( फोटो सौजन्य- सोशल मिडिया)
Haiwaan Box Office Collection:अक्षय कुमार आणि सैफ अली खान यांची मुख्य भूमिका असलेला ‘हैवान’ हा क्राइम-थ्रिलर चित्रपट सध्या चर्चेत आहे. मोठ्या स्टारकास्टसह प्रदर्शित झालेल्या या चित्रपटाकडून बॉक्स ऑफिसवर दमदार कमाईची अपेक्षा होती. मात्र, प्रदर्शनाच्या दुसऱ्याच दिवशी चित्रपटाच्या कमाईत घसरण झाल्याचं पाहायला मिळत आहे. सध्या बॉक्स ऑफिसवर ‘हनुमान अंश’ आणि ‘मिर्झापूर: द मूवी’ या चित्रपटांचा दबदबा कायम असल्याने ‘हैवान’ला त्याचा फटका बसताना दिसत आहे.
इंडस्ट्री ट्रॅकर सॅक्निलकच्या आकडेवारीनुसार, ‘हैवान’ने पहिल्या दिवशी ७,२२४ शोजमधून ३ कोटी रुपयांची कमाई केली. मात्र, दुसऱ्या दिवशी चित्रपटाच्या कमाईत वाढ होण्याऐवजी मोठी घसरण झाली. शनिवारी ५,७५९ शोजमधून ‘हैवान’ने केवळ २.५० कोटी रुपयांचा गल्ला जमवला. त्यामुळे दोन दिवसांत चित्रपटाची भारतातील एकूण नेट कमाई ५.५० कोटी रुपयांवर पोहोचली आहे.
चित्रपटाच्या दुसऱ्या दिवसाच्या ऑक्युपन्सीवर नजर टाकली तर एकूण ऑक्युपन्सी १२.७७ टक्के इतकी होती. यामध्ये संध्याकाळच्या शोला तुलनेने चांगला प्रतिसाद मिळाला असून त्या वेळची ऑक्युपन्सी १६ टक्के होती. मात्र, दोन दिवसांनंतरही चित्रपट १० कोटींच्या आकड्यापासून दूर आहे. त्यामुळे आगामी रविवार आणि त्यानंतरच्या दिवसांमध्ये ‘हैवान’च्या कमाईत किती वाढ होते, याकडे सर्वांचं लक्ष लागलं आहे.
दरम्यान, सध्या बॉक्स ऑफिसवर विविध जॉनरचे अनेक चित्रपट प्रेक्षकांचं मनोरंजन करत आहेत. ‘मिर्झापूर: द मूवी’, ‘हनुमान अंश’, ‘मंदादी’, ‘सरदार २’, ‘एपिक’ आणि ‘व्हिडिओ’ यांसारखे चित्रपट सिनेमागृहात सुरू आहेत. यापैकी ‘हनुमान अंश’ आणि ‘मिर्झापूर: द मूवी’ला प्रेक्षकांकडून दमदार प्रतिसाद मिळत असल्याचं चित्र आहे. अशा परिस्थितीत अक्षय कुमार आणि सैफ अली खानचा ‘हैवान’ या स्पर्धेत कितपत टिकतो, हे पाहणं महत्त्वाचं ठरणार आहे.
‘हैवान’ची कथा श्याम नावाच्या एका नेत्रहीन व्यक्तीभोवती फिरते. सैफ अली खानने श्यामची भूमिका साकारली आहे. एका रिटायर्ड जज आणि रहस्यमयी महिलेशी संबंधित गुंतागुंतीच्या प्रकरणात श्याम अडकतो आणि त्याच्या आयुष्याला धोकादायक वळण मिळतं. पुढे त्याचा सामना बदला घेण्याच्या भावनेने पेटलेल्या बेरहम किलर परशुरामशी होतो. अक्षय कुमारने परशुरामची भूमिका साकारली आहे.
या चित्रपटात अक्षय कुमार आणि सैफ अली खान यांच्यासोबत बोमन इराणी, सैयामी खेर, श्रिया पिळगावकर आणि शारिब हाशमी महत्त्वाच्या भूमिकांमध्ये आहेत. अभिनेता मोहनलाल यांचाही चित्रपटात खास कॅमिओ आहे.
विशेष म्हणजे ‘हैवान’ हा २०१६ मध्ये प्रदर्शित झालेल्या प्रियदर्शन यांच्या मल्याळम ‘ओप्पम’ या चित्रपटाचा हिंदी रिमेक आहे. ‘ओप्पम’मध्ये मोहनलाल यांनी मुख्य भूमिका साकारली होती.
Aishwarya Narkar: “तुम्ही स्वतःच 80s च्या आहात, ओरिजनल फोटो टाका…”; ऐश्वर्या नारकरांचं भन्नाट उत्तर
.png "Videos"){kind=small}
