Crime News: महाबळेश्वरातून लष्कर-ए-तोयबाशी संबंध असलेल्या संशयिताला अटक; मुंबई क्राईम ब्रँचची मोठी कारवाई

मुंबईतील व्यावसायिकाला धमकी दिल्याच्या तपासाला पाचगणीतून अटक झालेल्या संशयितामुळे धक्कादायक वळण मिळाले आहे. पाकिस्तानी हँडलरशी संपर्क आणि लष्कर-ए-तोयबाशी संबंध असल्याचा तपासात दावा; दोन मोबाईल आणि डायरी जप्त.

• पाचगणीत मुंबई क्राईम ब्रँचची कारवाई
• पाकिस्तानी हँडलरशी संपर्क असल्याचा संशय
• दोन मोबाईल आणि डायरी जप्त; अन्य संशयितांचा शोध सुरू

सातारा: मुंबईतील एका व्यावसायिकाला धमकी दिल्याप्रकरणी मुंबई गुन्हे शाखेने सातारा जिल्ह्यातील पाचगणीतून एका ३९ वर्षीय व्यक्तीला अटक केली आहे. मोहम्मद शफीक मोहम्मद अकबर लोन असे अटक करण्यात आलेल्या संशयिताचे नाव आहे. तपासादरम्यान त्याचे पाकिस्तानातील प्रतिबंधित दहशतवादी संघटना लष्कर-ए-तोयबाशी संबंध असल्याचे समोर आल्याचा दावा मुंबई गुन्हे शाखेने केला आहे. या कारवाईमुळे सातारा जिल्ह्यात खळबळ उडाली आहे. मुंबईतील एका व्यावसायिकाला धमकी देण्यात आल्याप्रकरणी गुन्हे शाखेकडून तपास सुरू होता. या तपासाची कडी पाचगणीपर्यंत पोहोचल्यानंतर पोलिसांनी मोहम्मद शफीक लोन याला ताब्यात घेतले. त्याच्याकडे चौकशी केल्यानंतर त्याचे लष्कर-ए-तोयबाशी संबंध असल्याची माहिती तपासात समोर आल्याचे पोलिसांनी सांगितले.

हेही वाचा:‘मनःशांती मिळाली’ म्हणत पत्नीने पतीला संपवलं; पतीची हत्या अन् मृतदेहाची चिरफाड, काढलेले अवयव देवीला अर्पण करून तिला…

पाकिस्तानी हँडलरशी संपर्काचा संशय

तपासात आरोपी सोशल मीडियाच्या माध्यमातून पाकिस्तानी हँडलरच्या संपर्कात आल्याचे समोर आल्याचा पोलिसांचा दावा आहे. याच माध्यमातून मुंबईतील व्यावसायिकाला धमकी देण्यात आल्याचेही तपासात निष्पन्न झाल्याचे सांगण्यात येत आहे. त्यामुळे या प्रकरणामागे नेमके कोणते नेटवर्क कार्यरत आहे, याचा शोध गुन्हे शाखेकडून घेतला जात आहे. दरम्यान, आरोपीचा भाऊ लष्कर-ए-तोयबामध्ये कमांडर असल्याची माहितीही तपासात समोर आल्याचे पोलिसांनी नमूद केले आहे. त्यामुळे आरोपीचे परदेशातील तसेच इतर संशयितांशी असलेले संपर्क तपासले जात आहेत.

हेही वाचा:Accident News: गणेशोत्सवाच्या प्रवासाला वरंधा घाटात अपघाताचे गालबोट; दोन कारचा चक्काचूर,तिघे गंभीर

दोन मोबाईल आणि डायरी जप्त

मुंबई गुन्हे शाखेने आरोपीकडून दोन मोबाईल फोन आणि एक डायरी जप्त केली आहे. या इलेक्ट्रॉनिक उपकरणांमधील माहिती तसेच डायरीतील नोंदींच्या आधारे पुढील तपास केला जात आहे. आरोपीच्या सोशल मीडिया अकाउंट्सचीही तपासणी करण्यात येत असल्याची माहिती आहे. या प्रकरणात आरोपीने कोणाच्या सांगण्यावरून व्यावसायिकाला धमकी दिली, त्याचा इतर व्यक्तींशी नेमका काय संपर्क होता आणि त्यामागे आणखी कोणाचा सहभाग आहे का, याचा तपास सुरू आहे. प्रकरणातील अन्य संशयितांचा शोध घेण्यासाठी गुन्हे शाखेची पथके काम करत आहेत. तसेच या प्रकरणातील लष्कर-ए-तोयबाशी संबंध आणि पाकिस्तानी हँडलरशी संपर्काबाबतचे आरोप हे पोलिसांच्या तपासातील दावे असून, पुढील तपासातून या बाबींची अधिक माहिती स्पष्ट होणार आहे.