सलग 7 दिवसांच्या घसरणीनंतर शेअर बाजार सावरला; वाचा… आज बाजारात नेमके काय घडले!

आज शेअर बाजारात बाजार बंद होताना मुंबई शेअर बाजाराचा (बीएसई) सेन्सेक्स 239.38 अंकांनी वाढून, 77,578.38 अंकांवर बंद झाला आहे. तर राष्ट्रीय शेअर बाजाराचा (एनएसई) निफ्टी 64.70 अंकांनी वाढून 23,518.50 वर बंद झाला आहे.

सलग 7 दिवसांच्या घसरणीनंतर आज 19 नोव्हेंबर रोजी शेअर बाजार वधारून बंद झाला. मात्र, शेवटच्या तासात बाजारात मोठ्या प्रमाणात विक्री झाली. व्यवहारादरम्यान सेन्सेक्सने 1,100 अंकांपेक्षा जास्त उसळी घेतली होती. मात्र, नंतर सेन्सेक्स झपाट्याने घसरला आणि शेवटी 239 अंकांच्या वाढीसह बंद झाला. त्याचप्रमाणे निफ्टीनेही शेवटच्या तासात आपला बहुतांश फायदा गमावला. परंतु निर्देशांक 23,500 च्या वर बंद करण्यात यशस्वी झाला. त्यामुळे बीएसईवरील गुंतवणूकदारांच्या संपत्तीत आज सुमारे 1.31 लाख कोटी रुपयांची वाढ झाली आहे.

हे देखील वाचा – मनबा फायनान्सचा पिज्यॉ व्‍हेईक्लस सोबत सामंजस्य करार; वाहन खरेदीदारांना फायदा मिळणार

सेन्सेक्समध्ये 239.38 अंकांनी वाढ

आजच्या व्यवहारादरम्यान रिॲल्टी, ऑटो आणि सेवा क्षेत्रातील शेअर्समध्ये वाढ झाली. धातू आणि तेल आणि वायू शेअर्समध्ये विक्रीचा कल दिसून आला. बीएसई मिडकॅप आणि स्मॉलकॅप दोन्ही निर्देशांक सुमारे 0.9 टक्क्यांच्या वाढीसह बंद झाले. व्यवहाराच्या शेवटी सेन्सेक्स 239.38 अंकांनी वाढून 77,578.38 वर बंद झाला. तर निफ्टी 64.70 अंकांनी वाढून 23,518.50 वर बंद झाला.

हे देखील वाचा – व्हिजन 2030 ग्रोथ स्‍ट्रॅटेजीसाठी रिलायन्‍स ग्रुपकडून ‘रिलायन्‍स ग्रुप कॉर्पोरेट सेंटर’ची स्‍थापना

गुंतवणूकदारांच्या संपत्तीत 1.31 लाख कोटींची वाढ

बीएसईवर सूचीबद्ध कंपन्यांचे एकूण बाजार भांडवल आज 19 नोव्हेंबर रोजी 430.39 लाख कोटी रुपयांपर्यंत वाढले आहे, जे त्याच्या आधीच्या ट्रेडिंग दिवशी म्हणजेच सोमवार, 18 नोव्हेंबर रोजी 429.08 लाख कोटी रुपये होते. अशा प्रकारे सूचीबद्ध कंपन्यांचे मार्केट कॅप आज सुमारे 1.31 लाख कोटी रुपयांनी वाढले आहे. दुसऱ्या शब्दांत गुंतवणूकदारांच्या संपत्तीत सुमारे 1.31 लाख कोटी रुपयांची वाढ झाली आहे.

हे देखील वाचा – स्टेट बँक ऑफ इंडिया साजरा करतेय प्रतिष्ठित हॉर्निमन सर्कल शाखेचा शतकोत्तर वारसा!

कोणते शेअर्स वधारले

बीएसई सेन्सेक्समधील 30 पैकी 17 शेअर्स आज वधारले. यामध्ये महिंद्रा अँड महिंद्राचे शेअर्स सर्वाधिक 3.55 टक्क्यांनी वाढले. यानंतर एचडीएफसी बँक, टेक महिंद्रा, सन फार्मा आणि टायटनचे शेअर्स 1.58 ते 2.21 टक्क्यांच्या वाढीसह बंद झाले. तर सेन्सेक्समधील उर्वरित 13 शेअर्स आज घसरणीसह बंद झाले. यामध्ये रिलायन्स इंडस्ट्रीजचे शेअर 1.53 टक्क्यांनी घसरून सर्वाधिक घसरले. तर स्टेट बँक ऑफ इंडिया, टाटा स्टील, बजाज फिनसर्व्ह आणि मारुती सुझुकी यांचे सेन्सेक्स 1.13 ते 1.44 टक्क्यांनी घसरले.

(टीप : शेअर बाजार, म्यूच्यूअल फंड हे जोखमीच्या अधीन असतात. वरती दिलेली माहिती माहितीस्तव देण्यात आली आहे. गुंतवणुकीसाठी शिफारस, सल्ला देण्याचा यामागील उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)