मराठी माणसाच्या खांद्यावर राजस्थानची धुरा; हरिभाऊ बागडे बनले नवे राज्यपाल

डोक्यावर गांधी टोपी आणि अगदी साधी राहणीमान असलेले हरिभाऊ बागडे औरंगाबादचे नेते आहे. मातीतून कष्टाने वर आलेले नेते म्हणून हरिभाऊ बागडे यांची ओळख आहे. लहानपणी अगदी पेपर टाकण्याचं काम केलेले हरिभाऊ आता राज्यस्थानचे राज्यपाल झाले आहेत. मागील 65 वर्षांपासून त्यांनी आरएसएसमध्ये काम केले आहे. त्याचबरोबर आमदार, मंत्री आणि आता थेट राज्यपाल म्हणून हरिभाऊ बागडे कार्यरत होणार आहेत. बागडे यांनी 1985 ला आपल्या राजकीय प्रवासाची सुरुवात केली. पाच वेळी त्यांनी सलग आमदार म्हणन काम केले. त्यानंतर त्यांची बिनविरोध निवड विधानसभा अध्यक्ष म्हणून झाली. त्यानंतर अन्न व नागरी पुरवठा मंत्री म्हणून देखील हरिभाऊ बागडे यांनी कार्यभार सांभाळला आहे. आता राष्ट्रपती द्रौपदी मुर्मू यांनी हरिभाऊ बागडे यांना राजस्थानचे राज्यपाल म्हणून नियुक्त केले आहे.

काय म्हणाले हरिभाऊ बागडे?

राजस्थानचे राज्यपाल म्हणून हरिभाऊ बागडे यांची नियुक्ती करण्यात आले आहे. त्यानंतर हरिभाऊ बागडे यांनी प्रतिक्रिया दिली. बागडे म्हणाले, काल (27 जुलै) सकाळी 8.45 च्या सुमारास मला पंतप्रधान नरेंद्र मोदी यांचा फोन आला. पंतप्रधान मला म्हणाले, हरिभाऊ काय चाललंय? मी त्यांना म्हटलं सर्व काही चांगलं चाललंय, एकंदरीत बरं चाललंय. त्यावर ते मला म्हणाले, तुम्हाला महाराष्ट्राच्या बाहेर जायचं आहे. त्यांनी मला इतकंच सांगितलं आणि म्हणाले, ही गोष्ट कोणाला सांगू नका, मी लवकरच तुमच्याशी संपर्क साधेन. त्यानंतर काही वेळाने माझी राजस्थानच्या राज्यपालपदी नियुक्ती होणार असल्याची बातमी समोर आली.