सर्वसामान्यांना आता मोठा फटका बसणार; ऑगस्टमध्ये महागाईवाढीचा अंदाज, ‘या’ बाबी ठरणार कारणीभूत

भाजीपाल्याचे दर वार्षिक आधारावर २८.९६ टक्क्यांनी घसरले. आरबीआयने रेपो दर ५.५ टक्के कायम ठेवला असला तरी हंगामी आणि पावसाळी प्रभावांमुळे ऑगस्टमध्ये महागाई पुन्हा वाढू शकते.

मुंबई : देशात बेरोजगारी, महागाई हा अत्यंत ज्वलंत प्रश्न बनला आहे. याचा थेट संबंध सर्वसामान्यांवर होतो. जुलै 2025 मध्ये घाऊक महागाई दर शून्यापेक्षा 0.58 टक्के खाली आला, जो दोन वर्षांतील सर्वात कमी पातळीवर आहे. अन्नपदार्थ, भाज्या, इंधन आणि धातूंच्या किमतीत झालेल्या घसरणीमुळे हा दिलासा मिळाला. भाजीपाल्याचे दर वार्षिक आधारावर २८.९६ टक्क्यांनी घसरले. पण, आता पुन्हा एकदा महागाईचा फटका बसू शकतो असा अंदाज वर्तवण्यात येत आहे.

भारतीय रिझर्व्ह बँकेने रेपो रेट ५.५ टक्के कायम ठेवला असला तरी हंगामी आणि पावसाळी प्रभावांमुळे ऑगस्टमध्ये महागाई पुन्हा वाढू शकते, तर जागतिक परिस्थिती तेल आणि वस्तूंच्या किमतींवर दबाव आणू शकते, असे म्हटले जात आहे. घाऊक महागाई मुख्यतः अन्नपदार्थ, खनिज तेल, कच्चे पेट्रोलियम आणि नैसर्गिक वायू आणि मूलभूत धातूंचे उत्पादन इत्यादींच्या किमतीत घट झाल्यामुळे शून्यापेक्षा कमी राहिली आहे.

दरम्यान, जुलैमध्ये अन्नपदार्थांच्या किमती ६.२९ टक्क्यांनी घसरल्या, तर जूनमध्ये त्या ३.७५ टक्क्यांनी घसरल्या. भाज्यांच्या किमतीत मोठी घसरण दिसून आली. जुलैमध्ये त्यांच्या किमती २८.९६ टक्क्यांनी घसरल्या, तर जूनमध्ये त्या २२.६५ टक्क्यांनी घसरल्या. तयार उत्पादनांच्या बाबतीत महागाई जुलैमध्ये २.०५ टक्क्यांवर पोहोचली, तर मागील महिन्यात ती १.९७ टक्के होती.

जुलैमध्ये घाऊक किंमत महागाईत घट

जुलैमध्ये घाऊक किंमत महागाईत घट झाली आहे. हे होण्याचे मुख्य कारण अन्न आणि ऊर्जा किमतींमध्ये झालेली घट होती. घाऊक महागाईत झालेली घट प्रामुख्याने अन्न क्षेत्रामुळे आहे. वार्षिक आधारावर अन्नपदार्थांच्या किमतीत मोठी घसरण दिसून आली. यामध्ये भाज्या, डाळी आणि अंडी, मांस आणि मासे यांनी मोठी भूमिका बजावली. याशिवाय, ऑगस्टच्या दुसऱ्या पंधरवड्यात झालेल्या मुसळधार पावसामुळे नाशवंत वस्तूंच्या किमती वेगाने वाढू शकतात आणि यावर लक्ष ठेवणे देखील महत्त्वाचे असेल.

येत्या काही महिन्यांत महागाई नियंत्रणात राहण्याची अपेक्षा

येत्या काही महिन्यांत घाऊक महागाई नियंत्रणात राहण्याची आम्हाला अपेक्षा आहे. अन्नधान्याच्या किमतीत मंदी आणि नैऋत्य मान्सूनमध्ये अनुकूल प्रगतीमुळे भविष्यात कृषी व्यवहारांना चालना मिळेल, असे उद्योग संघटनेचे अध्यक्ष हेमंत जैन यांनी म्हटले आहे.

हेदेखील वाचा : Bihar Election 2025 : १०० रुपये परीक्षा शुल्क, उद्योगांना अनुदान; गांधी मैदानातून नितीश कुमार यांच्या ४ मोठ्या घोषणा