मंगळवार, 15 सप्टेंबर 2026
सौजन्य फोटो - Gemini AI
सोनवणे यांच्या मृत्यूपूर्वी लिहिलेली एक चिठ्ठी पोलिसांच्या हाती लागल्याची माहिती समोर आली आहे. या चिठ्ठीत आपल्या मृत्यूसाठी कोणालाही जबाबदार धरू नये, असे त्यांनी नमूद केल्याचे सांगण्यात येत आहे. तसेच आपल्या मृत्यूच्या घटनेचा तपास करू नये, असे आवाहनही चिठ्ठीत केल्याची प्राथमिक माहिती आहे. मात्र, एखाद्या चिठ्ठीत अशी नोंद असल्याने प्रकरणाचा तपास थांबवता येत नाही. मृत्यूची नेमकी कारणे आणि त्यामागील परिस्थिती स्पष्ट करण्यासाठी पोलिसांकडून विविध शक्यता तपासल्या जात आहेत.
संजीव सोनवणे हे एकटे राहत होते. तसेच त्यांना विविध आजार असल्याची माहिती पोलिसांना मिळाली आहे. कुटुंबीय विदेशात राहत असल्याने एकटेपणामुळे त्यांनी टोकाचे पाऊल उचलले असावे, असा प्राथमिक संशय पोलिसांकडून व्यक्त केला जात आहे. हा केवळ प्राथमिक अंदाज असून, मृत्यूमागे अन्य कोणते कारण आहे का, याचीही चौकशी केली जात आहे. त्यामुळे या प्रकरणात घातपाताची शक्यता आहे का, मृत्यूच्या आधी नेमक्या कोणत्या घटना घडल्या, तसेच चिठ्ठीतील मजकुरामागील पार्श्वभूमी काय आहे, याचा तपास महत्त्वाचा ठरणार आहे.
घटनेची माहिती मिळाल्यानंतर पोलिसांनी घटनास्थळी जाऊन पाहणी केली. मृतदेहाची वैद्यकीय तपासणी आणि आवश्यक कायदेशीर प्रक्रिया पूर्ण करण्यात आली. घटनास्थळावरील परिस्थिती, उपलब्ध कागदपत्रे तसेच इतर बाबींची पोलिसांकडून पडताळणी केली जात आहे. शिक्षण संस्थाचालक संजीव सोनवणे यांच्या मृत्यूमुळे लातूरच्या शैक्षणिक वर्तुळातही हळहळ व्यक्त होत आहे. त्यांच्या मृत्यूचे नेमके कारण पोलिसांच्या तपासातून स्पष्ट होणार आहे.
