छत्रपती संभाजीनगर हादरले; लग्नाचा प्रस्ताव नाकारल्याचा राग अनावर, मेडिकलमध्ये घुसून चालकावर चाकूने वार अन्…

लग्नाचा प्रस्ताव नाकारल्याचा राग मनात होता; त्यातून सुरू झालेला वाद थेट मेडिकलच्या दुकानात पोहोचला. हर्सूलमध्ये झालेल्या चाकूहल्ल्यात मेडिकल चालकाचा उपचारादरम्यान मृत्यू झाला. या प्रकरणी पोलिसांनी दोघांना अटक केली असून, हल्ल्यामागील नेमकी पार्श्वभूमी आणि वादाची कारणे तपासली जात आहेत.

• लग्नाचा प्रस्ताव नाकारल्याच्या रागातून मेडिकलमध्ये चाकूने हल्ला
• गंभीर जखमी फैसल यांना घाटी रुग्णालयात केले दाखलछत्रपती संभाजीनगर हादरले; लग्नाचा प्रस्ताव नाकारल्याचा राग अनावर, मेडिकलमध्ये घुसून चालकावर चाकूने वार, दोघे अटकेत
• हर्सूल पोलिसांनी दोन आरोपींना केले अटक

छत्रपती संभाजीनगर: बहिणीशी लग्न करण्यास नकार दिल्याच्या रागातून मेडिकल दुकानात घुसून चालकावर चाकूने हल्ला केल्याची धक्कादायक घटना छत्रपती संभाजीनगरमधील हर्सूल परिसरात घडली. या हल्ल्यात गंभीर जखमी झालेल्या मेडिकल चालकाचा उपचारादरम्यान मृत्यू झाला. फैसल कादर शेख असे मृत व्यक्तीचे नाव आहे. या प्रकरणी पोलिसांनी रेहान अमीन पटेल आणि समीर रईस शेख या दोघांना अटक केली आहे.

हेही वाचा: नाशिकरोडच्या आर्टिलरी सेंटरमध्ये अग्निवीर प्रशिक्षणार्थीचा बॅरेकमध्ये मृत्यू; २० वर्षीय अश्विनच्या मृत्यूचे कारण…

लग्नाचा प्रस्ताव नाकारल्यापासून वाद

पोलिसांनी दिलेल्या माहितीनुसार, हर्सूल परिसरातील पटेल लॉन्सजवळील आयशा मंजिल भागात फैसल शेख यांचे लाइफलाइन मेडिकल दुकान आहे. काही महिन्यांपूर्वी आरोपी रेहान याच्यासाठी फैसल यांच्या बहिणीचे स्थळ आले होते. मात्र, कौटुंबिक कारणांमुळे या लग्नाच्या प्रस्तावाला नकार देण्यात आला होता. त्यानंतर रेहान हा फैसल आणि त्यांच्या कुटुंबीयांवर नाराज असल्याचे पोलिसांच्या प्राथमिक तपासात समोर आले आहे. लग्नाचा प्रस्ताव नाकारल्यानंतर दोन्ही कुटुंबांमध्ये वादाची परिस्थिती निर्माण झाल्याचे सांगण्यात येत आहे. आरोपीकडून फैसल यांच्या कुटुंबीयांना त्रास दिला जात असल्याचा आरोपही करण्यात आला आहे. मेडिकल दुकान आणि घराच्या परिसरातून आरोपी बुलेटवरून मोठा आवाज करत जात असल्याचेही पोलिसांना सांगण्यात आले होते. या प्रकारामुळे दोन्ही कुटुंबांमध्ये आधीपासून तणावाची परिस्थिती असल्याचे समोर आले आहे.

मेडिकलमध्ये घुसून वाद; त्यानंतर हल्ला

याच पार्श्वभूमीवर गुरुवारी दुपारी रेहान हा त्याच्या साथीदारांसह लाइफलाइन मेडिकलमध्ये गेला. त्यावेळी फैसल आणि आरोपींमध्ये वाद झाला. सुरुवातीला शाब्दिक वाद झाल्यानंतर परिस्थिती चिघळली आणि हाणामारी झाली. पोलिसांच्या प्राथमिक माहितीनुसार, याच वादातून रेहानने फैसल यांच्यावर चाकूने हल्ला केला. या हल्ल्यात फैसल गंभीर जखमी झाले. घटनेनंतर मेडिकल परिसरात गोंधळ उडाला. नागरिक आणि संबंधितांनी तातडीने फैसल यांना उपचारासाठी घाटी रुग्णालयात दाखल केले.

हेही वाचा: पत्नीच्या हत्येने गुवाहाटी हादरलं; फ्रिजमध्ये मुंडकं, आरोपी म्हणतो ‘माफी मागणार नाही’,‘बाहेर आलो तर तिच्या शुगर डॅडीलाही…’

उपचारादरम्यान मृत्यू

घाटी रुग्णालयात फैसल यांच्यावर उपचार सुरू करण्यात आले. मात्र, त्यांची प्रकृती गंभीर होती. डॉक्टरांनी तपासणी केल्यानंतर त्यांना मृत घोषित केले. या घटनेची माहिती मिळताच पोलिसांनी घटनास्थळी धाव घेतली आणि तपासाला सुरुवात केली. फैसल यांच्या मृत्यूची माहिती परिसरात पसरल्यानंतर हर्सूल परिसरात खळबळ उडाली. घटनेनंतर काही काळ तणावाचे वातावरण निर्माण झाले होते. पोलिसांनी परिस्थितीवर लक्ष ठेवत पुढील कार्यवाही सुरू केली.

दोघांना अटक; पुढील तपास सुरू

या प्रकरणी रेहान अमीन पटेल आणि समीर रईस शेख या दोघांना पोलिसांनी अटक केली आहे. हल्ल्याच्या वेळी आणखी कोणी सहभागी होते का, याचीही चौकशी केली जात आहे. तसेच हल्ल्यामागे लग्नाच्या प्रस्तावाचा वाद हेच कारण होते का किंवा त्यामागे अन्य काही बाबी होत्या, याचाही तपास केला जात आहे. पोलिसांकडून घटनास्थळाची पाहणी, संबंधित व्यक्तींकडून माहिती आणि उपलब्ध पुराव्यांच्या आधारे तपास केला जात आहे. आरोपींची भूमिका आणि संपूर्ण घटनाक्रम तपासानंतर अधिक स्पष्ट होणार आहे. मेडिकल चालक फैसल शेख यांच्या मृत्यूमुळे त्यांच्या कुटुंबीयांवर दुःखाचा डोंगर कोसळला आहे. या घटनेमुळे हर्सूल परिसरातही हळहळ व्यक्त होत आहे. पोलिसांनी परिस्थिती नियंत्रणात ठेवली असून, प्रकरणाचा पुढील तपास सुरू आहे.