nta
National Testing Agency updates: नॅशनल टेस्टिंग एजन्सी (NTA) मधील पारदर्शकता आणि उत्तरदायित्व वाढवण्यासाठी एजन्सीने आपल्या परीक्षा विभागाची मोठी पुनर्रचना केली आहे. नुकत्याच समोर आलेल्या माहितीनुसार, NTA ने तब्बल ६०० तज्ज्ञांना हटवून त्यांच्या जागी नवीन तज्ज्ञांची नियुक्ती केली आहे. तसेच NTA चे नवीन कार्यालय आता मिंटो रोड येथे असणार आहे.
केंद्रीय शिक्षण मंत्री प्रल्हाद जोशी यांनी नुकतीच NTA सोबत उच्चस्तरीय बैठक घेतली. परीक्षा सुरळीत आणि पारदर्शक पार पडाव्यात, यासाठी सर्व आवश्यक सुरक्षा व पायाभूत सुविधा उपलब्ध करून देण्याचे कडक निर्देश त्यांनी दिले. या बैठकीत शिक्षण मंत्र्यांनी परीक्षा प्रणालीच्या प्रत्येक टप्प्याचे सर्वसमावेशक ऑडिट करण्याचे आणि त्रुटींवर तातडीने उपाययोजना करण्याचे निर्देश दिले.
परीक्षा प्रणाली अधिक मजबूत करण्यासाठी NTA ने काही मोठे निर्णय घेतले आहेत. प्रश्नपत्रिकांची छाननी आणखी कडक करण्यासाठी ‘चार-स्तरीय प्रश्नपत्रिका तपासणी प्रणाली’ लागू केली जाणार आहे. तसेच, पुढील दोन ते तीन आठवड्यांत २० ते २५ नवीन अधिकाऱ्यांची भरती केली जाईल. NTA ची कार्यालये युद्धपातळीवर नवीन ठिकाणी स्थलांतरित केली जात असून, तेथे सीआयएसएफ (CISF) पथकांद्वारे सुरक्षा व्यवस्था अधिक कडक करण्यात येणार आहे.
या पुनर्रचनेच्या अंतर्गत ५० हून अधिक कर्मचाऱ्यांना कामावरून कमी करण्यात आले असून, १० नवीन व्यावसायिक पदांसाठी अधिसूचना जारी करून भरती प्रक्रिया सुरू करण्यात आली आहे. याशिवाय, सायबर सुरक्षा, सायकोमेट्रिक्स आणि प्रश्नपत्रिका रचना यांसारख्या विशेष क्षेत्रांसाठी खाजगी क्षेत्रातील तज्ज्ञांची मदत घेतली जात आहे.
काही दिवसांपूर्वी इंग्रजी, समाजशास्त्र आणि वाणिज्य विषयांच्या यूजीसी-नेट (UGC-NET) परीक्षांच्या प्रश्नपत्रिकांमध्ये विसंगती आढळल्याने त्या रद्द करून पुन्हा घेण्याची घोषणा करण्यात आली होती. या सर्व घटनांच्या पार्श्वभूमीवर परीक्षा व्यवस्थेची विश्वासार्हता टिकवून ठेवण्यासाठी NTA ने ही कठोर पावले उचलली आहेत.
.png "Videos"){kind=small}
