गाईच्या दूध दरात लिटरमागे 2 रुपयांनी वाढ; दूध संघांच्या बैठकीत महत्वाचा निर्णय!

राज्यातील गाईच्या दूध दरात प्रति लिटरमागे २ रुपयांनी वाढ करण्यात आली आहे. आज पुणे येथे दूध संघांच्या झालेल्या बैठकीत हा निर्णय घेण्यात आला आहे. त्यामुळे आता दूध उत्पादक संघांकडून नवीन दुध अनुदान धोरणानुसार शेतकऱ्यांना अनुदान मिळण्यास मदत होणार आहे.

दूध उत्पादक शेतकऱ्यांसाठी आनंदाची बातमी आहे. उन्हाळ्यात गाईच्या दुधाच्या मोठी घसरण झाली होती. ज्यामुळे दूध उत्पादक शेतकऱ्यांना उत्पादन खर्च मिळणे देखील मुश्कील झाले होते. मात्र, गेल्या महिनाभरात देशातील आघाडीच्या दूध संघांकडून दूध दरात वाढ करण्यात आली आहे. अशातच आता पुणे येथे आज (ता.१३) झालेल्या दूध उत्पादक व प्रक्रिया कल्याणकारी संघाच्या बैठकीत गाईच्या दूध दरात प्रति लिटरमागे २ रुपयांनी वाढ करण्यात आली आहे. त्यामुळे आता ग्राहकांना प्रति लिटर दुधासाठी अधिकचे पैसे मोजावे लागणार आहे. तर शेतकऱ्यांना मात्र या निर्णयामुळे फायदा होणार आहे.

काय आहे नवीन दर?

आज झालेल्या दूध संघांच्या बैठकीनंतर आता राज्यात गाईचे दुध ५६ रुपये प्रति लिटर दराने उपलब्ध होणार आहे. यापूर्वी गाईच्या दुधाला राज्यभरात ५४ रुपये प्रति लिटर इतका दर मिळत होता. राज्य सरकारने गाईच्या दुधासाठी अनुदान धोरण जाहीर केले आहे. १ जुलै २०२४ पासून लागू करण्यात आलेल्या या धोरणामुळे दूध खरेदी दरात तीन रुपयांची वाढ ही सर्व संघांना स्वतः द्यावी लागणार आहे. तीन रुपयांची खरेदी दरात वाढ झालेली असली तरीही विक्री दरात मात्र दोन रुपये वाढ करण्याचा निर्णय सर्वानुमते घेण्यात आल्याचे या बैठकीत सांगण्यात आले आहे.

सर्व दूध संघांच्या प्रतिनिधींची उपस्थिती

पुणे येथील जिल्हा दूध संघाच्या (कात्रज डेअरी) कार्यालयात झालेल्या बैठकीत हा निर्णय घेण्यात आला आहे. या बैठकीला राज्यातील विविध सहकारी व खाजगी संघांचे प्रतिनिधी उपस्थित होते. यामध्ये प्रामुख्याने चितळे डेअरी, पराग मिल्क, गोविंद दूध, नेचर डिलाईट, उर्जा, राजहंस, संतकृपा, एसआर थोरात, कात्रज, गोदावरी, अनंत, सोनाई, अक्षरा मिल्क, सुयोग मिल्क आदी संघाचे प्रतिनिधी उपस्थित होते.

राज्यातील दूध वितरणाची स्थिती

दरम्यान, राज्यभरात दररोज एकूण ६५ ते ७० लाख लिटर दुधाची विक्री होते. तर कल्याणकारी दूध संघाच्या माध्यमांतून ४० ते ४२ लाख लिटर दूध विक्री होते. त्यामुळे आता गायीच्या पिशवीबंद नव्या दूधाचा दरात २ रुपयांनी वाढ झाल्याने दूध उत्पादक संघांना याचा मोठा फायदा होणार आहे. तर दूध उत्पादक संघांना देखील शेतकऱ्यांना त्यांचे अनुदानाचे पैसे वितरित करण्यात मदत होणार आहे.