Hyundai Aims Rural India Market: ग्रामीण बाजारपेठेत हुंडाईचा मोठा विस्तार; विक्रीत 30% वाट्याचे लक्ष्य

शहरी बाजारपेठेपेक्षा ग्रामीण भागातील कारविक्री वेगाने वाढतेय, मग हुंडाईने आता ग्रामीण भारतावर एवढा मोठा फोकस का केला आहे? कंपनीने पुढील 3-4 वर्षांत ग्रामीण विक्रीचा वाटा 30% करण्याचे लक्ष्य ठेवले असून, नव्या SUV आणि इलेक्ट्रिक SUVमुळे स्पर्धा आणखी वाढण्याची शक्यता आहे.

हुंडाई मोटर इंडिया ग्रामीण भारताला आपल्या भविष्यातील वाढीचे प्रमुख केंद्र मानत आहे. कंपनीला पुढील 3-4 वर्षांत एकूण विक्रीपैकी सुमारे 30% हिस्सा ग्रामीण बाजारपेठेतून मिळण्याची अपेक्षा आहे. सध्या हा वाटा 25.9% असून, मागील आर्थिक वर्षाच्या पहिल्या तिमाहीतील 22.6%च्या तुलनेत त्यात चांगली वाढ झाली आहे.

ग्रामीण भागातील विक्रीला वेग

हुंडाई मोटर इंडियाचे व्यवस्थापकीय संचालक आणि CEO तरुण गर्ग यांच्या मते, ग्रामीण बाजारपेठेत अजून मोठी वाढ होण्याची शक्यता आहे. चालू आर्थिक वर्षाच्या पहिल्या तिमाहीत ग्रामीण विक्री 23% वाढली, तर शहरी बाजारपेठेतील वाढ केवळ 2.8% राहिली. त्यामुळे कंपनीच्या एकूण विस्तारात ग्रामीण ग्राहकांचे महत्त्व वेगाने वाढत आहे.

Hyundai कारवर सप्टेंबरमध्ये बंपर ऑफर! तब्बल १ लाख रुपयांपर्यंत मिळणार डिस्काउंट

एसयूव्हींची मागणी कायम मजबूत

हुंडाईच्या एकूण विक्रीत एसयूव्हींचा वाटा सुमारे 68% आहे. विशेष म्हणजे ग्रामीण भागातही एसयूव्हीची मागणी जवळपास समान असून, तेथे त्यांचा वाटा 69% आहे. सुधारलेले रस्ते, वाढती कनेक्टिव्हिटी आणि स्वस्त इंटरनेट यामुळे ग्रामीण ग्राहकांना कारचे फीचर्स, किंमत आणि उपलब्ध पर्यायांची माहिती सहज मिळत आहे.

ग्रामीण भागात नेटवर्क वाढणार

ग्राहकांपर्यंत पोहोच वाढवण्यासाठी हुंडाई आपल्या ग्रामीण नेटवर्कचा विस्तार करत आहे. कंपनीच्या प्रत्येक 10 नव्या आउटलेटपैकी 6 आउटलेट ग्रामीण भागात उघडली जात आहेत. याशिवाय ग्रामीण ग्राहकांसाठी 100 पेक्षा अधिक मोबाइल सर्व्हिस व्हॅन्स कार्यरत आहेत. देशभरात कंपनीचे 1,510 पेक्षा जास्त विक्री आउटलेट्स आणि 1,670 पेक्षा अधिक सर्व्हिस सेंटर आहेत.

Hyundai August Sales: ह्युंदाईच्या विक्रीत मोठी वाढ; ऑगस्ट महिन्यात विकले ५४,००० हून अधिक युनिट्स

नवीन मॉडेल्समुळे वाढीला बळ

हुंडाई आगामी काळात मध्यम आकाराची एसयूव्ही आणि कॉम्पॅक्ट इलेक्ट्रिक एसयूव्ही आणण्याच्या तयारीत आहे. या नवीन मॉडेल्समुळे ग्रामीण बाजारपेठेत कंपनीला आणखी ग्राहक जोडण्याची संधी मिळू शकते. एप्रिल ते ऑगस्टदरम्यान कंपनीने देशांतर्गत 2,47,980 कार विकल्या, जी मागील वर्षाच्या 2,20,233 युनिट्सच्या तुलनेत 12.6% वाढ आहे. त्यामुळे ग्रामीण भारत येणाऱ्या काळात हुंडाईच्या वाढीचा महत्त्वाचा आधार ठरण्याची शक्यता आहे.