Dawood Ibrahim च्या साथीदारावर मोठी कारवाई; फरार अख्तर मर्चंटला दिल्ली विमानतळावर अटक, ३ वर्षांपासून होता फरार
२०२३ मध्ये काशीमीरा परिसरातील एका बेकरीवर झालेल्या गोळीबाराच्या प्रकरणात अख्तर मर्चंट व पप्पू पेजर हे प्रमुख सूत्रधार असल्याचा पोलिसांचा आरोप आहे. परिसरातील गुटखा विक्रेता बाबू याच्याकडून खंडणी वसूल करण्यासाठी त्याला फोन करण्यात आला होता. खंडणी देण्यास नकार दिल्यानंतर त्याच्या बेकरीवर गोळीबार करण्यात आल्याचे तपासात समोर आले होते.
या प्रकरणी काशीमीरा पोलीस ठाण्यात FIR क्रमांक 700/2023 दाखल करण्यात आला असून, खंडणी, खुनाचा प्रयत्न, कट रचणे आणि बेकायदा शस्त्र बाळगणे यांसह मकोका अंतर्गतही कारवाई करण्यात आली आहे.
या प्रकरणातील दुसरा प्रमुख आरोपी पप्पू पेजर याला गुन्हे शाखेने गेल्या वर्षी अटक केली होती. मात्र अख्तर मर्चंट तेव्हापासून फरार होता. त्याचा शोध घेण्यासाठी पोलिसांकडून सातत्याने प्रयत्न सुरू होते. दरम्यान, अख्तर मर्चंट विदेशात असल्याची माहिती इंटरपोलच्या माध्यमातून पोलिसांना मिळाली. त्यानंतर त्याच्या भारतातील संभाव्य हालचालींवर लक्ष ठेवण्यात आले. अखेर तो विदेशातून भारतात परतताच दिल्ली विमानतळावर त्याला अटक करण्यात पोलिसांना यश आले.
दिल्ली विमानतळावर अटक केल्यानंतर अख्तर मर्चंटला स्थानिक न्यायालयात हजर करण्याची प्रक्रिया पूर्ण करून मिरा-भाईंदर येथे आणण्यात येणार आहे. त्यानंतर काशीमीरा पोलिस आणि गुन्हे शाखेकडून त्याची कसून चौकशी केली जाणार आहे. या चौकशीत बेकरी गोळीबार, खंडणी प्रकरण आणि त्याच्या अंडरवर्ल्ड कनेक्शनबाबत महत्त्वाची माहिती समोर येण्याची शक्यता आहे.
पुडीसाठी पैसे न दिल्याचा राग अनावर, तरुणावर चाकूने हल्ला; दोघांवर गुन्हा दाखल
.png "Videos"){kind=small}
