ED In Action : दाऊदच्या साथीदाराच्या ड्रग्ज नेटवर्कला ईडीचा दणका; दोघांना अटक

ED In Action : ईडीने एका मोठ्या कारवाईत दाऊद इब्राहिमचा सहकारी असेल्या सलीम डोलाच्या दोन हस्तकांना अटक केली आहे. अमली पदार्थ तस्करीप्रकरणी ही अटक केल्याचे सांगण्यात येत आहे.

• सलीम डोला टोळीशी आरोपींचा संबंध
• एमडी ड्रग्जची निर्मिती, पुरवठा आणि तस्करीचे जाळे
• हवाला व्यवहार आणि मालमत्ता खरेदीसाठी गुन्ह्यातील पैशांचा वापर

 

कुख्यात गुंड दाऊद इब्राहिमचा सहकारी असलेल्या सलीम इस्माईल डोलाशी संबंधित आंतरराष्ट्रीय अमली पदार्थ तस्करी टोळीविरोधात अंमलबाजवणी संचालनालयाने (ईडी) (ED In Action) मोठी कारवाई केली आहे. याप्रकरणी प्रवीण उर्फ नागेश रामचंद्र शिंदे आणि बृजेश कांजीभाई मोराडिया या दोघांना अटक करण्यात आली आहे. मनी लाँडरिंग प्रतिबंधक कायद्यांतर्गत (पीएमएलए) ही कारवाई करण्यात आली आहे.

ईडीच्या मुंबई विभागीय कार्यालयाने दिलेल्या माहितीनुसार, मुंबईतील विविध तपास यंत्रणांनी सलीम डोला आणि त्याच्या साथीदारांविरोधात अमली पदार्थांच्या बेकायदा तस्करीप्रकरणी दाखल केलेल्या अनेक गुन्ह्यांच्या आधारे तपास सुरू करण्यात आला.

संघटित जाळे समोर

तपासात मेफेड्रोन (एमडी) या अमली पदार्थाची गुप्तपणे निर्मिती, त्याची राज्यांतर्गत व आंतरराष्ट्रीय तस्करी, तसेच हवाला मार्गाने गुन्ह्यातून मिळालेल्या पैशांची देवाणघेवाण आणि लपवाछपवी करणारे संघटित जाळे असल्याचे समोर आल्याचा दावा ईडीने केला आहे.

प्रवीण शिंदे हा एमडीच्या बेकायदा निर्मितीशी आणि त्याच्या विक्रीतून मिळालेल्या पैशांच्या व्यवहारांशी संबंधित असल्याचा ईडीचा आरोप आहे. या पैशांचा वापर जवळच्या व्यक्तींच्या नावावर स्थावर मालमत्ता व अन्य मालमत्ता खरेदी करण्यासाठी करण्यात आल्याचेही तपासात निष्पन्न झाल्याचे ईडीने म्हटले आहे.

फुटपाथवर मृतदेह आढळला, अकस्मात मृत्यूची नोंद; तपासात २१ वर्षीय तरुणाच्या हत्येचा धक्कादायक उलगडा

डोलाकडून अंगडियांचा वापर

तर बृजेश मोराडिया हा एमडीच्या निर्मितीसाठी लागणाऱ्या रसायनांची खरेदी आणि पुरवठा यांची व्यवस्था करत असल्याचा आरोप आहे. सलीम डोलाकडून अंगडिया यंत्रणेमार्फत मिळालेली रोकड विविध तृतीय पक्षांच्या व कुटुंबीयांच्या खात्यांत जमा करून बँकिंग माध्यमातून रासायनिक कंपन्यांकडे पाठवण्यात आल्याचे ईडीच्या तपासात समोर आले आहे.

या व्यवहारांतून मिळालेली कमिशनची रक्कम पुढे विविध खात्यांमध्ये वळवून वापरण्यात आल्याचाही ईडीचा आरोप आहे. या प्रकरणाचा पुढील तपास सुरू आहे.

पिंपळे गुरवमध्ये मालमत्तेच्या वादातून रक्तरंजित थरार; सावत्र नातवाने केली आजीची हत्या