देशाची अर्थव्यवस्था रिकव्हरी मोडमध्ये, डिसेंबर तिमाहीत जीडीपी ६.२ टक्के दराने वाढला

Indian Economy GDP Data: राष्ट्रीय सांख्यिकी कार्यालयाने तिमाही जीडीपी आकडेवारी जाहीर केली आहे. जीडीपी विकास दर ६.२% आहे. अर्थतज्ज्ञांच्या मते येत्या तिमाहीतही भारतीय अर्थव्यवस्था जगातील सर्वात वेगाने वाढणारी असेल.

Indian Economy GDP Data Marathi News: ऑक्टोबर-डिसेंबर २०२४ या तिमाहीत भारतीय अर्थव्यवस्थेचा विकास दर ६.२ टक्के होता. दुसऱ्या तिमाहीत, म्हणजे जुलै ते सप्टेंबर दरम्यान, जीडीपी वाढीचा दर मंदावला होता आणि तो सात तिमाहींमधील सर्वात कमी ५.४ टक्क्यांवर पोहोचला. ताज्या सरकारी आकडेवारीनुसार, चालू आर्थिक वर्षात भारतीय अर्थव्यवस्थेचा विकास दर ६.५ टक्के राहण्याचा अंदाज आहे, तर २०२३-२४ या आर्थिक वर्षात तो ९.२ टक्के होता.

मुख्य आर्थिक सल्लागार व्ही. अनंत नागेश्वरन यांनी अधोरेखित केले की प्रगत आणि विकसनशील दोन्ही अर्थव्यवस्थांच्या तुलनेत भारताचा विकास दर मजबूत आहे. जीडीपी डेटा जाहीर झाल्यानंतर एका ब्रीफिंगमध्ये बोलताना त्यांनी सांगितले की हे आकडे आर्थिक वर्ष २६ आणि त्यानंतरच्या काळात सकारात्मक वाढीचा मार्ग दर्शवितात.

शेअर बाजार कोसळला, बाजारातील घसरणीची ‘ही’ आहेत तीन कारणे

आरबीआयच्या अंदाजापेक्षा कमी

तथापि, डिसेंबर तिमाहीतील जीडीपीचे आकडे रिझर्व्ह बँकेच्या अंदाजापेक्षा कमी आहेत. डिसेंबर तिमाहीत अर्थव्यवस्था ६.८ टक्के दराने वाढेल असा अंदाज रिझर्व्ह बँकेने वर्तवला होता. त्याच वेळी, २०२४-२५ या आर्थिक वर्षासाठी वास्तविक जीडीपी वाढ ६.६ टक्के राहण्याचा अंदाज आहे. केंद्रीय रिझर्व्ह बँकेने डिसेंबरच्या पतधोरणात जानेवारी-मार्च तिमाहीत जीडीपी ७.२ टक्के वाढण्याची अपेक्षा असल्याचा अंदाज व्यक्त केला होता. आता नवीन आकडेवारीनंतर, रिझर्व्ह बँक ऑफ इंडिया पुन्हा एकदा रेपो दरात कपात करू शकते. एप्रिलमध्ये चलनविषयक धोरण आढावा बैठक आहे. या बैठकीत रेपो दरात ०.२५ टक्के कपात अपेक्षित आहे. याआधी डिसेंबर तिमाहीतही अनेक वर्षांनी रेपो दरात अशीच कपात करण्यात आली होती.

राजकोषीय तूट ₹११.७० लाख कोटी

एप्रिल ते जानेवारी या कालावधीत भारताची राजकोषीय तूट ₹११.७० लाख कोटी होती, जी वार्षिक उद्दिष्टाच्या ७४.५ टक्के आहे. गेल्या वर्षी याच कालावधीत हा दर ६३.६ टक्के होता. सरकार चालू आर्थिक वर्षात राजकोषीय तूट जीडीपीच्या ४.८ टक्क्यांपर्यंत कमी करण्याची योजना आखत आहे, जी गेल्या वर्षी ५.६ टक्के होती.

आकडेवारी येण्यापूर्वीच शेअर बाजार कोसळला

जीडीपी डेटा येण्यापूर्वी भारतीय शेअर बाजारात भूकंप झाला होता. आठवड्याच्या शेवटच्या व्यवहार दिवशी शुक्रवारी सेन्सेक्स १,४१४.३३ अंकांच्या मोठ्या घसरणीसह ७३,१९८.१० अंकांवर बंद झाला. त्याच वेळी, निफ्टी ४२०.३५ अंकांनी घसरून २२,१२४.७० अंकांवर स्थिरावला.

जीडीपीचे आकडे कोण आणि कधी जाहीर करते 

राष्ट्रीय सांख्यिकी कार्यालय (NSO) आर्थिक वर्ष २०२४-२५ च्या ऑक्टोबर-डिसेंबर तिमाहीसाठी तिमाही GDP अंदाजांसह वार्षिक GDP आकडे जाहीर करते. ही आकडेवारी आज, २८ फेब्रुवारी २०२५ रोजी प्रसिद्ध करण्यात आली.

मेडट्रॉनिक आणि फिलिप्समध्ये सामंजस्य करार; मिळणार आरोग्य प्रशिक्षण