपर ओव्हर'मध्ये गोलंदाजी करत असताना त्याच्या मनात काय चालले होते हे जाणून घेण्याचा प्रयत्न करत आहेत.

सौरभ नेत्रावलकर : T -20 विश्वचषकाचा थरार अत्यंत रंगतदार सुरु आहे. विश्वचषकाचा 11 वा सामना 6 जून रोजी पाकिस्तान विरुद्ध अमेरिका यांच्यामध्ये रंगला होता. या सामन्याचा निकाल तुम्हालापण नक्कीच पटणार नाही. या सामन्यांमध्ये यूएसएच्या संघाने दमदार कामगिरी करत विजय मिळवला. हा सामना सुपर ओव्हरपर्यत पोहोचला. शिगेला पोहोचलेल्या या सामन्यात सौरभ नेत्रावलकरने (Saurabh Netravalkar) अमेरिकेसाठी ‘सुपर ओव्हर’ टाकली. येथे विरोधी संघ पाकिस्तानला 19 धावा करायच्या होत्या, मात्र ते केवळ 13 धावांपर्यंतच पोहोचू शकले आणि अमेरिकेने विजय मिळवला. त्यानंतर सोशल मीडियावर फक्त सौरभ नेत्रावलकरची चर्चा सुरु झाली. (फोटो सौजन्य – wshfreedom इंस्टाग्राम अकाउंट)

सोशल मीडियावर सौरभवर कौतुकाचा वर्षाव होत आहे. आपल्या संघासाठी ‘सुपर ओव्हर’मध्ये गोलंदाजी करत असताना त्याच्या मनात काय चालले होते हे जाणून घेण्याचा प्रयत्न करत आहेत. तुम्हालाही हाच प्रश्न पडला असेल तर त्याचे उत्तर खुद्द सौरभ नेत्रावलकर याने स्वतः दिले आहे. पाकिस्तानविरुद्ध झालेल्या सामन्यानंतर सौरभने एएनआयशी संवाद साधला. यावेळी त्याने त्याच्या रणनीतीचा खुलासा केला आहे. यावेळी सौरभला पत्रकाराने विचारले की, तू काय विचार करतो या सामन्याबद्दल? यावेळी सौरभने उत्तर दिले की, ही खूप खास भावना आहे. आम्ही स्पर्धेसाठी खूप मेहनत घेतली आहे. मागील दोन ते तीन महिन्यांपासून आम्ही तयारीमध्ये व्यस्त होतो त्यामुळे ही एक विशेष भावना आहे.

सुपर ओव्हरच्या संदर्भात विचारण्यात आले तेव्हा पुढे सौरभ म्हणाला की, आम्ही सुपर ओव्हरमध्ये चांगली सुरुवात केली होती. आम्ही पहिले फलंदाजीकरून 19 धावा केल्या होत्या. याचा अर्थ मला 6 चेंडूंपैकी 3 चेंडू टाकावे लागले. त्याचवेळी माझ्यामनामध्ये सुरु होते की, प्रक्रिया सोपी ठेवायची. त्याचबरोबर मी त्यांची गोलंदाजी पहिली होती. मीही अशीच योजना पुढे नेली. कारण लेग साईडची बाउंड्री छोटी होती आणि ऑफ साइड मोठी होती. त्यामुळे मी ऑफ साइडच्या दिशेने हळू यॉर्कर टाकत होतो.

पुढे तो म्हणाला की, मी फक्त शेवटच्या चेंडूबद्दल विचार करत होतो की तो वाईड जाऊ नये. त्यामुळे मला फक्त स्टंपच्या आत चेंडू टाकायचा होता आणि सुरक्षित राहायचे होते. शेवटच्या चेंडूवर मी आत्मविश्वासाने भरलेला होतो असे सौरभने सांगितले.