प्रशिक्षणाच्या दुसऱ्या दिवशी स्व-संरक्षण प्रशिक्षणास विद्यार्थिंनींचा उत्स्फूर्त प्रतिसाद!

जिल्हा प्रशासनाच्या ‘वीरांगना स्व-संरक्षण’ उपक्रमाच्या दुसऱ्या दिवशी दहा हजारांहून अधिक विद्यार्थिनींनी उत्स्फूर्त सहभाग नोंदवला.

• स्व-संरक्षण प्रशिक्षणाच्या दुसऱ्या दिवशी विद्यार्थिनींचा उत्स्फूर्त प्रतिसाद
• शिफूजी शौर्य भारद्वाज यांच्याकडून दहा हजारांहून अधिक विद्यार्थिनींना आत्मनिर्भरतेचे प्रशिक्षण
• महिलांची सुरक्षितता आणि मानसिक तयारीचे महत्त्व अधोरेखित

जिल्ह्यातील विद्यार्थिनींना संकटाच्या प्रसंगी स्वतःचे संरक्षण करता यावे, त्यांना आत्मनिर्भर बनवावे आणि धैर्य निर्माण करावे या उद्देशाने जिल्हा प्रशासनाने राबवलेल्या ‘वीरांगना स्व-संरक्षण प्रशिक्षण’ उपक्रमाला विद्यार्थिनींकडून प्रचंड उत्साहाने प्रतिसाद मिळत आहे. तीन दिवसीय प्रशिक्षण शिबिराच्या दुसऱ्या दिवशी दहा हजारांहून अधिक विद्यार्थिनींनी उपस्थित राहून सक्रिय सहभाग नोंदवला.

पुणे विद्यापीठात शिक्षक पदासाठी जागा खाली! इच्छुकांनो… संधीचे सोने करा

राज्य राखीव पोलीस दलाच्या मैदानावर सुरू असलेल्या या उपक्रमाचे प्रशिक्षण भारतातील प्रसिद्ध कमांडो ट्रेनर आणि स्वसंरक्षण तज्ज्ञ शिफूजी शौर्य भारद्वाज देत आहेत. विद्यार्थिनींच्या सुरक्षेसाठी प्रत्यक्ष वापरता येतील अशा तंत्रांचा समावेश असलेल्या या प्रशिक्षणामुळे मुलींमध्ये आत्मविश्वास आणि सजगता निर्माण होत असल्याचे जिल्हा प्रशासनाने सांगितले.

दुसऱ्या दिवसाचे उद्घाटन जिल्हाधिकाऱ्यांच्या हस्ते

दिवसाच्या प्रशिक्षण सत्राचे उद्घाटन जिल्हाधिकारी भाग्यश्री विसपुते यांच्या हस्ते करण्यात आले. यावेळी मंचावर पोलीस अधीक्षक श्रीकांत धिवरे, अधीक्षक अभियंता अनिल पवार, अपर जिल्हाधिकारी सुभाष बोरकर, अपर पोलीस अधीक्षक डॉ. अजय देवरे, राजेश इंगळे, संजय बागडे, तसेच प्रशासन आणि पोलीस विभागातील इतर मान्यवर अधिकारी उपस्थित होते.

जिल्हाधिकाऱ्यांनी विद्यार्थिनींशी संवाद साधत स्व-संरक्षणाची गरज, महिलांची सुरक्षितता आणि मानसिक तयारीचे महत्त्व अधोरेखित केले. कार्यक्रमात उपस्थित सर्व अधिकाऱ्यांनी या उपक्रमाबद्दल समाधान व्यक्त केले.

शिफूजींकडून प्रत्यक्ष जीवनातील वस्तूंच्या वापराचे प्रशिक्षण

मुख्य आकर्षण ठरले ते शिफूजी शौर्य भारद्वाज यांचे प्रत्यक्ष प्रशिक्षण. त्यांनी विद्यार्थिनींना ओळखपत्र, हातातील बांगडी, केसांतील कौल, क्लिप्स, पुस्तके अशी दैनंदिन वापरातील साधी वस्तूही स्व-संरक्षणासाठी कशी वापरता येतात याची व्यावहारिक प्रात्यक्षिके दिली.

त्यांनी केवळ स्वसंरक्षण तंत्रच नव्हे, तर परिस्थितीशी लढण्याची मानसिक तयारी, धोका ओळखण्याची क्षमता आणि सतर्क राहण्याचे महत्त्व विद्यार्थिनींना समजावून सांगितले.

मोठ्या संख्येने विद्यार्थिनींची उपस्थिती

पहिल्या दिवसापेक्षा अधिक विद्यार्थिनी दुसऱ्या दिवशी उपस्थित होत्या. विविध शाळांतील मुलींनी उत्साहाने तंत्र आत्मसात केले. कार्यक्रमाचे सूत्रसंचालन शिक्षण विस्तार अधिकारी रंजना धिवरे आणि जिल्हा आपत्ती व्यवस्थापन अधिकारी जितेंद्र सोनवणे यांनी केले. प्रशासन, पोलीस विभाग, शिक्षण विभाग, आपत्ती व्यवस्थापन विभागाचे अधिकारी, तसेच अनेक शिक्षक आणि शालेय कर्मचारी प्रशिक्षणासाठी उपस्थित होते.

Buldhana News : जिल्ह्यात संविधान दिन उत्साहात; शाळा-महाविद्यालयांत विविध उपक्रमांचे आयोजन

उपक्रमाला मिळत आहे जिल्ह्यातील पालक आणि शिक्षकांचा पाठिंबा

वीरांगना प्रशिक्षणामुळे मुलींमध्ये आत्मविश्वास, संकटप्रसंगी स्वतःचा बचाव करण्याची वृत्ती आणि धैर्य निर्माण होत असल्याने शाळा–महाविद्यालयांकडून या उपक्रमाचे स्वागत करण्यात आले आहे. ग्रामीण भागातील विद्यार्थिनींनाही या उपक्रमाचा लाभ होत असल्याने हा कार्यक्रम जिल्ह्यातील महिला सुरक्षेसाठी प्रभावी ठरत असल्याचे मत व्यक्त केले जात आहे.