कमी गुण मिळाल्याने विद्यार्थिनी नैराश्येत; महाविद्यालयाच्या इमारतीवरून घेतली उडी अन्…

विद्यार्थिनीने चाकूच्या साहाय्याने हाताची नस कापली आणि त्यानंतर महाविद्यालयाच्या इमरातीवरून उडी घेतल्याची माहिती पुढे आली आहे. त्यामुळे पोलिसांनी या घटनेच्या तपासादरम्यान चाकू जप्त केला आहे.

अमरावती : कमी गुण मिळाल्याने एका महाविद्यालयीन विद्यार्थिनीने हाताची नस कापून थेट इमारतीवरून उडी घेऊन आत्महत्येचा प्रयत्न केला. ही घटना शुक्रवारी (दि. 21) उघडकीस आली असून, मुलीवर रुग्णालयात उपचार सुरु आहेत. अमरावती शहरातील फ्रेजरपुरा ठाण्याच्या हद्दीतील एका नामांकित महाविद्यालयात बीएचएमएसच्या द्वितीय वर्षाला शिकणाऱ्या एका विद्यार्थिनीने हा प्रयत्न केला.

हेदेखील वाचा : इंदापूरातील अफूच्या शेतीवर पोलिसांचा छापा, 3 जणांना घेतले ताब्यात; तब्बल 27 लाखांची झाडे जप्त

21 फेब्रुवारी रोजी 11 वाजताच्या सुमारास इमारतीच्या तिसऱ्या मजल्यावरून उडी घेतल्यानंतर एकच खळबळ उडाली होती. विद्यार्थिनीला रुग्णालयात उपचारासाठी दाखल करण्यात आले. माहितीवरून फ्रेजरपुरा पोलिसांनी महाविद्यालय व रुग्णालयात जाऊन चौकशी केली. या विद्यार्थिनीने आत्महत्येच्या प्रयत्नापूर्वी एक चिठ्ठी लिहून ठेवली होती. त्या चिठ्ठीत परीक्षेत गुण कमी मिळाल्याचे कारण सांगितले आहे. परंतु, पोलिसांनी मुलीचे बयाण नोंदविले असता, पाय घसरून पडल्याचे सांगण्यात आले आहे. त्यामुळे पोलिसही संभ्रमात पडले आहे.

चाकूने कापली हाताची नस

विद्यार्थिनीने चाकूच्या साहाय्याने हाताची नस कापली आणि त्यानंतर महाविद्यालयाच्या इमरातीवरून उडी घेतल्याची माहिती पुढे आली आहे. त्यामुळे पोलिसांनी या घटनेच्या तपासादरम्यान चाकू जप्त केला आहे. तसेच पोलिसांनी महाविद्याल परिसरातील सीसीटीव्हीचे फुटेज ताब्यात घेतले आहे. त्यामध्ये मुलीने तिसऱ्या माळ्यावरून उडी घेतल्याचे दिसत आहे.

कीटकनाशक पिऊन आत्महत्येचा प्रयत्न

छेडछाडीमुळे एका तरुणीने कीटकनाशक पिऊन आत्महत्या करण्याचा प्रयत्न केल्याची धक्कादायक घटना समोर आली आहे. कोंढवा भागात ही घटना घडली असून, तरुणीला त्रास देऊन तिला आत्महत्येचा प्रयत्न करण्यास भाग पाडणाऱ्या तरुणावर गुन्हा दाखल केला आहे. याप्रकरणी एका २० वर्षीय तरुणीने कोंढवा पोलीस ठाण्यात तक्रार दिली आहे. त्यानुसार, तरुणावर गुन्हा दाखल केला आहे.

बदनामीकारक मजकुरामुळे तरुणीचा विवाह मोडला

दुसऱ्या एका घटनेत, बदनामीकारक पत्रके वाटल्याने तरुणीचा विवाह मोडल्याची घटना उघडकीस आली. आरोपींनी बदनामी थांबविण्यासाठी तरुणीकडे १५ लाख रुपयांची खंडणी मागितली. खंडणी न दिल्यास सोशल मिडीयात अश्लील फोटो व्हायरल करण्याची धमकी दिली. याबाबत तरुणीच्या भावाने लष्कर पोलिसांत तक्रार दिली आहे. याप्रकरणी आरोपी तरुणासह तिघांवर गुन्हा दाखल केला आहे.

हेदेखील वाचा : विक्रम गायकवाड हत्येप्रकरणी एसआयटीची स्थापना; पोलीस अधीक्षकांची माहिती; रामदास आठवले घेणार पीडित कुटुंबियांची भेट