नाशिकरोडच्या आर्टिलरी सेंटरमध्ये अग्निवीर प्रशिक्षणार्थीचा बॅरेकमध्ये मृत्यू; २० वर्षीय अश्विनच्या मृत्यूचे कारण…

नाशिकरोडच्या आर्टिलरी सेंटरमध्ये अग्निवीर प्रशिक्षण घेत असलेल्या २० वर्षीय प्रशिक्षणार्थीचा बॅरेकमध्ये मृत्यू झाल्याने खळबळ उडाली आहे. अश्विन एम. असे मृत प्रशिक्षणार्थीचे नाव असून, त्याच्या मृत्यूमागील नेमके कारण अद्याप स्पष्ट झालेले नाही

• नाशिकमध्ये अग्निवीरचे प्रशिक्षण घेत होता
• बॅरेकमध्ये गंभीर अवस्थेत आढळल्यानंतर मिलिटरी हॉस्पिटलमध्ये दाखल
• उपनगर पोलिसांकडून मृत्यूमागील कारणाचा तपास सुरू

नाशिक: नाशिकरोड येथील आर्टिलरी सेंटरमध्ये अग्निवीर प्रशिक्षण घेत असलेल्या २० वर्षीय प्रशिक्षणार्थीचा बॅरेकमध्ये मृत्यू झाल्याची घटना गुरुवारी सकाळी समोर आली. अश्विन एम. असे मृत प्रशिक्षणार्थीचे नाव असल्याची माहिती आहे. बॅरेकमध्ये तो गंभीर अवस्थेत आढळल्यानंतर त्याला तातडीने देवळाली कॅम्प येथील मिलिटरी हॉस्पिटलमध्ये नेण्यात आले. मात्र, डॉक्टरांनी त्याला मृत घोषित केले.

बॅरेकमध्ये गंभीर अवस्थेत आढळला

अश्विन एम. हा नाशिकरोडच्या आर्टिलरी सेंटरमध्ये अग्निवीर म्हणून प्रशिक्षण घेत होता. प्रशिक्षणाच्या काळात त्याची राहण्याची व्यवस्था आर्मी बॅरेकमध्ये करण्यात आली होती. गुरुवारी सकाळी तो बॅरेकमध्ये गंभीर अवस्थेत आढळून आला. ही बाब सहकाऱ्यांच्या लक्षात आल्यानंतर त्यांनी संबंधित कर्मचाऱ्यांना माहिती दिली. यानंतर अश्विनला तातडीने देवळाली कॅम्प येथील मिलिटरी हॉस्पिटलमध्ये दाखल करण्यात आले. रुग्णालयात वैद्यकीय अधिकाऱ्यांनी त्याची तपासणी केली. मात्र, त्याचा मृत्यू झाल्याचे डॉक्टरांनी घोषित केले. लेफ्टनंट कर्नल पंकज कुमार यांनी त्याची तपासणी करून मृत घोषित केल्याची माहिती आहे.

हेही वाचा:Bhandara Accident: पंपावरून निघाली बोलेरो, काही सेकंदांतच भीषण अपघात; महिला-चिमुकल्यांसह ९ जणांचा मृत्यू

उपनगर पोलिसांकडून तपास सुरू

घटनेची माहिती मिळाल्यानंतर उपनगर पोलिसांनी या प्रकरणाची नोंद केली आहे. पोलिस ठाण्यात अकस्मात मृत्यूची नोंद करण्यात आली असून, पोलीस हवालदार झाडे या प्रकरणाचा तपास करीत आहेत. अश्विनच्या मृत्यूमागील नेमके कारण अद्याप स्पष्ट झालेले नाही. त्याने असे टोकाचे पाऊल कोणत्या परिस्थितीत उचलले, याबाबत अधिकृत माहिती समोर आलेली नाही. त्यामुळे पोलिसांकडून घटनाक्रमाची पडताळणी केली जात आहे.

हेही वाचा:पत्नीच्या हत्येने गुवाहाटी हादरलं; फ्रिजमध्ये मुंडकं, आरोपी म्हणतो ‘माफी मागणार नाही’,‘बाहेर आलो तर तिच्या शुगर डॅडीलाही…’

प्रशिक्षणाशी संबंधित बाबींचाही तपास

पोलिसांकडून बॅरेकमधील परिस्थिती, प्रशिक्षणादरम्यानच्या बाबी आणि इतर संभाव्य कारणांचा तपास केला जात आहे. संबंधित व्यक्तींकडून माहिती घेण्यासह उपलब्ध पुराव्यांच्या आधारे पुढील तपास सुरू आहे. दरम्यान, २० वर्षीय प्रशिक्षणार्थीच्या अचानक झालेल्या मृत्यूमुळे त्याच्या सहकाऱ्यांमध्ये हळहळ व्यक्त होत आहे. आर्टिलरी सेंटर परिसरातही या घटनेने शोककळा पसरली आहे. पोलिसांच्या तपासानंतरच अश्विनच्या मृत्यूमागील नेमकी परिस्थिती स्पष्ट होण्याची शक्यता आहे.