फोटो सौजन्य - Social Media
राज्यातील शिक्षकांवर वाढत चाललेल्या अशैक्षणिक कामांच्या ओझ्यामुळे पुन्हा एकदा नाराजीचा सूर उमटला आहे. छत्रपती संभाजीनगरमध्ये ‘स्कॉफ’ अॅपद्वारे माहिती अपलोड करण्याची सक्ती करण्यात आल्याने शिक्षक संतप्त झाले आहेत. “आम्ही शिकवू की अशैक्षणिक कामे करू?” असा थेट सवाल शिक्षकांनी उपस्थित केला आहे. या नव्या प्रणालीमुळे शिक्षकांवर अतिरिक्त ताण पडत असून, अध्यापनाच्या कामावर त्याचा परिणाम होत असल्याची भावना व्यक्त होत आहे.
‘स्कॉफ’ अॅपमध्ये माहिती भरण्यासाठी शिक्षकांना स्वतःचा मोबाईल आणि इंटरनेट डेटा वापरणे बंधनकारक करण्यात आले आहे. “मोबाईल माझा, डेटा माझा आणि शासनाचा त्यात काहीही वाटा नाही,” अशी भूमिका घेत शिक्षकांनी संताप व्यक्त केला आहे. महाराष्ट्र राज्य प्राथमिक शिक्षक समितीनेही या धोरणावर प्रश्नचिन्ह उपस्थित करत आंदोलनाचा इशारा दिला आहे.
निपुण चाचणीपासून सुरू झालेली मोबाईल वापराची सक्ती आता ‘स्कॉफ’ अॅपपर्यंत पोहोचली आहे. शिक्षकांना विविध अॅप्स डाउनलोड करून त्यावर काम करावे लागत असून, गुगल ड्राईव्हवर फोटो अपलोड करणे, त्याच्या लिंक तयार करणे, तसेच १२८ प्रकारच्या प्रश्नांची माहिती व कागदपत्रे पीडीएफ स्वरूपात अपलोड करणे अशी प्रक्रिया पार पाडावी लागत आहे. या सर्व प्रक्रियेमुळे वेळ आणि श्रम मोठ्या प्रमाणात खर्च होत असल्याची तक्रार शिक्षकांनी केली आहे. शिक्षकांच्या मते, वैयक्तिक मोबाईलमध्ये बँकिंग, कौटुंबिक आणि इतर संवेदनशील माहिती साठवलेली असते. अशा परिस्थितीत शासनाच्या विविध अॅप्सचा सक्तीने वापर करणे हे गोपनीयतेच्या दृष्टीने धोकादायक ठरू शकते. याशिवाय, ऑनलाईन कामासाठी लागणारा डेटा खर्च, तांत्रिक सुविधा आणि साधनसामग्री शासनाकडून उपलब्ध करून दिली जात नसल्याने शिक्षकांमध्ये असंतोष वाढला आहे.
शाळा स्तरावर उपलब्ध असलेले पुरावे प्रत्यक्ष तपासणीद्वारे पडताळता येत असताना सर्व प्रक्रिया ऑनलाईन करण्यामागील उद्देश काय, असा सवालही शिक्षक संघटनांनी उपस्थित केला आहे. ऑनलाईन कामासाठी आवश्यक सुविधा उपलब्ध करून देणे हे शासनाचे कर्तव्य असल्याचे सांगत, “दादागिरी सहन केली जाणार नाही,” असा इशारा उदय शिंदे, विजय कोंबे आणि राजन कोरगांवकर यांनी दिला आहे. एकूणच, ‘स्कॉफ’ अॅपच्या सक्तीमुळे शिक्षकांमध्ये असंतोष वाढला असून, लवकरात लवकर यावर तोडगा न काढल्यास राज्यभर आंदोलन तीव्र होण्याची शक्यता व्यक्त केली जात आहे.
.png "Videos"){kind=small}
