शनिवार, 29 ऑगस्ट 2026
संग्रहित फोटो
अमर नंदू पवार (वय ३५, रा. नागेश्वर कॉलनी, शिंदेवाडी, ता. खंडाळा, जि. सातारा) असे खून झालेल्या दुर्दैवी तरुणाचे नाव आहे. या प्रकरणी राजगड पोलीस ठाण्यात दीपक मनोहर पाल (मूळ रा. उत्तर प्रदेश) याच्याविरुद्ध गुन्हा दाखल करण्यात आला असून, पोलिसांनी त्याला तातडीने अटक केली आहे. मृत अमर पवार याचा चुलत भाऊ अमित जगन्नाथ पवार यांनी राजगड पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, मृत अमर पवार याचे आरोपी दीपक पाल याच्या पत्नीसोबत अनैतिक प्रेमसंबंध असल्याचा संशय दीपकला होता. याच पूर्वद्वेषातून आणि रोषातून दीपकने अमरचा काटा काढण्याचा कट रचला होता. गुरुवारी रात्रीच्या सुमारास सारोळे ते वीर रस्त्यावरून अमर पवार, आरोपीची पत्नी आणि तिची मुलगी असे तिघे जण पायी चालले होते. पूर्वयोजनाबद्ध कटानुसार दबा धरून बसलेल्या दीपक पाल याने पाठीमागून येऊन अमर पवार याच्यावर अचानक सुऱ्याने व चाकूने मान आणि गळ्यावर बेछूट वार केले. या अचानक झालेल्या हल्ल्यात अमर पवार रक्ताच्या थारोळ्यात खाली कोसळले. मानेवर आणि गळ्यावर खोल जखमा झाल्यामुळे त्यांचा जागीच मृत्यू झाला. या घटनेमुळे सारोळे व शिंदेवाडी परिसरात मोठी दहशत व तणावाचे वातावरण निर्माण झाले होते.
हे सुद्धा वाचा : पापा जाधव हत्याकांड प्रकरणात मोठी अपडेट; पोलिसांच्या तपासातून धक्कादायक माहिती समोर
राजगड पोलिसांची घटनास्थळी धाव
माहिती मिळताच राजगड पोलिस ठाण्याचे वरिष्ठ अधिकारी व पथकाने तत्काळ घटनास्थळी धाव घेत आरोपी दीपक पाल याला रात्री उशिरा ताब्यात घेतले. न्यायालयाने त्याला पोलिस कोठडी सुनावली असून, राजगड पोलिस ठाण्याचे पोलिस निरीक्षक संतोष जाधव यांच्या मार्गदर्शनाखाली पोलिस उपनिरीक्षक राठोड व पथक पुढील अधिक तपास करीत आहे.
