ऐन विधानसभा निवडणुकीत मनसेच्या उमेदवारावर गुन्हा दाखल; मनसे पदाधिकाऱ्यानेच दिली तक्रार, कारण…

मनसेचेच कार्यालयीन सचिव योगेश पाटील यांनी गुन्हा दाखल केला आहे. घरात घुसून चोरी केल्याचा आरोप प्रसाद सानप यांच्यावर योगेश पाटील यांनी केला आहे.

नाशिक : सध्या विधानसभा निवडणुकीचे वातावरण सुरु आहे. ऐन निवडणुकीच्या काळात नाशिकमध्ये मनसेच्या उमेदवारावर पोलिसांत गुन्हा दाखल करण्यात आला आहे. या उमेदवारावर जबरी चोरीचा गुन्हा दाखल झाला आहे. नाशिक जिल्हा सचिवाला मारहाण करत लुटल्याची तक्रार दाखल झाली आहे.

हेदेखील वाचा : निवडणुकीच्या तोंडावर विक्रोळीमध्ये मोठा छापा; कोट्यवधी किमतीच्या साडेसहा टन चांदीच्या विटा जप्त

नाशिक पूर्व विधानसभा मतदारसंघातील मनसेचे अधिकृत उमेदवार प्रसाद सानप यांच्यासह चौघांवर गुन्हा दाखल झाला आहे. मनसेचेच कार्यालयीन सचिव योगेश पाटील यांनी गुन्हा दाखल केला आहे. घरात घुसून चोरी केल्याचा आरोप प्रसाद सानप यांच्यावर योगेश पाटील यांनी केला आहे. नाशिक पूर्वचे मनसेचे उमेदवार प्रसाद सानप यांनी मनसेचे पक्ष कार्यालयीन सचिव योगेश पाटील यांच्याकडे निवडणूक खर्चासाठी विशिष्ट रक्कम दिली होती.

दरम्यान, पक्ष कार्यालयीन सचिव योगेश पाटील यांनी निवडणूक खर्चासाठी दिलेली रक्कम वापरली नसल्याचा उमेदवार प्रसाद सानप यांचा आरोप आहे. हेच पैसे परत मागण्यासाठी आणि जाब विचारण्यासाठी गेलेल्या प्रसाद सानप आणि त्याच्या सहकाऱ्यांनी चोरी केल्याचा आरोप करण्यात आला आहे.

9 लाख 59 हजारांचा ऐवज लांबवला

मनसेचे उमेदवार प्रसाद सानप यांच्यावर त्यांच्याच सहकाऱ्याने चोरीचा आरोप केला आहे. योगेश पाटील यांच्या घरात घुसून त्यांच्या घरातून 8 लाख 84 हजार रुपये रोख आणि योगेश पाटील यांच्या आईची अडीच तोळ्याची पोत चोरल्याचा आरोप केला गेला आहे. याची एकूण 9 लाख 59 हजार रुपयांचा ऐवज बळजबरीने लुटून नेल्याची पाटील यांची तक्रार आहे.

पोलिसांत तक्रार येताच गुन्हा दाखल

याच तक्रारीनंतर नाशिक पोलिसांनी मनसेचे उमेदवार प्रसाद सानप यांच्यासह त्यांच्या साथीदारांवर गुन्हा दाखल केला आहे. त्यामुळे नाशिक जिल्ह्यात खळबळ उडाली असून सानप यांच्यावर काय कारवाई करणार याकडे लक्ष लागले आहे.

हे देखील वाचा : आतापर्यंत पक्षांचे आता थेट मतदारांचा जाहीरनामा…; खडकवासलामधील जाहीरनामा तुफान व्हायरल

20 नोव्हेंबरला मतदान तर निकाल 23 ला

महाराष्ट्रात विधानसभा निवडणुका घेतल्या जाणार आहेत. त्यानुसार, येत्या 20 नोव्हेंबरला मतदान घेतले जाणार असून, याचे निकाल 23 नोव्हेंबरला जाहीर केले जाणार आहेत. असे असताना ही निवडणूक जिंकण्यासाठी सर्वच राजकीय पक्षांकडून जोरदार तयारीही केली जात आहे. त्यातच आता मनसे उमेदवारावर त्यांच्या पक्षातील पदाधिकाऱ्याने पोलिसांत तक्रार दिल्याने आता त्यांच्यावर काय कारवाई होते, हे पाहणे गरजेचे बनले आहे.