पुणे : पत्नीला देवदर्शनाच्या बहाण्याने सातारा जिल्ह्यातील मांढरदेवीत भागात नेऊन तिचा दरीत ढकलून देत खून करण्यात आल्याची धक्कादायक घटना समोर आली आहे. पत्नीला दरीत पडल्यानंतर ती झाडात अडकली. त्यानंतर तरुणाने तेथे जाऊन साडीने तिचा गळा आवळून खून केला. पतीला लोणीकंद पोलिसांनी अटक केली असून, बेपत्ता घटनेच्या तपासात ही बाब उघड झाली आहे.
लोणीकंद पोलीस ठाण्यात तक्रार
ललिता अमोलसिंग जाधव (वय ३६, रा. भैरवनाथ मंदिराजवळ, फुलगाव, ता. हवेली) असे खून झालेल्या महिलेचे नाव आहे. याप्रकरणी पती अमोलसिंग मुरली जाधव (वय २६) याला अटक केली आहे. पोलीस हवालदार प्रताप आव्हाळे यांनी लोणीकंद पोलीस ठाण्यात तक्रार दिली आहे.
पोलिसी खाक्या दाखविताच पतीने दिली खुनाची कबुली
पोलिसांच्या माहितीनुसार, अमोलसिंगने पत्नी बेपत्ता झाल्याची तक्रार गेल्या वर्षी (ऑक्टोबर २०२३) महिन्यात दिली होती. या बेपत्ता तक्रारीचा लोणीकंद पोलीस तपास करत होते. तपासात महत्त्वाची माहिती मिळाली. चौकशीसाठी त्याला ताब्यात घेण्यात आले. चौकशीत त्याने सुरुवातीला उडवाउडवीची उत्तरे दिली. पण, पोलिसी खाक्या दाखविताच त्याने पत्नीच्या खुनाची कबुली दिली.
कुटुंबीयांच्या दबाबामुळे वयाने मोठ्या ललिताशी विवाह
अमोलसिंगने कुटुंबीयांच्या दबाबामुळे वयाने मोठी असलेल्या ललिताशी विवाह केला होता. दोघांत दहा वर्षांचे अंतर होते. त्याचे पत्नीशी वाद व्हायचे. वयाने मोठी असल्याने पत्नीला त्याने सोडचिठ्ठी देण्यास सांगितले. मात्र, ललिताने सोडचिठ्ठी दिली नाही.
त्यांच्यात कायम वाद होत असत. २८ ऑक्टोबर २०२३ रोजी भाडेतत्त्वावर कार घेऊन दोघे सातारा जिल्ह्यातील मांढरदेवी येथे दर्शनासाठी निघाल्याचे सांगून बाहेर पडले. मांढरदेवी परिसरात पोहोचल्यानंतर त्याने मोटारचालकाला मोटार वाहनतळावर लावण्यास सांगितले. त्यानंतर दोघे जण घाटातून चालत निघाले. घाटात ललिताशी गप्पा मारण्याचा बहाणा केला.
मृतदेह दरीत ढकलून तो पसार
दरीजवळ थांबलेल्या ललिताला त्याने धक्का दिल्याने ती दरीत कोसळली. दरीत कोसळल्यानंतर ती झाडाच्या फांदीत अडकली. अमोलसिंग दरीत उतरला. साडीने गळा आवळून तिचा खून केला. ती मरण पावल्याची खात्री केल्यानंतर मृतदेह दरीत ढकलून तो पसार झाल्याची माहिती तपासात उघड झाली. वरिष्ठ पोलीस निरीक्षक विश्वजीत काईंगडे यांच्या मार्गदर्शनाखाली तपास पथकाने ही कामगिरी केली.
.png "Videos"){kind=small}
