School Dropouts: एकही बालक शिक्षणापासून वंचित राहणार नाही; राज्यभर विशेष शोधमोहीम राबवण्याचे निर्देश

School Dropouts Survey Maharashtra: शाळाबाह्य, अनियमित आणि स्थलांतरित बालकांना शिक्षणाच्या प्रवाहात आणण्यासाठी राज्यभर विशेष सर्वेक्षण राबवले जाणार आहे. पोलिस प्रशासनाच्या सहकार्याने ही मोहीम राबवण्याचे शिक्षण संचालकांचे निर्देश आहेत.

• राज्यभर पोलिसांच्या मदतीने शोधमोहीम
• शिक्षण संचालक शरद गोसावी यांचे सर्व जिल्ह्यांना निर्देश
• एकही बालक शिक्षणापासून वंचित राहू नये यासाठी सर्वेक्षणावर भर
• ‘या’ कारणामुळे बालके शिक्षणापासून दूर

School Dropouts Survey Maharashtra: शिक्षणापासून वंचित असणाऱ्या बालकांसाठी एक आनंदाची बातमी आहे. शाळाबाह्य, अनियमित आणि स्थलांतरित बालकांना शिक्षणाच्या मुख्य प्रवाहात आणण्यासाठी राज्यभर विशेष सर्वेक्षण करण्यात येणार आहे. पुणे शहरात पोलिस आयुक्तालयाच्या माध्यमातून जून आणि जुलै २०२६ मध्ये करण्यात आलेल्या शोधमोहिमेत तब्बल ८३१ शाळाबाह्य बालके आढळून आली आहेत. या बालकांना शाळेत दाखल करण्यासाठी पोलिस आयुक्तालयाकडून कार्यवाहीचे नियोजन करण्यात आले आहे. त्याच धर्तीवर राज्यातील प्रत्येक जिल्ह्यात पोलिस प्रशासनाच्या सहकार्याने सर्वेक्षण राबविण्याचे निर्देश प्राथमिक शिक्षण संचालक शरद गोसावी यांनी दिले आहेत.

शाळाबाह्य, अनियमित आणि स्थलांतरित बालकांचे सर्वेक्षण

शालेय शिक्षण व क्रीडा विभागाच्या २३ जून २०२२च्या शासन निर्णयानुसार राज्यात शाळाबाह्य, अनियमित व स्थलांतरित बालकांचे सर्वेक्षण केले जाते. सर्वेक्षणात आढळणाऱ्या बालकांना त्यांच्या नजीकच्या शाळेत दाखल करून त्यांचे शिक्षण अखंडित ठेवण्यासाठी कार्यवाही केली जाते. मात्र, विविध कारणांमुळे अद्यापही मोठ्या प्रमाणात बालके शिक्षणापासून दूर असल्याचे निदर्शनास आले आहे.

NEET PG 2026 Result जाहीर; मागील ६ वर्षांच्या तुलनेत यंदा कट ऑफ सर्वात खाली!

‘या’ कारणामुळे बालके शिक्षणापासून दूर

बालके शिक्षणापासून दूर राहण्यापाठीमागे कौटुंबिक अडचणी, पालकांची आर्थिक परिस्थिती, शिक्षणाबाबतची अनास्था यांसह विविध कारणांमुळे काही बालके शाळेत दाखल होत नाहीत किंवा अनियमित राहतात. शहरांमधील रस्ते, रेल्वेस्थानके, एसटी बसस्थानके अशा ठिकाणीही शाळाबाह्य बालके आढळतात.

SBI Free Online Courses: करिअरला द्या नवी दिशा! SBI च्या ‘या’ फ्री ऑनलाईन कोर्सेसमधून मिळवा फायनान्सचे धडे

पोलिस प्रशासनाच्या सहकार्याद्वारे सर्वेक्षण पूर्ण करण्याचे निर्देश

राज्यातील प्रत्येक जिल्ह्यात इतर शासकीय यंत्रणांसोबत पोलिस प्रशासनाचे सहकार्य घेऊन सर्वेक्षण पूर्ण करण्याच्या सूचना देण्यात आल्या आहेत. एकही बालक शिक्षणापासून वंचित राहू नये, यासाठी आवश्यक ती कार्यवाही करण्याचे आवाहन शिक्षण संचालकांनी केले आहे.