(फोटो सौजन्य- सोशल मीडिया)
Vaishali Samant: श्रावण महिन्याच्या पवित्र पर्वावर भक्ती, संगीत आणि अध्यात्माचा सुरेल संगम घडवणारं ‘उभी तुझ्या गाभारी मंगेशा’ हे नवं भक्तिगीत रसिकांच्या भेटीला आलं आहे. सुप्रसिद्ध गायिका वैशाली सामंत यांच्या मधुर आणि भावस्पर्शी आवाजाने सजलेलं हे गाणं ‘सप्तसूर म्युझिक’च्या युट्यूब चॅनेलवर प्रदर्शित करण्यात आलं आहे.
श्री मंगेशाच्या चरणी लीन होणाऱ्या भक्ताच्या भावविश्वाचं दर्शन या गाण्यातून घडतं. “सर्व सुखांची प्रचिती घडली, घडला साक्षात्कार… उभी तुझ्या गाभारी मंगेशा, हरपून देहभान” या भावपूर्ण शब्दांतून श्री मंगेशाच्या सान्निध्यात भक्ताला मिळणारी आध्यात्मिक अनुभूती, समाधान आणि भक्तिभाव प्रभावीपणे व्यक्त करण्यात आला आहे.
‘उभी तुझ्या गाभारी मंगेशा’ या गाण्याची निर्मिती साईनाथ राजाध्यक्ष आणि बीना राजाध्यक्ष यांनी केली असून, गीतलेखन साई दळवी यांनी केलं आहे. प्रणव हरिदास यांनी गाण्याला संगीत दिलं असून संगीत संयोजनाची जबाबदारीही त्यांनीच सांभाळली आहे.
महाराष्ट्राच्या लोकप्रिय गायिका वैशाली सामंत यांच्या आवाजाने या भक्तिगीताला विशेष भावस्पर्शी रंग मिळाला आहे. त्यांच्या स्वरातील भक्तिभाव आणि ताकद गाण्याचा आध्यात्मिक प्रभाव अधिक वाढवते.
गाण्याच्या ताल संयोजन आणि रिदम प्रोग्रामिंगची जबाबदारी सौरभ शिर्के यांनी सांभाळली आहे. प्रणव हरिदास यांनी बासरीवादन केलं असून, व्हायोलिन सेक्शनमध्ये नेविल फ्रँको आणि समूह यांचा सहभाग आहे. अभिजीत मझुमदार, प्रिन्स दविड आणि धर्मेंद्र जावडा यांनीही व्हायोलिनची साथ दिली आहे.
व्हियोला वादन जितेंद्र जावडा आणि संदीप ठाकूर यांनी केलं आहे. कोरसमध्ये निधी रानडे, शार्दुल कवठेकर आणि कार्तिक लेले सहभागी झाले आहेत. ध्वनी मिश्रण आणि ध्वनी मुद्रणाची जबाबदारी अवधुत वाडकर (Ajivasan Sounds) यांनी सांभाळली असून, क्यू व्हॉइस शार्दुल कवठेकर यांचा आहे.
साईनाथ राजाध्यक्ष यांचं ‘सप्तसूर म्युझिक’ संगीताच्या विविध प्रकारांना आणि नव्या प्रयोगांना व्यासपीठ देण्यासाठी सातत्याने प्रयत्नशील आहे. प्रेमगीतांपासून भक्तिगीतांपर्यंत, पारंपरिक संगीतापासून आधुनिक संगीतप्रयोगांपर्यंत विविध धाटणीची गाणी या माध्यमातून रसिकांपर्यंत पोहोचवली जात आहेत.
याच संगीतप्रवासात श्रावण महिन्याच्या निमित्ताने पंडित जयतीर्थ मेवुंडी, जे भारतरत्न पंडित भीमसेन जोशी यांचे शिष्य आहेत, यांचा ‘उठ आता मंगेशा’ हा भैरवी आणि भूप रागाचा प्रभाव असलेला अभंगही सादर करण्यात आला आहे. त्यानंतर श्री मंगेशाच्या चरणी अर्पण केलेलं ‘उभी तुझ्या गाभारी मंगेशा’ हे भक्तिगीत या संगीतप्रवासातील आणखी एक सुंदर भर ठरलं आहे.
वैशाली सामंत यांच्या स्वरांची जादू, भावपूर्ण शब्दरचना आणि गुणी कलाकारांची सुरेल साथ यामुळे ‘उभी तुझ्या गाभारी मंगेशा’ हे गाणं श्रावणातील रसिकांसाठी एक भक्तिमय आणि अविस्मरणीय संगीतानुभव ठरण्याची अपेक्षा आहे.
‘उभी तुझ्या गाभारी मंगेशा’ हे भक्तिगीत ‘सप्तसूर म्युझिक’च्या युट्यूब चॅनेलवर ऐकण्यासाठी उपलब्ध आहे. श्रावणाच्या या पवित्र महिन्यात श्री मंगेशाच्या चरणी भक्तिभावाने नतमस्तक होण्यासाठी हे सुरेल भक्तिगीत नक्की ऐका.
.png "Videos"){kind=small}
