Hero Splendor सह अनेक बाईक झाल्या स्वस्त; GST कमी झाल्याने जाणून घ्या कोणत्या गाडीवर किती बचत

केंद्र सरकारने टू-व्हीलर्सवरील जीएसटी कमी केल्याने आता गाड्या स्वस्त होणार आहेत. Hero Splendor, Royal Enfield सह अनेक बाईक आणि स्कूटरच्या किमतीत मोठी घट होणार आहे. जाणून घ्या कोणत्या गाडीवर किती बचत होणार.

केंद्र सरकारने नुकत्याच केलेल्या जीएसटी कपातीमुळे ऑटो क्षेत्रासाठी आनंदाची बातमी आहे. केंद्र सरकारने नवीन जीएसटी स्लॅबला मंजुरी दिली असून, हे नवे बदल २२ सप्टेंबरपासून लागू होतील. त्यानुसार, अनेक मोटरसायकलवरील जीएसटी २८% वरून १८% पर्यंत कमी करण्यात आला आहे. यामुळे बाईक आणि स्कूटरच्या किमती थेट कमी होणार आहेत.

देशात सर्वाधिक पसंतीची आणि विकली जाणारी मोटरसायकल म्हणजे Hero Splendor. जीएसटी कमी झाल्याने याची किंमतही कमी होणार आहे. ज्यांनी नवीन बाईक खरेदी करण्याचा विचार केला आहे, त्यांच्यासाठी ही मोठी संधी आहे.

GST मध्ये काय बदल झाला?

सरकारने ३५०cc पेक्षा कमी क्षमतेच्या दुचाकी वाहनांवरील जीएसटी २८% वरून १८% पर्यंत कमी केला आहे. भारतात विकल्या जाणाऱ्या बहुतांश दुचाकी ३५०cc पेक्षा कमी क्षमतेच्या असतात, त्यामुळे सरकारचा हा निर्णय दुचाकी उद्योगासाठी मोठा फायदेशीर ठरेल. Hero Splendor सह इतर अनेक लोकप्रिय मोटरसायकलमध्ये ३५०cc पेक्षा कमी क्षमतेचे इंजिन असते. त्यामुळे या सर्वांच्या किमती कमी होतील.

Hero Splendor ची किंमत किती कमी होईल?

सध्या Hero Splendor ची किंमत ७९,४२६ रुपये आहे, ज्यावर २८% जीएसटी लागतो. नवीन जीएसटी स्लॅब लागू झाल्यानंतर यावर १८% जीएसटी लागेल आणि याची किंमत ७१,४८३ रुपये होण्याची शक्यता आहे. अशा प्रकारे, Hero Splendor च्या किमतीत ७,९४३ रुपयांची कपात होईल.

हे देखील वाचा: इथे GST कमी झाला आणि तिथे थेट ‘या’ लक्झरी कारची किंमत 30.40 लाखांनी स्वस्त झाली

‘या’ लोकप्रिय बाईक आणि स्कूटरच्या किमतीही कमी होणार

तुम्ही जर नवीन बाईक किंवा स्कूटर घेण्याचा विचार करत असाल, तर कोणत्या गाडीवर किती बचत होणार आहे, हे जाणून घ्या.

• Honda Shine 125: याची जुनी किंमत ८५,५९० रुपये होती, जी १८% जीएसटीनंतर ७७,०३१ रुपये होऊ शकते.
• Royal Enfield Classic 350: सध्याची किंमत १,९७,२५३ रुपये असून, जीएसटी कमी झाल्यावर ती १,७७,५२७ रुपये होऊ शकते.
• Royal Enfield Hunter 350: याची सध्याची किंमत १,४९,००० रुपये आहे, जीएसटी कमी झाल्यावर ती १,३४,९१० रुपये होऊ शकते.
• Honda Activa: या स्कूटरची जुनी किंमत ८१,०४५ रुपये होती, जी आता ७२,९४० रुपये होऊ शकते.
• Suzuki Access 125: याची किंमत ८४,३०० रुपये होती, जी आता ७५,८७० रुपये होऊ शकते.
• TVS Jupiter 110: याची किंमत ७८,६३१ रुपये होती, जी आता ७०,७६७ रुपये होऊ शकते.