Akola News: ‘विज्ञानवेध’ उपक्रमांतर्गत ३१ विद्यार्थ्यांचा इस्रो व दक्षिण भारत शैक्षणिक दौरा

या उपक्रमासाठी निवड झालेल्या ३१ विद्यार्थ्यांना विमानाने बेंगलोर येथे नेण्यात येणार असून, हा दौरा १५ ते २१ डिसेंबर या कालावधीत होणार आहे. इस्रोला भेट देताना विद्यार्थ्यांना अंतराळ विज्ञान, उपग्रह तंत्रज्ञान, संशोधन प्रक्रिया आणि भारताच्या अंतराळ क्षेत्रातील प्रगती याबाबत प्रत्यक्ष माहिती घेण्याची संधी मिळणार आहे. ही भेट विद्यार्थ्यांमध्ये वैज्ञानिक दृष्टिकोन विकसित करण्यासाठी आणि भविष्यातील करिअरविषयी नवे स्वप्न पाहण्यासाठी निश्चितच उपयुक्त ठरणार आहे.

या शैक्षणिक दौऱ्याचा मुख्य उद्देश विद्यार्थ्यांच्या ज्ञानात भर घालणे, त्यांचा आत्मविश्वास वाढवणे आणि पुस्तकातील ज्ञानाला प्रत्यक्ष अनुभवाची जोड देणे हा आहे. इस्रो व्यतिरिक्त दक्षिण भारतातील ऐतिहासिक, सांस्कृतिक आणि शैक्षणिकदृष्ट्या महत्त्वाच्या स्थळांना भेट देऊन विद्यार्थ्यांना भारताच्या समृद्ध परंपरेची आणि विविधतेची ओळख करून दिली जाणार आहे. हा दौरा विद्यार्थ्यांसाठी अत्यंत प्रेरणादायी आणि भविष्यातील वाटचालीस दिशा देणारा ठरेल, असा विश्वास जिल्हाधिकारी वर्षा मीना आणि सीईओ अनिता मेश्राम यांनी व्यक्त केला.

विद्यार्थ्यांच्या सुरक्षिततेसाठी आणि सोयीसुविधांसाठी विशेष काळजी घेण्यात आली असून, या पथकात दोन विस्तार अधिकारी, एक वैद्यकीय अधिकारी आणि दोन शिक्षकांचा समावेश आहे. संपूर्ण दौऱ्यादरम्यान विद्यार्थ्यांच्या आरोग्याची, सुरक्षिततेची आणि मार्गदर्शनाची जबाबदारी हे पथक पार पाडणार आहे.

Mangal Prabhat Lodha : विद्यार्थ्यांना जागतिक दर्जाचे तंत्रज्ञान शिकण्याची संधी मिळणार, मंगलप्रभात लोढा यांचे आश्वासन

यावेळी अतिरिक्त मुख्य कार्यकारी अधिकारी दिगंबर लोखंडे, मुख्य लेखा व वित्त अधिकारी माया शिर्के, तसेच जिल्हा विधी सेवा प्राधिकरणाच्या सचिव रोशनी बंसल उपस्थित होत्या. त्यांनीही विद्यार्थ्यांचे मनोबल वाढवत त्यांना शुभेच्छा दिल्या. या दौऱ्याबाबत विद्यार्थ्यांमध्ये मोठा उत्साह पाहायला मिळत होता. पालकांमध्येही समाधान आणि आनंदाचे वातावरण होते. कार्यक्रमाला विविध संघटनांचे पदाधिकारी, शिक्षकवर्ग आणि नागरिक मोठ्या संख्येने उपस्थित होते. हा उपक्रम जिल्ह्यातील गुणवंत विद्यार्थ्यांसाठी एक संस्मरणीय अनुभव ठरेल, असा विश्वास सर्व स्तरांतून व्यक्त करण्यात येत आहे.