Crime News: सांगलीत अंगावर काटा आणणारा अपघात; रस्त्यावर पडलेल्या तरुणाच्या अंगावरून मर्सिडीज गेली अन्...
भरपावसात रस्त्यावर कोसळला
मिळालेल्या माहितीनुसार, जयंत पवार हे शुक्रवारी सायंकाळच्या सुमारास सांगली एसटी स्टँड परिसरातून जात होते. त्यावेळी शहरात मुसळधार पाऊस सुरू होता. जयंत हे मद्यधुंद अवस्थेत असल्याची माहिती समोर आली आहे. चालत असताना अचानक त्यांचा तोल गेला आणि ते गजबजलेल्या रस्त्यावरच कोसळले. जयंत रस्त्यावर पडलेले असतानाच त्याच मार्गावरून एक मर्सिडीज कार वेगाने येत होती. पावसाची तीव्रता आणि रस्त्यावरील परिस्थितीमुळे चालकाच्या लक्षात आले नाही की, रस्त्यावर तरुण पडलेला आहे. त्यामुळे कार थेट जयंत यांच्या अंगावरून गेली. काही क्षणांत घडलेल्या या घटनेने परिसरातील नागरिकांमध्ये खळबळ उडाली.
नागरिकांनी तातडीने रुग्णालयात दाखल केले
अपघात होताच आसपासच्या नागरिकांनी घटनास्थळी धाव घेतली. गंभीर जखमी झालेल्या जयंत यांना तातडीने उपचारासाठी सांगलीच्या शासकीय रुग्णालयात दाखल करण्यात आले. डॉक्टरांनी त्यांच्यावर उपचार सुरू केले. मात्र, त्यांच्या शरीराला गंभीर अंतर्गत दुखापती झाल्याने प्रकृती चिंताजनक बनली. आणि उपचारादरम्यान त्यांची प्रकृती आणखी खालावल्यामुळे अखेर त्यांचा मृत्यू झाला. या घटनेमुळे जयंत पवार यांच्या कुटुंबीयांवर दुःखाचा डोंगर कोसळलं आहे.
सीसीटीव्हीत थरारक दृश्य कैद
या संपूर्ण अपघाताचे दृश्य परिसरातील सीसीटीव्ही कॅमेऱ्यात कैद झाले आहे. जयंत रस्त्यावर कोसळल्यानंतर काही क्षणांतच भरधाव मर्सिडीज त्यांच्या अंगावरून जात असल्याचे या फुटेजमध्ये दिसत असल्याची माहिती समोर आली आहे. अपघाताचा हा व्हिडिओ सोशल मीडियावर मोठ्या प्रमाणात व्हायरल होत आहे. दरम्यान, या घटनेची नोंद सांगली शहर पोलीस ठाण्यात करण्यात आली आहे. पोलिसांकडून अपघाताच्या परिस्थितीचा तपास सुरू असून, सीसीटीव्ही फुटेजच्या आधारे घटनेची माहिती घेतली जात आहे की, कारचा वेग, चालकाची भूमिका आणि अपघात नेमक्या कोणत्या परिस्थितीत घडला, याचा तपास पोलीस करीत आहेत.
.png "Videos"){kind=small}
