Pune:“तू माझ्या मैत्रिणीसोबत का बोलतोस?” म्हणत MPSC विद्यार्थ्याचे अपहरण; गाडीत कोंबले, पुढे जे घडलं ते…

पुण्याच्या मध्यवर्ती भागात मध्यरात्री एमपीएससी परीक्षेची तयारी करणाऱ्या तरुणाला चारचाकीतून जबरदस्तीने पळवून नेण्यात आले. मैत्रिणीशी फोनवर बोलण्याच्या रागातून हे कृत्य झाल्याचे समोर आले आहे; मात्र पोलिसांनी काही तासांतच अपहरणकर्त्यांचा शोध घेण्यात आला.

• MPSC विद्यार्थ्याचे चिमण्या मारुती चौकातून अपहरण
• मैत्रिणीच्या बॉयफ्रेंडनेच कट रचल्याचा आरोप
• CCTV तपासातून सिंहगड रोडवर पोलिसांचा सापळा

Pune Crime: पुण्याच्या मध्यवर्ती भागात मध्यरात्री एमपीएससी परीक्षेची तयारी करणाऱ्या तरुणाचे अपहरण झाल्याने खळबळ उडाली. मैत्रिणीशी फोनवर बोलण्याच्या रागातून तिच्या बॉयफ्रेंडनेच मित्रांच्या मदतीने तरुणाचे अपहरण केल्याचे पोलिसांच्या तपासात समोर आले आहे. विश्रामबाग पोलिसांनी तत्परतेने तपास करत काही तासांतच अपहरण झालेल्या तरुणाची सुखरूप सुटका केली. या प्रकरणात दोघांना अटक करण्यात आली असून, अन्य दोन साथीदारांचा शोध सुरू आहे.

मध्यरात्री तरुणाला गाडीत कोंबले

प्रसाद सूर्यवंशी हा तरुण पुण्यात राहून एमपीएससी परीक्षेची तयारी करतो. सोमवारी मध्यरात्रीच्या सुमारास तो चिमण्या मारुती चौक परिसरात उभा होता. त्यावेळी चारचाकीतून काही जण तेथे आले. आरोपींनी प्रसादला “तू माझ्या मैत्रिणीसोबत का बोलतोस?” असा जाब विचारला. त्यानंतर त्याच्याशी वाद घालत मारहाण केल्याचा आरोप आहे. काही वेळातच आरोपींनी प्रसादला जबरदस्तीने गाडीत बसवले आणि तेथून निघून गेले.

हेही वाचा: Pune News: गणेशोत्सवात पुणेकरांची चिंता मिटणार… मेट्रो धावणार रात्रभर? वेळापत्रक जाहीर, जाणून घ्या नवे नियोजन  

मैत्रिणीच्या बॉयफ्रेंडनेच आखला कट

पोलिसांच्या माहितीनुसार, एमपीएससीची तयारी करणारी एक तरुणी प्रसाद आणि मुख्य आरोपी या दोघांच्या संपर्कात होती. दोघांशीही तिचे फोनवरून बोलणे होत असल्याचे आरोपीच्या लक्षात आले. याचा राग मनात धरून त्याने प्रसादचे अपहरण करण्याचा कट रचल्याचे तपासात समोर आले आहे. त्यासाठी त्याने आपल्या मित्राची मदत घेतल्याचा पोलिसांचा दावा आहे.

मध्यरात्री पुण्यात एमपीएससीची तयारी करणाऱ्या तरुणाचं अपहरण; मैत्रिणीच्या बॉयफ्रेंडनेच अपहरण केल्याची पोलिसांची माहिती#Punenews #crimenews #punecrimenews #police #video #viralvideo #pune pic.twitter.com/tT6JQBiK4n — Ankita Shantinath Khane (@KhaneAnkita) September 10, 2026

 

सीसीटीव्ही मुळे तपासाला मिळाली दिशा

घटनेची माहिती मिळताच विश्रामबाग पोलिसांनी तातडीने तपास सुरू केला. परिसरातील सीसीटीव्ही फुटेज तपासण्यात आले. त्यातून अपहरणासाठी वापरण्यात आलेल्या वाहनाची माहिती मिळाली. त्यानंतर पोलिसांनी तांत्रिक तपासाच्या आधारे वाहनाचा शोध घेण्यास सुरुवात केली. तपासादरम्यान संबंधित वाहन सिंहगड रोडच्या दिशेने गेल्याचे निष्पन्न झाले. पोलिसांनी तातडीने त्या परिसरात सापळा रचला. वाहन अडवून पोलिसांनी त्यातील आरोपींना ताब्यात घेतले आणि प्रसाद सूर्यवंशीची सुखरूप सुटका केली.

हेही वाचा: Crime News: वर्षानुवर्षे साधूचा वेश,पोलिसांची धाड पडताच समोर आला १९८८ मधील गुन्हा

दोघांना अटक, साथीदारांचा शोध सुरू

या प्रकरणात पोलिसांनी दोन आरोपींना अटक केली आहे. तर अपहरणात सहभागी असलेल्या अन्य दोन साथीदारांचा शोध सुरू आहे. आरोपींनी अपहरणामागे नेमका कोणता उद्देश ठेवला होता, तसेच या कटात आणखी कोणाचा सहभाग आहे का, याचा तपास विश्रामबाग पोलीस करत आहेत. या घटनेमुळे पुण्यात विद्यार्थ्यांच्या सुरक्षेचा प्रश्न पुन्हा चर्चेत आला आहे. मात्र सीसीटीव्ही आणि तांत्रिक तपासाच्या मदतीने पोलिसांनी अवघ्या काही तासांत अपहरणाचा छडा लावून तरुणाची सुखरूप सुटका केली.