शनिवार, 24 ऑक्टोबर 2026
उरण तालुक्यातील JNPT बंदरातून देशात बेकायदेशीर सिगारेटचा मारा करणाऱ्यांच्या महसूल गुप्तचर संचालनालयाने मुसक्या आवळल्या आहेत. तब्बल 13.18 कोटी रुपयांच्या विदेशी सिगारेटचा साठा डीआरआयने उधळून लावत, एकाला अटक केली आहे. भारतात विक्रीस बंदी असलेली ही सिगारेट समुद्रमार्गे चोरट्या पद्धतीने देशात आणली जात होती. कस्टम ड्युटीला डोक्यावर घेऊन देशाच्या आरोग्यावर घाला घालणाऱ्या टोळीच्या डावावर डीआरआयने थेट घाव घातला आहे.
DRI मुंबई युनिटला मिळालेल्या खाजगी माहितीच्या आधारे ही धडक कारवाई करण्यात आली. न्हावा-शेवा बंदरात आलेल्या एका कंटेनरमध्ये ‘कोटेड कॅल्शियम कार्बोनेट’ असे खोटे भासवून चक्क 1014 कार्टून परदेशी सिगारेट देशात घुसवण्याचा डाव होता. परंतु, डीआरआयच्या अधिकाऱ्यांनी हा खेळ पुरता हाणून पाडत, कंटेनरमधून 1 कोटी 1 लाख 40 हजार सिगारेट जप्त केल्या. यावर कुठलाही वैधानिक इशारा नसल्याने या सिगारेट पूर्णपणे बेकायदेशीर ठरतात.
सध्या या प्रकरणी एकाला अटक करण्यात आली असून, त्याच्यावर कस्टम कायदा 1962 आणि सिगारेट व तंबाखूजन्य पदार्थ अधिनियम 2008 नुसार गुन्हा दाखल झाला आहे. अटक केलेल्या आरोपीला न्यायालयाने 14 दिवसांची न्यायालयीन कोठडी सुनावली असून, याप्रकरणाचा तपास अधिक सुरू आहे.देशातल्या तरुण पिढीच्या आरोग्यावर झडप घालणाऱ्या या सिगारेट सिंडिकेटमागे आणखी कोण आहेत, हे उघडकीस आणण्यासाठी तपास यंत्रणांची खरी कसोटी आता सुरू झाली आहे.
डीआरआयनं न्हावा शेवा बंदरात छापेमारी करत तब्बल 13.18 कोटी रुपयांच्या विदेशी सिगारेटचा साठा जप्त केला. या प्रकरणात डीआरआयकडून एका आरोपीला अटकही करण्यात आली. डीआरआयनं जप्त केलेल्या सिगारेटला भारतात बंदी घालण्यात आली आहे. मात्र तरीही छुप्या पद्धतीनं समुद्रमार्गे कस्टम ड्युटी चुकवून या बंदी घातलेल्या सिगरेटची तस्करी करण्यात येत होती. महसूल गुप्तचर संचालन (DRI), मुंबई विभागीय युनिटला मिळालेल्या माहितीच्या आधारे ही मोठी कारवाई करण्यात आली. भारतात छुप्या पद्धतील कस्टम ड्युटी चुकवून समुद्रमार्गे तस्करी सुरू असल्याची माहिती डीआरआयला मिळाली होती. भारतात विदेशी सिगारेटची तस्करी होणार आहे, अशी माहिती मिळताच डीआरआयनं महागड्या विदेशी सिगरेटच्या तस्करी करणाऱ्या टोळीवर कारवाई केली.
