मंगळवार, 25 ऑगस्ट 2026
लोणी काळभोरमध्ये सव्वा किलोचा गांजा जप्त; 95 हजारांचा मुद्देमालही हस्तगत, दोघांना अटक (फोटो- istockphoto )
कदमवाकवस्ती : लोणी काळभोर पोलिसांनी अंमली पदार्थविरोधी कारवाई करत कोळपेवस्ती, रामदरा रोड परिसरातून १ किलो २५५ ग्रॅम गांजा जप्त केला. याप्रकरणी दोन आरोपींना अटक करण्यात आली असून, गांजासह दोन मोबाईल असा एकूण ९५ हजार रुपयांचा मुद्देमाल पोलिसांनी जप्त केला आहे.
शुभम भाऊसाहेब बरकडे (वय २६, रा. कोळपेवस्ती, रामदरा रोड, लोणी काळभोर) आणि गौरव लक्ष्मण जाधव (वय २५, रा. कोळपेवस्ती, रामदरा रोड, लोणी काळभोर) अशी अटक करण्यात आलेल्या आरोपींची नावे आहेत. पोलिसांनी दिलेल्या माहितीनुसार, २३ ऑगस्ट २०२६ रोजी रात्री सुमारे ८.५० वाजता कोळपेवस्ती, रामदरा रोड येथे आरोपी गांजा विक्रीच्या उद्देशाने बाळगत असल्याचे आढळून आले.
पोलिसांनी केलेल्या कारवाईत ७५ हजार रुपये किमतीचा १ किलो २५५ ग्रॅम गांजा, तसेच प्रत्येकी १० हजार रुपये किमतीचे दोन ओप्पो कंपनीचे मोबाईल फोन जप्त करण्यात आले. या प्रकरणी पोलीस शिपाई गणेश बाळासाहेब खरात यांनी दिलेल्या फिर्यादीवरून लोणी काळभोर पोलीस ठाण्यात गुन्हा दाखल करण्यात आला आहे.
दोन्ही आरोपींना २३ ऑगस्ट रोजी रात्री ११.३० वाजता अटक करण्यात आली. न्यायालयाने आरोपींना पाच दिवसांची पोलीस कोठडी सुनावली आहे. गांजा कोठून आणण्यात आला, त्याची विक्री कोणाला केली जाणार होती.
तसेच या प्रकरणामागे आणखी कोणी सहभागी आहे का, याचा तपास पोलीस करीत आहेत. ही कारवाई लोणी काळभोर पोलीस स्टेशनचे वरिष्ठ पोलीस निरीक्षक प्रदीप पवार यांच्या मार्गदर्शनाखाली डी.बी. पथकाचे एपीआय सतीश गोडसे, पोलीस हवालदार अण्णा माने, कोल्हे यांच्या पथकाने केली.
