(फोटो सौजन्य- सोशल मीडिया)
Crime Patrol 2026: ‘क्राईम पेट्रोल’च्या आगामी सीझनचा नवा प्रोमो प्रदर्शित झाला असून, या प्रोमोने अनेक दिवसांपासून सुरू असलेल्या चर्चांना पूर्णविराम मिळाला आहे. ‘क्राईम पेट्रोल २०२६ – क्राईम का करंट सीझन’ या नव्या पर्वाचं सूत्रसंचालन अभिनेता अजय देवगण करणार आहे. त्यामुळे अजय देवगण आता टीव्हीवर सूत्रसंचालकाच्या भूमिकेत पदार्पण करताना दिसणार आहे.
अजय देवगण ‘क्राईम पेट्रोल’च्या नव्या सीझनमध्ये सूत्रसंचालक म्हणून दिसणार आहे. यापूर्वी या शोचं सूत्रसंचालन अनुप सोनी यांनी केलं होतं. अनुप सोनी यांनी २०१८ मध्ये शो सोडल्यानंतर आता अजय देवगण या लोकप्रिय क्राईम शोची सूत्रं हाती घेणार आहे.
अजय देवगणला छोट्या पडद्यावर पाहण्यासाठी चाहते उत्सुक असून, नव्या प्रोमोमुळे ही उत्सुकता आणखी वाढली आहे.
नव्या प्रोमोमध्ये अजय देवगण गुन्ह्यांच्या बदलत्या स्वरूपाबद्दल बोलताना दिसतो. तो सांगतो की लहानपणापासून आपल्याला अनोळखी व्यक्तींपासून सावध राहायला आणि रात्री घराला कुलूप लावायला शिकवलं जातं. मात्र, आज अनेक प्रकरणांमध्ये धोका अनोळखी व्यक्तीकडून नव्हे, तर आपल्या ओळखीच्या व्यक्तीकडूनच निर्माण होतो.
अजय देवगण पुढे सांगतो की अनेक प्रकरणांमध्ये गुन्हेगाराला घराचा रस्ता, घराच्या चाव्या आणि कुटुंबाची माहितीही असते. “बऱ्याच प्रकरणांमध्ये हे आपलंच रक्ताचं नातं असतं आणि हे धक्कादायक आहे,” असं तो प्रोमोमध्ये म्हणतो.
नव्या सीझनमध्ये देशाला हादरवून सोडणाऱ्या अनेक गुन्ह्यांची प्रकरणं दाखवण्यात येणार आहेत. प्रोमोमध्ये अजय देवगण म्हणतो की, अशाच काही प्रकरणांमध्ये तो प्रेक्षकांसोबत असेल आणि ‘क्राईम पेट्रोल’च्या माध्यमातून त्या केसेस एकत्र समजून घेतल्या जातील.
अजयच्या गंभीर आणि दमदार अंदाजामुळे प्रोमोला प्रेक्षकांची चांगली पसंती मिळत आहे.
‘क्राईम पेट्रोल २०२६ – क्राईम का करंट सीझन’ हा नवा सीझन ३१ ऑगस्ट २०२६ पासून सुरू होणार आहे. हा शो सोनी एंटरटेनमेंट टेलिव्हिजन आणि सोनी लिव्हवर पाहता येणार आहे.
अनुप सोनी २०१० मध्ये ‘क्राईम पेट्रोल’शी जोडले गेले होते. अनेक वर्षे त्यांनी या शोचं सूत्रसंचालन केलं. मात्र, २०१८ मध्ये त्यांनी शोमधून ब्रेक घेण्याचा निर्णय घेतला.
शो सोडण्यामागचं कारण सांगताना अनुप सोनी यांनी अभिनयावर अधिक लक्ष केंद्रित करण्याची इच्छा व्यक्त केली होती. ‘क्राईम पेट्रोल’मध्ये वारंवार खून, बलात्कार आणि मालमत्तेच्या वादांसारख्या प्रकरणांवर बोलत असल्याचं सांगत त्यांनी वेगळ्या भूमिकांकडे वळण्याची इच्छा व्यक्त केली होती.
मात्र, सूत्रसंचालक म्हणून शो सोडल्यानंतरही अनुप सोनी विशेष भागांमध्ये ‘क्राईम पेट्रोल’मध्ये दिसले होते. आता अजय देवगण नव्या सीझनची सूत्रं हाती घेणार असल्याने या शोच्या नव्या पर्वाकडे प्रेक्षकांचं लक्ष लागलं आहे.
Madhuri Dixit Comeback : २४ वर्षांनंतर टीव्हीवर कमबॅक; ‘धकधक गर्ल’च्या रिअॅलिटी शोची घोषणा
.png "Videos"){kind=small}
