न्यू डेव्हलपमेंट बँकेच्या शिष्टमंडळाशी मुख्यमंत्र्यांची चर्चा; शाळांच्या विकासासाठी करणार सहकार्य

न्यू डेव्हलपमेंट बँकेच्या शिष्टमंडळाने मुख्यमंत्री देवेंद्र फडणवीस यांची भेट घेऊन राज्यातील ग्रामीण रस्ते आणि शाळांच्या विकासासाठी सहकार्य करण्याबाबत चर्चा केली.

न्यू डेव्हलपमेंट बँकेच्या भारतीय प्रादेशिक कार्यालयाचे महासंचालक डॉ. डी. जे. पांडियन यांच्या शिष्टमंडळाने मुख्यमंत्री देवेंद्र फडणवीस यांची सह्याद्री अतिथिगृह येथे भेट घेतली. या भेटीत राज्यातील विविध क्षेत्रांमध्ये सहकार्याबाबत सकारात्मक चर्चा झाली. राज्यातील ग्रामीण भागात दर्जेदार सिमेंट काँक्रीट रस्ते, महामार्ग आणि शाळांच्या सर्वांगीण विकासासाठी बँक आर्थिक सहकार्य करणार असल्याची माहिती देण्यात आली.

विवा महाविद्यालयात मराठी भाषा गौरव दिनाचा उत्सव; स्पर्धा विजेत्यांना करण्यात आले पुरस्कारीत

मुख्यमंत्री फडणवीस म्हणाले की, राज्याला १ हजार अब्ज अमेरिकन डॉलरची अर्थव्यवस्था बनवायची आहे. यासाठी गतिमान दळणवळण सुविधा आणि उत्तम शैक्षणिक सोयी निर्माण करणे गरजेचे आहे. यात पायाभूत सुविधांचा विकास महत्त्वाचा असून, त्यासाठी न्यू डेव्हलपमेंट बँकेकडून आर्थिक सहकार्य मिळण्याची अपेक्षा आहे. राज्याने नवीन शैक्षणिक धोरण स्वीकारले असून, प्रत्येक विद्यार्थ्याच्या कौशल्य विकासावर भर दिला जात आहे. अशा कौशल्यपूर्ण शिक्षणामुळे विद्यार्थी सक्षम होतील आणि राज्याच्या प्रगतीला हातभार लावतील.

शाळांच्या सर्वांगीण विकासासाठी ‘सीएम श्री इन्स्टिट्यूशन’ हा विशेष प्रकल्प राबविण्यात येणार असून, यामधून राज्यातील शाळांची गुणवत्ता सुधारण्यावर भर दिला जाणार आहे. तसेच सार्वजनिक बांधकाम विभागामार्फत ‘महाराष्ट्र अमृतकाळ रस्ते विकास योजना’ कार्यान्वित करण्यात येणार असून, ग्रामीण भागातील विद्यार्थ्यांना शाळेत जाण्यास अधिक सोयीस्कर आणि सुरक्षित वाट मिळावी यासाठी ग्रामविकास विभागाद्वारे सिमेंट काँक्रीट रस्ते उभारण्याचे नियोजन करण्यात आले आहे. या प्रकल्पांचे सादरीकरण बैठकीत करण्यात आले असून, त्याद्वारे राज्यातील पायाभूत सुविधा आणि शिक्षण क्षेत्राचा विकास होईल, असा विश्वास व्यक्त करण्यात आला.

राज्यातील ग्रामीण भागात अजूनही अनेक ठिकाणी दळणवळणाची पुरेशी सुविधा उपलब्ध नाही, त्यामुळे विद्यार्थ्यांना शाळेत पोहोचण्यास अडचणी येतात. या समस्येच्या पार्श्वभूमीवर दर्जेदार रस्त्यांचे जाळे विकसित करण्याची गरज असून, त्यासाठी न्यू डेव्हलपमेंट बँकेच्या सहकार्याने विविध योजना राबविण्यात येणार आहेत. शिक्षणाच्या गुणवत्तेत सुधारणा करण्याच्या उद्देशाने राज्य सरकारने नवीन शैक्षणिक धोरण अवलंबले आहे. या धोरणानुसार प्रत्येक विद्यार्थ्याचा सर्वांगीण विकास करण्यासाठी कौशल्याधारित अभ्यासक्रम उपलब्ध करून देण्यात येणार आहे.

SBIने जाहीर केले प्रवेशपत्र; अर्ज कर्त्या उमेदवारांना करता येईल डाउनलोड

या बैठकीस न्यू डेव्हलपमेंट बँकेच्या शिष्टमंडळात भारतीय प्रादेशिक कार्यालयाचे महासंचालक डॉ. डी. जे. पांडियन, पब्लिक सेक्टर विभागाचे महासंचालक युरी सुरकोव्ह, सीनियर प्रोफेशनल बिंदू माधव पांडा, प्रिन्सिपल प्रोफेशनल बिन्तेश कुमार यांच्यासह बँकेचे वरिष्ठ अधिकारी उपस्थित होते. तसेच ‘मित्रा’चे मुख्य कार्यकारी अधिकारी प्रवीणसिंह परदेशी, वित्त विभागाचे अपर मुख्य सचिव ओ. पी. गुप्ता, सार्वजनिक बांधकाम विभागाच्या अपर मुख्य सचिव मनीषा म्हैसकर, मुख्यमंत्री प्रधान सचिव अश्विनी भिडे, शालेय शिक्षण विभागाचे प्रधान सचिव रणजीतसिंग देओल, ग्रामविकास विभागाचे प्रधान सचिव एकनाथ डवले आदी वरिष्ठ अधिकाऱ्यांचीही या महत्त्वाच्या चर्चेत उपस्थिती होती.