फोटो सौजन्य - Social Media
विलेपार्ले येथील कूपर रुग्णालयात भटक्या श्वान आणि मांजरांचा त्रास महिनाभर उलटूनही कायम असून, परिस्थितीत कोणताही ठोस बदल झालेला नाही. रुग्णालय परिसर आणि वॉर्डांमध्ये प्राण्यांचा वाढता वावर रुग्ण, नातेवाईक आणि कर्मचाऱ्यांमध्ये भीती निर्माण करत असून, रुग्णालयातील सामान्य कामकाजावरही परिणाम होण्याची शक्यता आहे. या परिस्थितीमुळे रुग्णांची सुरक्षितता आणि आरोग्यावरील धोका वाढत असून, तातडीने प्रभावी उपाययोजना करण्याची गरज भासते.
दै. नवराष्ट्रने ५ मार्च रोजी या समस्येकडे लक्ष वेधले होते, तरीही उपाययोजना ठप्प असल्याने नागरिकांमध्ये संताप व्यक्त होत आहे. ‘कूपर रुग्णालय आहे की कुत्र्या-मांजरांचा अड्डा? पालिका प्रशासनाला रुग्णांच्या आरोग्याची काळजी नाही का?’ असा प्रश्न नागरिक उपस्थित करत आहेत. रुग्णालयातील या गंभीर समस्येमुळे परिसरातील नागरिक आणि रुग्णांनी देखील नाराजी व्यक्त केली आहे.
कूपर रुग्णालयाचे अधिष्ठाता डॉ. देवदास शेट्टी यांनी भटक्या श्वानांसाठी आश्रयस्थळ उभारण्यास वेळ लागणार असल्याचे सांगितले. रुग्णालयात बाहेरील लोक प्राण्यांना अन्न देतात आणि सुरक्षा कर्मचाऱ्यांना विरोध करतात, असेही त्यांनी स्पष्ट केले. तसेच प्राणीप्रेमींनी श्वानांना दत्तक घेऊन त्यांची जबाबदारी घेण्याचे आवाहनही त्यांनी केले.
रुग्णालय परिसरात सहज अन्न उपलब्ध असल्यामुळे भटक्या प्राण्यांची संख्या वाढली आहे. परिणामी, चावा घेण्याची घटना, अस्वच्छता आणि संसर्गाचा धोका वाढला आहे. नागरिक महापालिकेने तातडीने ठोस पावले उचलावीत, अशी मागणी करत आहेत. रुग्णालयातील सुरक्षिततेसाठी आणि आरोग्यदायी वातावरण राखण्यासाठी प्रभावी उपाययोजना करणे अत्यावश्यक ठरले आहे.
सुरक्षा रक्षकांच्या माहितीनुसार, प्राणीप्रेमींनी नियमित अन्न दिल्यामुळे श्वानांची संख्या वाढली असून, अन्न देण्यास न सांगितल्यास धमकावल्याचे तक्रारीत नमूद आहे. ही परिस्थिती रुग्णालयातील रुग्णांची सुरक्षितता आणि कर्मचारी व रुग्णांची मानसिक शांतता यासाठी गंभीर आव्हान ठरत आहे. त्यामुळे महापालिकेने तत्काळ उपाययोजना करून रुग्णालय परिसरातील भटक्या प्राणी समस्या पूर्णपणे नियंत्रित करणे गरजेचे आहे.
.png "Videos"){kind=small}
