Pune News: केंद्रीय मंत्री मोहोळांच्या सुरक्षा ताफ्याला भरधाव दुचाकीचा कट; ३२ वर्षीय दुचाकीस्वारावर गुन्हा

केंद्रीय राज्यमंत्री मुरलीधर मोहोळ यांचा सुरक्षा ताफा संचेती चौकातून पुढे जात होता. अचानक भरधाव दुचाकी ताफ्याच्या जवळ आली; या प्रकारामुळे सुरक्षेचा प्रश्न निर्माण झाल्याने पोलिसांनी गुन्हा दाखल केला.

• १३ सप्टेंबर रोजी रात्री  दुचाकीस्वाराने कट मारल्याचा आरोप
• नाना पेठ येथील शुभम याच्याविरुद्ध गुन्हा दाखल
• ओव्हरटेक करतानाची परिस्थिती ,प्रत्यक्ष धोका निर्माण झाला का? याचा तपास सुरू

पुणे: केंद्रीय राज्यमंत्री आणि पुण्याचे खासदार मुरलीधर मोहोळ यांच्या सुरक्षा ताफ्याला भरधाव दुचाकीस्वाराने कट मारल्याचा प्रकार शिवाजीनगर परिसरातील संचेती चौकात घडला. सुरक्षा ताफा चौकातून जात असताना दुचाकीस्वाराने निष्काळजीपणे वाहन चालवत ताफ्याच्या जवळून वाहन नेल्याचा आरोप आहे. या प्रकरणी शिवाजीनगर पोलिसांनी दुचाकीस्वाराविरुद्ध गुन्हा दाखल केला आहे. पोलिसांनी दिलेल्या माहितीनुसार, १३ सप्टेंबर रोजी रात्री साडेआठच्या सुमारास मुरलीधर मोहोळ यांचा सुरक्षा ताफा संचेती चौकातून जात होता. त्यावेळी त्यांच्या सुरक्षेसाठी पोलीस कर्मचारी ईश्वर लक्ष्मण भिकुले हे तेथे तैनात होते. ताफा चौकातून पुढे जात असताना एका दुचाकीस्वाराने भरधाव वेगाने वाहन चालवत सुरक्षा ताफ्याला कट मारल्याचे पोलिसांच्या निदर्शनास आले.

हेही वाचा:Sangali Crime: वडिलांच्या मारहाणीचा राग; जुन्या वादातून सांगलीत २९ वर्षीय तरुणावर चाकूने हल्ला

दुचाकीस्वाराविरुद्ध गुन्हा

पोलीस कर्मचारी ईश्वर भिकुले यांच्या तक्रारीनुसार, नाना पेठ येथील शुभम विजय वनित (वय ३२) याने दुचाकी भरधाव आणि निष्काळजीपणे चालवत सुरक्षा ताफ्याला कट मारला. ताफ्याची वाहतूक सुरू असताना अशा पद्धतीने वाहन चालवल्याने ताफ्यातील तसेच रस्त्यावरील अन्य वाहनांना अडथळा निर्माण होण्याची शक्यता होती. तसेच निष्काळजी वाहनचालकामुळे नागरिकांच्या आणि इतर वाहनचालकांच्या जीवितास धोका निर्माण होण्याची शक्यता असल्याचे तक्रारीत नमूद करण्यात आले आहे.

सुरक्षा ताफ्याच्या हालचाली महत्त्वाच्या

केंद्रीय मंत्र्यांच्या सुरक्षेच्या दृष्टीने त्यांच्या ताफ्याभोवतीची वाहतूक आणि वाहनांची हालचाल महत्त्वाची मानली जाते. त्यामुळे सुरक्षा ताफ्याच्या जवळून भरधाव वाहन नेणे किंवा ताफ्याला ओव्हरटेक करण्याचा प्रयत्न करणे हा सुरक्षेच्या दृष्टीने गंभीर प्रकार ठरू शकतो. या घटनेनंतर ईश्वर भिकुले यांनी शिवाजीनगर पोलीस ठाण्यात तक्रार दाखल केली. त्यांच्या तक्रारीच्या आधारे शुभम विजय वनित याच्याविरुद्ध गुन्हा दाखल करण्यात आला आहे.

हेही वाचा:Latur Crime: लातूरमध्ये शिक्षणसंस्थाचालकाचा मृत्यू; कुटुंब विदेशात, एकटेपणा, आजारपण की घातपात? चिठ्ठीने गूढ वाढले

पोलिसांकडून तपास सुरू

दुचाकी नेमक्या किती वेगाने चालवली जात होती, ताफ्याला ओव्हरटेक करताना नेमकी परिस्थिती काय होती आणि या प्रकारामुळे प्रत्यक्षात कोणताही धोका निर्माण झाला का, याबाबत पोलिसांकडून तपास सुरू आहे. या प्रकरणाचा पुढील तपास शिवाजीनगर पोलीस करत असून, तपासानंतर घटनेशी संबंधित अधिक माहिती स्पष्ट होणार आहे.